1 Samweli 18 - Ebibulia 2001

¹ Orwo Daudi yamazire kufumora na Shauli, Yonatani agonza Daudi eza fanfe, amugonza nk'okwo yayegonzaga.

² Kandi kir'ekyo Shauli amwekwata okutamutaishura kushuba wabo.

³ Aho Yonatani anywana na Daudi, enshonga akaba namugonza nk'okwo yayegonzaga.

⁴ Ajura ebebo eyo yabaire ajwete, agiha Daudi, n'ebikwatobye by'endashana, nangu n'embandaye, n'obutabwe n'omukandaragwe.

⁵ Daudi yagoshokaga hona hona mbali Shauli yamutumaga. Kityo Shauli amuhindura mukuru w'abaisherukalebe. Ekyo kikashemelera abantu bona, kwakwo n'abaramata ba Shauli.

Shauli nachubira Daudi

⁶ Kababaire nibatabaruka Daudi yarugire kwita Omufilisiti, abakazi baturuka omu bigo byona bya Isiraeli nibahoya, nibaguruka kuchwekera Omukama Shauli, baina ebikwato by'amayaga, baina n'engarabi, nibazina n'ebyera.

⁷ Orwo balikushanduka bazina nibahororangana bati, “Shauli aisire enkumize, na Daudi obukumibwe.”

⁸ Aho Shauli emigambire egi emutama, atamwa muno; agamba ati, “Daudi bamubalira obukumi inye bambalira enkumi; akyabonaki ekishagireho shana obukama!”

⁹ Kwema kir'ekyo akimba Daudi ekiisho.

¹⁰ Bukeire Ruhanga atweka omuzimu gubanda Shauli n'amani, agamba asiga akaragi omu njuye, aho Daudi atera enanga nk'okwo yagiraga buli kiro. Shauli akaba akwete eichumu.

¹¹ Alijugunyira Daudi nashubira kumubambijanyia aha rukuta. Kyonkai Daudi amuhigiza emirundi ebili.

¹² Shauli yatinaga Daudi aha rw'enshonga Omukama akaba ainawe, kandi wenene akaba yamurugireho.

¹³ Nikwo kumweihyaho akamuhindura mukuru w'orukumi; yaba natabara natabaruka ayebembeire embaga.

¹⁴ Ebyo yakoraga byona byagoshokaga, kuba Omukama akaba amwemiremu.

¹⁵ Orwo Shauli yaboine okwo yabaire nagoshoka muno yamutina.

¹⁶ Kyonkai Abaisiraeli bona na Yuda bamugonza; aha rw'okuba yatabaraga abebembeire, atabaruka abakulembeire.

Shauli nasiigira Daudi

¹⁷ Aho Shauli agambira Daudi ati, “Merabu muhara wange omukuru ali aha; ninyija kumukusiigira. Ekikuru ombere manzi orwane endashana z'Omukama.” Okumugambira atyo akaba natekeleza ati, “Atangwaho, agwe aha Bafilisiti.”

¹⁸ Daudi agambira Shauli ati, “Inye nab'ohai n'abanyaruganda bange, eka ya tata omuli Isiraeli baba bahai, inye kuba mukoi w'Omukama?”

¹⁹ Kyonkai omu bukiro obwo Merabu yabaire naija kushwerwa Daudi, bamuhangiira Adirieli Omumeholati.

²⁰ Kandi Mikali muhara wa Shauli ondijo yagonzaga Daudi; bagambira Shauli, ekigambo ekyo kimushemelera.

²¹ Shauli atekeleza ati, “Kamumuhe aije amubere mutego, Abafilisiti baije bamwite.” Aha rw'ekyo agambira Daudi omurundi gwa kabili ati, “Mbwenu noija kuba mukoi wange.”

²² Aragira abaramatabe ati, “Mugambire Daudi omu kyama muti, ‘Omukama nakushemelerwa, n'abaramatabe bona nibakugonza; ahonu obe mukoi w'Omukama.’ ”

²³ Abaramata ba Shauli bagambira Daudi ebigambo ebyo. Daudi agamba ati, “Inywe nimubona kintu kijege inye kuba mukoi w'Omukama?”

²⁴ Abaramata bagambira Shauli okwo Daudi yahorora.

²⁵ Aho Shauli abaragira kugambira Daudi bati, “Omukama talikwegomba makura, shana enshembe 100 z'Abafilisiti, abone kwehora ababisha b'Omukama.” Shauli akaba agendeleire kumwisa Abafilisiti.

²⁶ Orwo abaramatabe babaruliire Daudi ebigambo ebyo, Daudi ashemelerwa kuba mukoi w'omukama. Ebiro kabyabaire bitakahingiwreho,

²⁷ Daudi atabara n'abashaijabe aita Abafilisiti 200; aleta enshembe zabo, aziha omukama orubara rwijwire, abone kuba mukoiwe. Nikwo Shauli kumusiigira omuhara, Mikali.

²⁸ Kyonkai orwo Shauli ogwo yaboine okwo Omukama yabaire amwemiremu, n'okwo omuhara Mikali yabaire namugonza,

²⁹ Shauli yatina Daudi okushagaho. Aho anoba Daudi obutaleka.

³⁰ Ahanyuma abatwazi b'Abafilisiti batabara omu ndashana, mara orwo bakatabaraga Daudi yabonaga egoshoko kushaga abaramata ba Shauli bona; kityo eibaralye liranganwa muno.