1 Samweli 19 - Ebibulia 2001

Shauli nagingiza Daudi

¹ Shauli agambira omutabani Yonatani n'abaramatabe kabaita Daudi. Kyonkai Yonatani yagonzaga muno Daudi.

² Agambira Daudi ati, “Tata, Shauli nahiga kukwita. Aha rw'ekyo bwankya orayemanya, oikare omu mwanya ogweheleire oyesheleke.

³ Inye ndaturuka nyemelere aha rubaju rwa tata omw'ishwa mbali oyeshelekire, nfumolere tata ahali iwe. Kandagira ekyo namanya kyona kyona ndakugambira.”

⁴ Yonatani atenda Daudi ahali Shauli ishe, amugambira ati, “Omukama atakora kubi mwiruwe Daudi, kuba taina ky'akufakaliire. Kandi ebigirobye bikubeleire by'omugasho.

⁵ Akehwamu yaita Omufilisiti, n'Omukama y'aha Isiraeli yona okusinga kw'amani. Ekyo okakibona washanduka, mbwenu aho kubaki Daudi omwitire bushai obuzira nshonga?”

⁶ Shauli ahuliliza ebyo Yonatani alikumugambira, anahira ati, “Obuso bw'Omukama timwite.”

⁷ Yonatani ayeta Daudi, amugambira ebyo byona; ashuba amutwalira Shauli, yaikara omu mabonage nk'orwa mbere.

⁸ Hashuba habaho endashana. Daudi atabara, arashana n'Abafilisiti, mara abaita muno, abasinga.

⁹ Aho Ruhanga asingira Shauli omuzimu gumubanda. Akashangwa ashuntamire omwa wenene akwete eichumu, Daudi natera enanga.

¹⁰ Shauli ahiga kumubambijanyia aha rukuta n'eichumu, kyonkai Daudi amwehigiza, Shauli eichumu alitera orukuta. Daudi airuka hunga.

¹¹ Omu kir'ekyo Shauli atuma entumwa aha nju ya Daudi kumulinda, kwija kumwita bwankya. Kyonkai Mikali muka Daudi amugambira ati, “K'otairukire okahunga kir'eki omu, nyenkya nibakwita.”

¹² Mikali arabya Daudi omw'idirisha amusongora, airuka.

¹³ Mikali akwata ekinyago akibyamika aha kitanda, akishaguza omuto gw'omushenshe gw'embuzi, ashuba akishweka n'emyendo.

¹⁴ Orwo Shauli yatwekire entumwa kukwata Daudi, Mikali abagambira ati, “Arwaire.”

¹⁵ Aho Shauli atuma entumwa kweta Daudi kumubona, ati, “Mumundetere aha kitanda nyije mwite.”

¹⁶ Orwo entumwa zatahiremu, bashanga ekinyago aha kitanda, kishagwirwe omuto gw'omushenshe gw'embuzi.

¹⁷ Shauli abaza Mikali ati, “Ombeiyeireki oti, okataishura omubisha wange akagenda? Leba yairuka.” Mikali amuhorora ati, “Angambiire ati, ‘Ondeke ngende, anga nkwite!’ ”

¹⁸ Daudi aba nikwo airuka atyo akahunga. Agobera Samweli omuli Rama. Amugambira byona ebyo Shauli yabaire amukozire. Aho bombili bagenda batura Nayoti.

¹⁹ Abantu bagambira Shauli bati, “Daudi ali Nayoti omuli Rama.”

²⁰ Aho Shauli atuma entumwa kumukwata. Orwo baboine omuteko gw'abarangi nibabasha, Samweli ali mukuru wabo, Mwoyo wa Ruhanga abanda entumwa za Shauli, na zonene kwakwo zibasha.

²¹ Orwo babigambire Shauli, atuma entumwa ezindi nazo zibasha. Atuma ezindi omurundi gwa kashatu, nazo kwakwo zibasha.

²² Ahanyuma ayegendera Rama, agoba aha iziba lihango omuli Seku. Abaza ati, “Samweli na Daudi bali nkahai?” Omuntu omoi amushubamu ati, “Bali Nayoti omuli Rama.”

²³ Aruga aho agya Nayoti omuli Rama. Mwoyo wa Ruhanga na wenene kwakwo amubanda, kayabaire nagenda abasha, alemwa agoba Nayoti omuli Rama.

²⁴ Ajura emyendoye abasha omu maisho ga Samweli. Omushana ogwo gwona n'ekiro ekyo kyona abyama ali butunyu. Kwema aho bagamba bati, “Shauli nawe ali omu barangi?”