1 Samweli 15 - Ebibulia 2001

Shauli narashana n'Abaamaleki

¹ Samweli akagambira Shauli ati, “Omukama antumire kankukora amajuta okaba mukama w'Abaisiraeli abantube. Ahonu hulira okwo Omukama alikugamba.

² Omukama w'amahe nagamba ati, ‘Ninyija kubonabonyia Abaamaleki mbature ekyo baish'enkurubo bakozire Abaisiraeli, bakabatanga nibaruga Misiri.

³ Mbwenu ogende oite Abaamaleki, ebyabo obisilikize kimoi, otabaganyira. Oite bona, omushaija n'omukazi, omwana muto n'alikwonka, ente n'entaama, engamia n'endogobe.’ ”

⁴ Kityo Shauli ayeta abaisherukalebe, ababalira Teraimu. Ab'amaguru akagobya 200,000 aba Isiraeli, kandi aba Yuda 10,000.

⁵ Kayagobire omu kigo ky'Abaamaleki yabazimbira omu ruhanga.

⁶ Yagambira Abakeni ati, “Mugende muruge omu Baamaleki ntakwija nkabasilikijanyia nabo, aha rw'okuba mukagilira Abaisiraeli ekisha orwo babaire nibaruga Misiri.” Nikwo Abakeni kuruga omu Baamaleki.

⁷ Shauli asinga Abaamaleki kwema Havila kulemwa kugoba Shuri eli oburugaizoba bwa Misiri.

⁸ Agagi omukama wabo amukwata obunyangaro, kandi abantu abasilikya kubi abaisa embanda.

⁹ Kyonkai Shauli n'abantube baganyira Agagi, n'entaama ezirungi muno, ente ezigomokire n'obutaama na byona ebyabaire bili birungi. Bakaita ebyabaire nibigaywa, ebitaina mugasho.

Omukama nayanga Shauli

¹⁰ Omukama agambira Samweli ati,

¹¹ “N'inyefuhya ekyo nateleire Shauli aha ngoma. Ahakuba anshengire n'emihango yange talikugihikya.” Samweli anigara, arara natakira Omukama.

¹² Aimuka karai kutanganwa Shauli omu bwankya. Bamubarulira bati, “Shauli agire Karimeli yasimbayo eibare ly'akaijukiro, yashuba yagya Giligali.”

¹³ Samweli aija ahali Shauli, Shauli amugambira ati, “Omukama akuhe omugisha, inye ngobesheleize omuhangogwe.”

¹⁴ Samweli amubaza ati, “Entaama ezo ndikuhulira nizijugibwaki? Isi ente ezilikujumeera?”

¹⁵ Shauli amuhorora ati, “Entaama ezo n'ente abashaija bange bazihire omu Baamaleki. Basigireho ezirungi muno ez'okutambira Omukama Ruhanga waitu ebitambo. Ezisigaire tuzisilikize kimoi.”

¹⁶ Aho Samweli amugambira ati, “Lekera! Kankubarulire eky'Omukama yangambira omu kir'eki.” Shauli ati, “Gamba.”

¹⁷ Samweli agamba ati, “N'orwo omu bwawe oraba noyegaya, oli mukuru w'enganda za Isiraeli. Omukama akakukora amajuta waba mukama wa Isiraeli.

¹⁸ Kandi akakutuma butuma nagamba ati, ‘Ogende otere Abaamaleki, abantu babi, obaite bahweho.’

¹⁹ Kubaki otamuhuliire? Nshongaki kururukira eminyago okafakalira Omukama?”

²⁰ Shauli amuhorora ati, “Omukama muhuliire, mbali antumire ngiireyo, Agagi omukama w'Abaamaleki namuleta, kandi Abaamaleki nabasilikiza kimoi.

²¹ Abashaija bange bakwete eminyago y'entaama n'ente, baihyamu ezirungi muno ez'okutambira Omukama Ruhanga wawe omuli Giligali.”

²² Samweli amubaza ati, “Omukama ashemelerwa ebihongo by'okwokibwa n'ebitambo kushaga okumuhulira? Leba, omuhuliro gurungi gushaga ekitambo, gukira ebishaju by'empaya y'entaama.

²³ Okumushenga kushusha obufu bw'okuraguza, n'okugumangana omutima kushusha okufukamira ebihuuku. Orwo oyangire eky'Omukama akuragiire, na wenene yakwanga tokiba mukama.”

Shauli natongana

²⁴ Shauli agambira Samweli ati, “Nfakaire, natina abantu nahulira ebyabo, kandi nachwa omuhango gw'Omukama nashaga n'ekigambo kyawe.

²⁵ Mbwenu ninkushaba oganyire obufu bwange, tushubeyo hamoi nfukamire Omukama.”

²⁶ Samweli amugarukamu ati, “Titugarukeyo hamoi, kuba orwo oyangire kuhulira Omukama na wenene akwangire, tokiba mukama wa Isiraeli.”

²⁷ Samweli kayahindukire kugenda, Shauli amukwata omukugiro gw'ebeboye etaguka.

²⁸ Samweli amugambira ati, “Kir'eki Omukama yakutaguraho obukama bwa Isiraeli, mara yabuha mutabani wawe omurungi kukushaga.

²⁹ Ruhanga, ekitinwa kya Isiraeli talikwija kubeiya anga kwefuhya; tayefuhya aha rw'okuba taba muntu.”

³⁰ Shauli amugambira ati, “Nfakaire, kyonkai mbwenu ninkutagiliza ompe ekitinwa omu maisho g'abagurusi b'abantu bange, n'omu maisho ga Isiraeli tugarukeyo hamoi nfukamire Omukama Ruhanga wawe.”

³¹ Samweli ashubayo na Shauli, Shauli afukamira Omukama.

Samweli naita Agagi nashuba nataishukana na Shauli

³² Samweli aragira ati, “Ndetera Agagi omukama w'Abaamaleki hanu aha.” Agagi amugoba nashemelerwa, agamba ati, “Obushasi bw'orufu bwahwaho.”

³³ Samweli agamba ati, “Okwo embandwa yawe echwire abakazi amabere, nikwo erachwa nyoko amabere omu bakazi.” Aho Samweli achwagachwagura Agagi omu maisho g'Omukama omuli Giligali.

³⁴ Ahanyuma Samweli agya Rama, kandi Shauli agya omwe Gibea eya Shauli.

³⁵ Samweli tiyaboine Shauli rundi kuhika kir'ekyo yafire. Kyonkai amujunalira muno. N'Omukama ayefuhya ekyo yateleireho Shauli kuba mukama wa Isiraeli.