1 Samweli 23 - Ebibulia 2001

Daudi nakiza ekigo kya Keila

¹ Bagambira Daudi bati, “Abafilisiti nibarashanisa Keila, nibanyaga n'emyaka aha nyano.”

² Aha rw'ekyo Daudi araguza aha Mukama ati, “Ngende ndashanise Abafilisiti aba?” Omukama amuhorora ati, “Ogende orashanise Abafilisiti orokore Keila.”

³ Kyonkai Daudi abashaijabe bamugambira bati, “Leba, omuli Yuda tulimu nitutina, lero biraba bitai katuragenda Keila kurashanisa amahe g'Abafilisiti?”

⁴ Aho Daudi ashuba araguza aha Mukama. Omukama amuhorora ati, “Imuka ogye Keila, enshonga Abafilisiti ndabakunaga omu mikono.”

⁵ Daudi agenda Keila n'abashaijabe, barashanisa Abafilisiti, babaita eiturampungu, banyaga n'ebitunganwa byabo, Daudi arokora atyo abanyansi ba Keila.

⁶ Abiatari mutabani wa Ahimeleki kayairukiire Keila owa Daudi agenda akwete efodi.

⁷ Bagambira Shauli okwo Daudi aizire Keila. Shauli agamba ati, “Ruhanga yamunnaga omu mikono aha rw'okuba yayekingirana orwo yataha omu kigo kina ebihigi n'emihingo.”

⁸ Shauli ahuruza abantu bona kugya omu ndashana, kuzingora Keila, kuzinda Daudi n'abashaijabe.

⁹ Daudi amanya okwo Shauli yabaire namuhiganisa; agambira Abiatari omukuhani ati, “Leta efodi aha.”

¹⁰ Ashuba agamba ati, “Waitu Mukama, Ruhanga wa Isiraeli, omwiru wawe ahuliire kwo okwo Shauli alikwenda kwija Keila kusilikya ekigo nakitura inye.

¹¹ Abantu ba Keila bannage omu mikonoye? Isi Shauli aije, nk'okwo omwiru wawe ahuliire? Waitu Mukama, Ruhanga wa Isiraeli, ninkutagiliza, omwiru wawe omuhorore.” Omukama agamba ati, “Araija.”

¹² Aho Daudi agamba ati, “Abantu ba Keila barannaga n'abashaija bange omu mikono ya Shauli?” Omukama agamba ati, “Barabanaga omu mikono yabo.”

¹³ Aho Daudi n'abashaijabe, ababaire nibagoba nka 600, baruga Keila, bafa gagenda. Shauli kayahuliire okwo Daudi yairuka, etabaro agileka.

¹⁴ Daudi aikara omu bitairongo omw'irungu omu mabanga g'Eirungu lya Zifu. Shauli yamuhigaga buli kiro; kyonkai Ruhanga tiyamumunagire mu mikono.

¹⁵ Daudi atina aha rw'enshonga Shauli akaba atabaire kumwita. Daudi akaba ali Horeshi Omw'irungu lya Zifu.

¹⁶ Yonatani mutabani wa Shauli aimukya ahondera Daudi omuli Horeshi amugambira kuguma ahali Ruhanga.

¹⁷ Amugambira ati, “Otatiina, aha rw'okuba tata takwite. Noija kuba mukama otware Isiraeli, nanye mbe katikiro wawe. Shauli, tata, eki nakimanya.”

¹⁸ Bombili bakora endagano omu maisho g'Omukama; Daudi aikara Horeshi, na Yonatani agya omuka.

¹⁹ Ahanyuma Abazifi batemba Gibea owa Shauli, nibagamba bati, “Daudi ayesherekire omu nsi yaitu omu bitairongo bya Horeshi aha kabanga ka Hakila obugya ruguru bwa Yeshimoni.

²⁰ Mbwenu Rugaba, songoka okwo washangwa noralira; ekyaitu ni kumukunaga omu mikono.”

²¹ Shauli agamba ati, “Omukama abatunge omugisha orwo mwanganyibwa.

²² Mugende mushube mumanyuruzege; mubone enkiro mbali eyeshelekire, n'omuntu amuboineyo mumumanye, aha rw'okuba nibangambira okwo aina obwenge bungi.

²³ Orw'ekyo mulebe, kandi mwekomye emyanya eyo ayeshelekiremu, azimbiire, mugaruke mumpe amakuru geigeigei. Aho ndagenda nainywe; k'araba ali omu nsi egi, ndamuhiga omu nkumi zona za Yuda.”

²⁴ Baimukya bagenda Zifu bebembeire Shauli. Omu kanya ako Daudi n'abashaijabe bakaba bali Omw'Irungu lya Maoni, omuli Araba amagya ruguru ga Yeshimoni.

²⁵ Shauli n'abashaijabe bagenda kumuhiga. Daudi kuhulira ago, agya aha rwazi Omw'Irungu lya Maoni. Orwo Shauli yahuliire ekyo amubingira omwirungu elyo.

²⁶ Shauli agenda rubaju rumoi rw'eibanga na Daudi n'abashaijabe rubaju orundi rw'eibanga. Daudi akaba narahuka kwiruka Shauli; kandi Shauli n'abashaijabe bakaba bamutangatangire n'abashaijabe kubakwata,

²⁷ orwo entumwa yagobire Shauli negamba eti, “Yanguha oije, Abafilisiti ensi bagibunda.”

²⁸ Aho Shauli akubuka, aleka kubinga Daudi, atabalira Abafilisiti; nikwo omwanya ogwo kwetwa “Rwazi rw'Okuhunga.”

²⁹ Daudi arugayo, atura mu bitairongo bya Engedi.