1 Samweli 12 - Ebibulia 2001

Samweli nakwasa Shauli obukama

¹ Samweli agambira Abaisiraeli ati, “Ebyo mungambire byona mbihuliire, nabateraho omukama.

² Mbwenu leba omukama abebembeire. Inye nagurusire, n'orujwi rwasindikire orundi, na batabani bange bali hamoi nainywe. Mbebembeire kwema omu busigazi bwange kuhika kir'eki.

³ Ndi aha, munkomeeke omu maisho g'Omukama n'omu maisho g'enkorwa majutaye. Ndatwete ente y'ohai? Anga ndatwete endogobe y'ohai? Ndabonesize ohai enaku? Anga ndayendize ohai rushwa ey'okunyigaza amaisho? Munkomeeke mbalihire.”

⁴ Bagamba bati, “Tiwatugobeize anga kutushasa anga kwenza muntu rushwa yona yona.”

⁵ Abagambira ati, “Omukama niwe mujulizi ahali inywe n'enkorwa majutaye, niwe mujulizi kir'eki, okwo mutanshanga na kantu.” Bagamba bati, “Omukama niwe kaishemboni.”

⁶ Samweli agambira abantu ati, “Omukama ayataireho Musa na Aroni, ayaihire baisheinywe Misiri, niwe kaishemboni.

⁷ Mbwenu aha rw'ekyo mugume, nyije mbatelere omushango aha Mukama, nshubemu byona eby'Omukama yagiliire baisheinywe na inywe kubachungura.

⁸ Orwo Yakobo yagiire Misiri, Abamisiri bakabashasa, aho baisheinywe batakira Omukama, yatuma Musa na Aroni babaihya Misiri, babagobya omu nsi egi baba nimwo batura.

⁹ Kyonkai bakebwa Omukama Ruhanga wabo, aho yabanaga omu mikono ya Sisera, omukuru w'eihe lya Yabini omukama wa Hazori, n'omu mikono y'Abafilisiti, n'omu mikono y'omukama wa Moabu, babatera.

¹⁰ Aho batakira Omukama bati, ‘Tufakaire enshonga tukusigireho twafukamira ebishushani bya Baali n'ebya Ashitaloti. Kyonkai mbwenu otuchungure omu mikono y'ababisha baitu, turafukamira iwe.’

¹¹ Nikwo Omukama kubatwekera Yerubaali na Baraki na Yefuta nanye, akabachungura omu mikono y'ababisha banyu, buli rubaju mwatura buhore emilembe.

¹² Kyonkai kamwaboine Nahashi omukama w'Abaamoni yabatabalira, mwangambira muti, ‘Chei, shana omukama abe niwe atutwara,’ kandi okwo Omukama Ruhanga wanyu niwe yabaire ali mukama wanyu.

¹³ Mbwenu leba, yabateraho omukama owo muronzire, owo mushabire.

¹⁴ Kamuratina Omukama mukamufukamira mukahulira eby'alikubaragira mutachwire mihangoye, inywe n'omukama alikubatwara kamurahondera Omukama Ruhanga wanyu, eraba mirembe.

¹⁵ Kamutahuliire eby'alikubaragira mukachwa emihangoye, arababonabonyia n'omukama wanyu.

¹⁶ Ahonu mugume mwije mubone ekihango eki eky'Omukama alikwija kubakolera.

¹⁷ Bir'ebi ti igesha ly'engano? Kanyije ntakire Omukama ataishure enkuba n'enjura, mumanye okwo mufakaliire Omukama obufu buhango kweshabira omukama.”

¹⁸ Samweli atakira Omukama, kir'ekyo atweka enkuba n'enjura, abantu bona batina muno Omukama na Samweli ogwo.

¹⁹ Abantu bagambira Samweli bati, “Oshabire abairu bawe aha Mukama Ruhanga wawe, tutafa, aha rw'okuba aha ntambara zaitu twongeireho obufu obu obw'okweshabira omukama.”

²⁰ Samweli abashubamu ati, “Mutatina; entambara mugikozire. Mbwenu mutakumurugaho rundi. Mufukamire Omukama n'omutima gwanyu gwona.

²¹ Mutakushuba kuhondera baruhanga abataina mugasho abatakubarokora. Ni baruhanga abataina mazima.

²² Aha rw'eibaralye elihango Omukama tabanage, kuba nayenda kubahindura ihangalye.

²³ Lero aha rubaju orwange, nikikabure kulekera kubashabira; aho nakuba mufakaliire. Ndabegesa mboleke ebirungi ebyo murakora.

²⁴ Ekikuru mumutine, mara mumukolere n'obwesigwa n'omutima gwanyu gwona. Mwijuke ebihango ebyo abakoleire.

²⁵ Kamulikugendelera kufakara, nimusilika n'omukama wanyu.”