1 Samweli 14 - Ebibulia 2001

Yonatani nayehwamu narashana n'Abafilisiti

¹ Ekiro kimoi Yonatani mutabani wa Shauli, agambira omusigazi ayamutwaliraga ebikwatobye ati, “Ija tushabuke tugye buseli aha boma y'Abafilisiti.” Kyonkai ishe tiyamugambiire.

² Shauli akaba natura omu mparo za Gibea aha mukomamanga gwa Migironi. Akaba ainayo abashaija nka 600,

³ ainayo na Ahiya mutabani wa Ahitubi, Ahitubi murumuna Ikabodi, Ikabodi eya Finehasi, Finehasi eya Eli, omukuhani w'Omukama omuli Shilo. Ahiya yajwaraga efodi. Emigendere ya Yonatani abantu tibagimanyire.

⁴ Omu kyasha ekyo Yonatani yabaire nahiga kurabamu kugya aha boma y'Abafilisiti hakaba halimu ekibare rubaju orumoi n'ekindi rubaju orundi. Ekimoi kikaba nikyetwa Bozezi, ekindi nikyetwa Senehi.

⁵ Ekibare ekimoi kyemeleire bikara bya Mikimashi, n'ekindi kasi ya Geba.

⁶ Yonatani agambira omusigazi ayamutwaliraga ebikwatobye ati, “Ija tushabuke tugye aha boma y'abatatahiriirwe aba, rundi Omukama yakugira ekyo yatukolera; kuba twaba bangi anga bake thaliho yakutanga Mukama kutukoza kurokora bantube.”

⁷ Omutwazi w'ebikwatobye amugambira ati, “Okore kyona kyona okw'orayenda, leba tuli hamoi. Okwo olikwenda nikwo ndikwenda.”

⁸ Yonatani ashuba agamba ati, “Tushabuke tugobe abashaija balinya batubone.

⁹ Kabaratugambira bati, ‘Mulinde twije okwo,’ aho turayemelera mbali tuli, mbali bali titugyeyo.

¹⁰ Kyonkai kabaragamba bati, ‘Mwije mbali tuli,’ aho turagenda kuba Omukama araba abatunagire omu mikono. Aka niko karatubera kabonero.”

¹¹ Kityo bombili beyoleka Abafilisiti abali omu boma, n'Abafilisiti bati, “Leba Abaheburania nibajumbuka omu bitairongo mbali babaire beshelekire.”

¹² Abashaija b'omu boma bayeta Yonatani n'omutwazi w'ebikwatobye babagambira bati, “Mwije kunu tugire ekyo twaboleka.” Yonatani agambira omutwazi w'ebikwatobye ati, “Mpondera enshonga Omukama yabanaga omu mikono ya Isiraeli.”

¹³ Aho Yonatani akuuba nagenza emikono n'amaguru, n'omutwazi w'ebikwatobye amuhondera. Yonatani atera Abafilisiti, n'omutwazi w'ebikwatobye aruga enyuma abaita.

¹⁴ Eliita elya mbere Yonatani n'omutwazi w'ebikwatobye bakaita abantu nka 20 omu nusu eka.

¹⁵ Habaho obutini bungi omu rusisira n'aheru, n'omu bantu bona; ab'omu boma nangu n'abanyagi bachundwa; ensi etengeta, obutini buba bungi muno.

¹⁶ Abalinzi ba Shauli omuli Gibea eya Benjamini baleba; babona embaga netatamira oku n'oku.

¹⁷ Aho Shauli agambira abantu abo yabaire ainabo ati, “Bara mubone n'ohai ayaturugamu.” Kayabazire abona okwo Yonatani n'omutwazi w'ebikwatobye bathalimu.

¹⁸ Agambira Ahiya ati, “Leta aha Esanduku ya Ruhanga.” Nobona omu makiro ago Abaisiraeli bagendaga n'Esanduku ya Ruhanga.

¹⁹ Shauli orwo yabaire nafumolera omukuhani enkuranga esheba omu rusisira rw'Abafilisiti; nikwo Shauli kugambira omukuhani ati, “Lekelera aho.”

²⁰ Shauli n'abantu bona abo yabaire ainabo betekateka bagya omu ndashana. Habaho akatabure kangi muno, buli muntu embandaye eita mutahiwe.

²¹ Abaheburania ababaire baikaire n'Abafilisiti obubere, bakagenda nabo omu rusisira, kwakwo beyunga n'Abaisiraeli, abo Shauli na Yonatani babaire bainabo.

²² N'Abaisiraeli bona ababaire beshelekire omu mabanga ga Efuraimu bahulira okwo Abafilisiti basingwa, na bonene bababinga babafunza omu ndashana.

²³ Kir'ekyo Omukama aba nikwo arokora atyo Isiraeli. Endashana eyeyongera buseli bwa Betiaveni.

Ebyabaireho omu ndashana

²⁴ Kir'ekyo Abaisiraeli bakashasha aha rw'okuba Shauli akahahira ati, “Aralya ekyakulya litakatobeire, ntakehoroize babisha bange, aramwe.” Orw'ekyo thaliho muntu yarolize kyakulya.

²⁵ Abantu bona bataha ekibira, bashangamu obwoki

²⁶ nibutonona, kyonkai thaliho muntu yataire mukono aha munwa, enshonga bakatina ekinahiro.

²⁷ Ekinahiro ekyo Shauli yataireho abantu Yonatani akaba atakimanyire. Aimukya enkoni eyo yabaire akwete, ata enshonga yayo omu kigabo ky'obwoki, ashuba ateka omukono aha munwa, aho amaishoge gengelera.

²⁸ Omuntu omoi omu mbaga agamba ati, “Isho anahize muno embaga nagamba ati, ‘Nakaraamwe aralya ekyakulya kir'eki.’ ” Abantu bakaba balemirwe.

²⁹ Aho Yonatani agamba ati, “Tata yashasa ensi; leba okwo ndikwengelera amaisho orwo narozaho obwoki.

³⁰ Tikyakubaire kirungi abantu ebyo banyaga ababisha kabakubiliire okwo balikwenda! Manya nikyo n'Abafilisiti tutabaitira muno.”

³¹ Kir'ekyo baita Abafilisiti kwema Mikimashi kugoba Aihaloni. Abantu balemwa muno.

³² Bahyokera eminyago, bakwata entaama, n'ente n'enyana, bazitera ahansi, baziliirana n'obwamba.

³³ Aho bagambira Shauli bati, “Leba, abantu bafakalira Omukama orwo balirana n'obwamba!” Agamba ati, “Ekyo mwakikoza obugobya. Hilingisa eibare lihango lije aha.”

³⁴ Ashuba ati, “Murabarabe omu bantu mubagambire muti, ‘Buli omoi alete enteye anga entaamaye, muzibagire hanu aha mulye. Mutalirana bwamba kufakalira Mukama.’ ” Kityo omu kiro ekyo buli muntu aleta ente bazibagira aho.

³⁵ Shauli ayombekera Omukama ealutare; niyo yabaire ealutare ya mbere eyo yamwombekeire.

³⁶ Shauli agamba ati, “Tuhondere Abafilisiti omu kiro omu tubanyage obwire bukye. Twite bona tubamareho.” Bamugambira bati, “Okore okwo orayenda.” Kyonkai omukuhani agira ati, “Tubanze tubaze Ruhanga.”

³⁷ Shauli araguza ahali Ruhanga ati, “Mpondere Abafilisiti? Isi orabanaga omu mikono ya Isiraeli?” Kyonkai kir'ekyo Omukama tiyamuhoroire.

³⁸ Shauli agamba ati, “Abebembezi b'embaga inywena mwije, mulebe okwo kir'eki entambara egi yaija.

³⁹ Obuso bw'Omukama asingire arokora Isiraeli! N'orwo ayakora entambara egi yakuba Yonatani mutabani wange mazima nafa.” Kyonkai thaliho muntu n'omoi ayamuhoroire.

⁴⁰ Aho agambira Abaisiraeli bona ati, “Mugye rubaju rumoi, inye na Yonatani mutabani wange tugye rubaju orundi.” Abantu bagambira Shauli bati, “Okore okwo orayenda.”

⁴¹ Shauli agamba ati, “Waitu Mukama Ruhanga wa Isiraeli, kubaki kir'eki otahorora mwiru wawe? Entambara egi k'eraba yakorwa inye anga Yonatani mutabani wange, waitu Mukama Ruhanga wa Isiraeli, urimu etugambire. K'eraba yakorwa abantu bawe ba Isiraeli, tumimu etugambire.” Yonatani na Shauli urimu ebakwata, embaga eruhonokaho.

⁴² Aho Shauli agamba ati, “Teka enshoga tumanye nka n'inye anga mutabani wange Yonatani.” Urimu ekwata Yonatani.

⁴³ Nikwo Shauli kugambira Yonatani ati, “Ngambira eky'okozire.” Yonatani amugambira ati, “Ndolizeho obwoki buke n'enkoni eyo mbaire nkwete; ndi aha, nfe.”

⁴⁴ Shauli agamba ati, “Ruhanga anyite, Yonatani k'otafiire.”

⁴⁵ Abantu bagambira Shauli bati, “Yonatani asingiire Isiraeli endashana yakufa atai? Nikikabure! Obuso bw'Omukama asingire, thaliho rushoke na rumoi rwa Yonatani ruraragara hansi. Kir'eki ekyo yakora yaba ayemire na Ruhanga.” Nikwo embaga yachungwire etyo Yonatani, tiyafire.

⁴⁶ Shauli alekelera aho okubinga Abafilisiti, ashuba omuka, n'Abafilisiti bagaruka owabo.

Obukama bwa Shauli n'ekaye

⁴⁷ Shauli kayabaire yatwete engoma ya Isiraeli, arashana n'ababishabe bona aba buli rubaju. Arashanisa Moabu, Abaamoni, Edomu, abakama ba Zoba n'Abafilisiti. Hona mbali yagyaga yabasingaga muno.

⁴⁸ Amanzara aita Abaamaleki, arokora Isiraeli omu mikono y'ababanyagaga.

⁴⁹ Abatabani ni Yonatani, Ishivi na Malikishua. Abahara babili: Omuzigaijo eibaralye ni Merabu, omuto ni Mikali.

⁵⁰ Mukaziwe ni Ahinoamu muhara wa Ahimaasi. Omukuru w'eihelye ni Abuneri mutabani wa Neri, kandi Neri ni ishento Shauli.

⁵¹ Kishi niwe ishe Shauli, na Neri ishe Abuneri akaba ali mutabani wa Abieli.

⁵² Oburorabwe bwona Shauli akarashana muno n'Abafilisiti. Kayabonaga omuntu wena wena aina amani anga ali manzi yamutahyaga omw'ihelye.