1 Samweli 17 - Ebibulia 2001

Goliati nakoleeza Abaisiraeli

¹ Abafilisiti bahuruza amahe gabo kurashana, bahurulira Soko eya Yuda, basisira omugati ya Soko na Azeka omuli Efesidamimu.

² Shauli n'Abaisiraeli nabo bahurura, basisira omu Ruhanga rwa Ela, batekateka kurashana n'Abafilisiti.

³ Abafilisiti bemelera aha ibanga rubaju orumoi, n'Abaisiraeli bemelera aha ibanga rubaju orundi, oruhanga rubali omugati.

⁴ Omu rusisira rw'Abafilisiti harugwayo omwisherukare eibaralye Goliati, owa Gati, akaba aina oburai bw'emita nka ishatu.

⁵ Akaba ajwete ehelumeta y'omulinga omu mutwe, ajwete engabo y'ekyoma omu omu kifuba, obusikizi bwayo nk'ekilo 57.

⁶ Aha maguru akaba ainaho engabo z'omulinga, omu mabega aina akachumu k'omulinga.

⁷ Orubango rw'eichumulye rukaba nirushusha orugamba rw'omushuki w'emyendo, n'obusikizi bw'eichumu lyonene bukaba buli bw'ekilo nka mushanju. Omutwazi w'engaboye yamwebemberaga.

⁸ Ayemelera akungira amahe ga Isiraeli ati, “Nimukorahoki aho? Nimutekateka endashana? Inye ndi Mufilisiti, inywe muli bairu b'amahe ga Shauli. Omuli inywe murondemu omuntu omoi asongoke mbali ndi.

⁹ K'arashobora kurwana nanye akanyita, aho turaba bairu banyu. Kyonkai kandamukiza amani nkamwita, aho muraba bairu mutukolere.”

¹⁰ Omufilisiti ogwo agamba ati, “Kir'eki ninkoleeza amahe ga Isiraeli; mumpe omuntu turwane.”

¹¹ Shauli na Isiraeli yona kuhulira eby'Omufilisiti alikugamba bahahanwa emitima, batina muno.

Daudi naija omu rusisira

¹² Daudi akaba ali mutabani wa Yese, Omuefurati wa Betelehemu omuli Yuda, mara Yese ogwo akaba aina abatabani munana. Omu makiro ga Shauli, omushaija ogwo akaba yare yagurusire.

¹³ Abatabani abashatu abakuru bakaba batabaire na Shauli omu ndashana. Omuzigaijo ni Eliabu, nakuratwa Aminadabu, owa kashatu ni Shama.

¹⁴ Daudi niwe yabaire ali mainuka gabo. Abashatu abakuru baikaraga na Shauli;

¹⁵ kyonkai Daudi yagendaga owa Shauli nagaruka kulisa entaama za ishe omuli Betelehemu.

¹⁶ Ebiro makumi ganai Omufilisiti yaijaga nabemelera omu maisho bwankya na bwaigoro.

¹⁷ Yese agambira omutabani Daudi ati, “Otwalire barumuna bawe ekilo 10 z'engano egi ebabwire, n'emikate egi 10. Obibatwalire bwangu omu rusisira.

¹⁸ Kwakwo otwalire omukuru w'eihe lyabo ly'orukumi emichundo egi 10 y'amajuta. Olebe okwo barumuna bawe bali oshube ogaruke, bakuhe akamanyiso oshube okandetere.”

¹⁹ Shauli, na batabani ba Yese abashatu n'Abaisiraeli bona bakaba bali omu Ruhanga rwa Ela nibarashana n'Abafilisiti.

²⁰ Daudi aimuka bwankya karai, entaama azisigira omulinzi, akwata entanda agenda nk'okwo Yese yabaire amuragiire. Agoba aha rusisira orwo eihe lyabaire nilibandura kugya omu rubuga rw'endashana nilitera orusharo rw'endashana.

²¹ Isiraeli n'Abafilisiti betekatekera endashana, eihe kurashana na linu.

²² Daudi emigugu agisigira omulinzi kugilinda, airuka agya omw'ihe ashura abarumuna.

²³ Kayabaire akyafumora nabo, leba emanzi, Omufilisiti wa Gati, eibaralye Goliati, aruga omw'ihe ly'Abafilisiti, agamba ebigambo byonene byonene nk'obubere, Daudi abihulira.

²⁴ Abaisiraeli kubona omushaija ogwo batina muno, bamwiruka.

²⁵ Bagamba bati, “Mwabona omushaija ogu ayamaza? Mazima yamaza kukoleeza Isiraeli. Omuntu aramwita, omukama aramutunga amanaganage, amusigiire omuhara, n'eka ya ishe omuli Isiraeli taligyenza mushoro.”

²⁶ Daudi agambira ababaire bamwemeleire haihi ati, “Omuntu araita Omufilisiti ogu, akaihaho Isiraeli ekihemu eki, bamukolereki? Kuba Omufilisiti ogu atatahirirwe yab'ohai kukoleeza eihe lya Ruhanga asingire?”

²⁷ Abantu bamuhorora omu migambire yonene yonene bati, “Omuntu aramwita arakolerwa atyo n'atyo.”

²⁸ Eliabu omukuruwe bwoli akaba nahulira orwo yabaire nafumora n'abantu. Atamwa muno Daudi, amubaza ati, “Waletwaki kunu? Entaama zike; mbwenu omw'irungu wazisigir'ohai? Nimanya eby'olikutekeleza, mara ogir'omutima gubi. Waletwa okuleba endashana.”

²⁹ Daudi amubaza ati, “Mbwenu nakoraki? Ntagira kyonabaza?”

³⁰ Daudi amurugaho agya ah'ondijo amubaza emibalize yonene yonene; abantu bamuhorora nk'orwa mbere.

³¹ Orwo bahulire ebyo Daudi yagambire, babibarulira Shauli, nawe amutuma.

³² Daudi agambira Shauli ati, “Omufilisiti ogu atakuyugumisa muntu n'omoi. Inye ndagenda ndwane nawe.”

³³ Shauli amuhorora ati, “Tolikushobora kugenda kurashana na Mufilisiti ogu, kuba iwe okyali musigazi kandi wenene aba muntu w'endashana kwema omu busigazibwe.”

³⁴ Kyonkai Daudi agambira Shauli ati, “Inye nalisaga entaama za tata. Entare anga edubu kayaijaga ekakwata omwana gw'entaama omu buhyo,

³⁵ ngihondera ngitera, ngigwiha omu kanwa. Kayanyimukiragamu ngikwata ekileju ngitera ngita.

³⁶ Nkaita entare n'edubu; n'Omufilisiti ogu atatahirirwe nikwo arashusha, orwo yagaya eihe lya Ruhanga asingire.”

³⁷ Daudi ashuba agamba ati, “Omukama ayanyihwire omu magembe g'entare n'ag'edubu, aranyihura omu mikono y'Omufilisiti ogu.” Shauli agambira Daudi ati, “Iroko, Omukama abe naiwe.”

³⁸ Aho amujweka engaboze z'endashana. Amujweka ehelumetaye y'omulinga omu mutwe, amujweka n'engabo y'ekyoma omu kifuba.

³⁹ Daudi ayekoma embandaye aha ngabo y'endashana, kyonkai alenga kugenda byanga aha rw'okuba akaba atabimanyiire. Aho agambira Shauli ati, “Ebi tindikushobora kugenda nabyo enshonga timbimanyiire.” Abijura.

⁴⁰ Akwata enkoniye, aronda amabare g'entelere gatanu omu kaiga agata omu nshaho y'omushumba, akaba akwete ekihubeezokye, ailira haihi Omufilisiti.

Daudi naita Goliati

⁴¹ Omufilisiti aija ailira Daudi haihi, n'omutwaziwe w'engabo amwebembeire.

⁴² Kayaboine Daudi amuleba amugaya, aha rw'okuba akaba akyali musigazi kyonkasi nayera, ali murungi aha maisho.

⁴³ Amubaza ati, “Inye naba mbwa kunyizira n'enkoni?” Yamukeena omw'ibara lya baruhangabe.

⁴⁴ Ashuba agambira Daudi ati, “Ngoba nkubagire amahungu n'ebikaaka.”

⁴⁵ Aho Daudi agambira Omufilisiti ati, “Iwe wanyizira n'embanda, n'eichumu, n'akachumu; kyonkai inye nakwizira omw'ibara ly'Omukama w'amahe, Ruhanga w'eihe lya Isiraeli ely'okoleize.

⁴⁶ Kir'eki Omukama arakunnaga omu mikono, nkutere ahansi, nkunogore omutwe. Kandi emitumbi y'eihe ly'Abafilisiti ningiha amahungu n'ebikaaka. Ensi yona emanye okwo haliyo Ruhanga omuli Isiraeli,

⁴⁷ n'ehururu egi yona emanye okwo Omukama tarokoza mbanda na ichumu, aha rw'okuba endashana y'Omukama; kandi naija kubanaga omu mikono yaitu.”

⁴⁸ Omufilisiti kayarugire mbali yabaire ali kutanganwa Daudi, na Daudi airuka bwangu agiire omu rubuga rw'endashana kumutanganwa.

⁴⁹ Daudi atahya omukonogwe omu nshahoye, aihyamu eibare alihubeeza omu kihubeezo, atera Omufilisiti omu kahanga k'obuso; eibare limutoberamu agwa ahansi ajumaire.

⁵⁰ Nikwo Daudi yasingisize atyo Omufilisiti eibare omu kihubeezo, akamutera akamwita. Akaba ataina mbanda mu mukono.

⁵¹ Aho airuka, atungamira Omufilisiti ogwo, akwata embanda y'Omufilisiti agishohorora omu ruraro, agimunogoza omutwe, amwita. Abafilisiti kabaaboine okwo emanzi yabo yafa bairuka.

⁵² Abaisiraeli na Yuda baimuka, batera orusharo, babinga Abafilisiti babagobya Gati n'aha bihigi bya Ekironi. Nangu n'emputa z'Abafilisiti zigwa omu muhanda kwema Sharaimu kulemwa kugoba Gati na Ekironi.

⁵³ Ahanyuma Abaisiraeli balemwa kubinga Abafilisiti, bagaruka banyaga orusisira rwabo.

⁵⁴ Daudi akwata omutwe g'Omufilisiti aguleta Yerusalemu, kyonkai ebikwatobye abita omw'ihemalye.

Daudi omu maisho ga Shauli

⁵⁵ Orwo Shauli yaboine Daudi nagenda kurashanisa Omufilisiti, abaza Abuneri omukuru w'eihe ati, “Abuneri, omusigazi ogu ni mutabani w'ohai?

⁵⁶ Omanyuruzege omulenzi ogu ni mutabani w'ohai.”

⁵⁷ Orwo Daudi yarugire kwita Omufilisiti, Abuneri amutwara omu maisho ga Shauli akwete omutwe gw'Omufilisiti.

⁵⁸ Shauli amubaza ati, “Iwe musigazi oli mutabani w'ohai?” Daudi ahorora ati, “Ndi mutabani w'omwiru wawe Yese Omubetelehemu.”