1 Samweli 2 - Ebibulia 2001

Hana nasingiza Omukama

¹ Hana ashaba Omukama ati, “Omutima gwange nigushemelerwa Omukama; Omukama antungire amani gangi. Ababisha bange nimbashekelera, kuba ninshemelerwa, andokoire.

² Omutakatifu nk'Omukama tabayo, enshonga thaliyo ondijo shana iwe, Rwazi nka Ruhanga waitu tabayo.

³ Lekera kugambisa eikuru lihango lityo, okweshaijaza kuhage omu kanwa kawe. Kuba Ruhanga niwe Mukama w'amagezi, niwe aramura eby'abantu bakora.

⁴ Amata g'emanzi gahendahendekire, kandi abajege nibo baina amani.

⁵ Ababaire baigusire nibakolera ekyakulya, kyonkai ababaire bali bajara, tibakirumwa njara. Omugumba azaire mushanju, kandi ayazaire bangi alebeire.

⁶ Omukama aita mara ahimbura, atwara omuntu Sheoli ashuba amwihyayo.

⁷ Omukama anakwaza mara agaigaza, atera aha mutwe mara akuza.

⁸ Aihya omworo omw'itaka, aimukya omukene amwihya omu ntumiro y'eijwi. Abashuntamya n'abarangira n'okubasikisa entebe y'ekitinwa. Emisingi y'ensi eba y'Omukama, aha misingi egyo niho yataire ensi.

⁹ Abesigwabe alibalinda; nawe ababi balibulira omu mwilima; kuba omuntu talisingisa mani.

¹⁰ Ababisha b'Omukama balichebacheburwa, alibasharukiraho nk'enkuba ayemire omw'iguru. Omukama niwe aliramura ensi zona, alitunga omukamawe amani, enkorwa majutaye agihe obushobora.”

¹¹ Ahanyuma Elikana agya Rama omuka. Kandi omwana akolera Omukama omu mikono ya Eli omukuhani.

Batabani ba Eli

¹² Batabani ba Eli babaga njanga, batalikumanya Mukama.

¹³ Omuchwo gw'abakuhani aha bantu gwabaga guti: Omuntu kayatambaga ekitambo, omwiru w'omukuhani yakwizire enyama ekyatogota, akwete euma y'amaino gashatu,

¹⁴ achumita omu sefuria nga omu kirika, anga omu ntango anga omu nyungu. Ekyo euma yaimukyagamu, omukuhani akitwara. Nikwo bagiraga batyo Abaisiraeli abagyagayo.

¹⁵ Okushagaho kababaga batakokize bishaju, omwiru w'omukuhani yaijaga agambira omuntu alikutamba ekitambo ati, “Mpa enyama y'omukuhani ey'okwokya. Omuhe embisi otamuha echumbirwe.”

¹⁶ K'omuntu ogwo yakumugambire ati, “Kababanze bokye ebishaju oije otware ey'orayenda,” yakugambire ati, “Chei, ogimpe mbwenu aha k'orayanga ndagitwara rwamani.”

¹⁷ Nikwo batabani ba Eli bafakaliire batyo Omukama, bakajangura ekihongokye.

Samweli omuli Shilo

¹⁸ Samweli akabanza kukolera Omukama ali mwana muto; yayekomaga efodi elikwera.

¹⁹ Buli mwaka nyina yamushoneraga akakanzu akamutwalira, orwo yagendaga na iba kutamba ekitambo kya buli mwaka.

²⁰ Eli y'ahaga Elikana na mukaziwe omugisha, nagamba ati, “Omukama akusingire, omukazi ogu akuzalire abana abandi bakwate omwanya gw'ogwo owo wamuhongeire.” Aho bashuba omuka.

²¹ Omukama asingira Hana atwara enda, azara abana b'abojo abandi bashatu n'abaisiki babili. Omwana Samweli akura nakolera Omukama.

Eli nahana abatabani

²² Mbwenu aho Eli akura muno. Eby'abatabani bakoraga Abaisiraeli yabihuliraga byona, ahulira n'okwo babyamaga n'abakazi abakoraga aha kishasi ky'Eihema ly'Omuterano.

²³ Ababaza ati, “Kubaki nimukora mutyo? Ebintu ebi ebyo ndikuhulira omu bantu bibi.

²⁴ Chei, bana bange, amakuru ago ndikuhulira abantu b'Omukama nibaranza ti garungi.

²⁵ Omuntu k'afakalira ondijo, Ruhanga amuramura; kyonkai k'afakalira Omukama, ayakumutonganira n'ohai?” Nawe banga kuhulira ebyo ishebo alikubagambira, kuba Omukama akaba yayenzire kubaita.

²⁶ Omwana Samweli agendelera kukura, nashemelera Omukama n'abantu.

Ekibonabonyio kya Eli n'abatabani nikirangwa

²⁷ Omushaija wa Ruhanga aija ahali Eli, amugambira ati, “Omukama yagamba ati, ‘Orwo bashwenkuru, Aroni n'ekaye babaire bali bairu ba Farao nkabemanyisa.

²⁸ Aroni nkamuronda omu nganda za Isiraeli kuba mukuhani wange, agye aha ealutare yange kwoteza obunuma, ajware n'efodi kundaguraho. N'ebihongo byange byona eby'okwokibwa ebigirwa Abaisiraeli nkabiha bashwenkuru abo.

²⁹ Mbwenu kubaki nimururukira ebitambo n'ebihongo ebyo naragiire kumpongera, okakunira abana bawe kushaga inye? Ebihongo by'Abaisiraeli abantu bange nimubihyaho enyama ezirungi muno nimulya nimubwejegera?’

³⁰ Nikyo Omukama Ruhanga wa Isiraeli alikugambira ati, ‘Ky'amazima nkaba ngambire okwo oruzaro rwawe n'oruganda rwawe nibo balinkolera ebiro byona.’ Kyonkai mbwenu Omukama nagamba ati, ‘Ekyo nikikabure, abalikumpa ekitinwa nibo ndiha ekitinwa, kandi abalikungaya nabo ndibagaya.

³¹ Ebiro ebilija orwo ndiita abasigazi omu ruzaro rwawe, n'omu ruganda rwawe talibamu muntu wa kukura kugurusha.

³² Ahanyuma olibona enaku, ochubire n'Abaisiraeli abandi aha rw'emigisha eyo ndibaha. Mara ebiro byona omu ruzaro rwawe talibamu mugurusi.

³³ Kyonkai ndihyamu mwijukuru wawe omoi arore, abe mukuhani ankolere. Kyonkai aliba mpume mara ayenanukwe limoilimoi, kandi baijukuru bawe abandi baligwa aha mbanda.

³⁴ Orwo batabani bawe bombili Hofuni na Finehasi barafa kiro kimoi, ekyo nikyo kirakumanyisa okwo ebyo nagamba bilibakwo.

³⁵ Kandi ndironda omukuhani aliba mwesigwa ahali inye, ogwo niwe alikora ebyo ndikwenda. Ndimuha abaijukuru bakolere enkorwa majuta yange ebiro byona.’

³⁶ Omuli baijukuru bawe abhalihonoka halirugwamu ow'okumwinamira namushaba akahera n'ekyakulya ati, ‘Waitu bampe akalimo mpwere abakuhani omu myoga yabo, nirwo ndabona ak'okulya.’ ”