1 Samweli 11 - Ebibulia 2001

Shauli nasinga Abaamoni

¹ Ahanyuma Nahashi Omwamoni atemba abunda Yabeshigileadi. Abantu bona ba Yabeshi bagambira Nahashi bati, “Okore naichwe endagano tukukolere.”

² Kyonkai Nahashi Omwamoni abagambira ati, “Ndakora nainywe endagano kandabanza nkabaihyamu buli omoi elisho lya bulyo, nkajangura ntyo Isiraeli yona.”

³ Abagurusi ba Yabeshi bamugambira bati, “Otuhe ebiro mushanju tutume entumwa omu nsi yona ya Isiraeli. Aho kaharaburayo ow'okuturokora turakwehongera.”

⁴ Entumwa kazagobire Gibea eya Shauli, babarulira abantu ebigambo ebyo, aho abantu bona bachura eyobobo.

⁵ Shauli akashangwa naruga omu ndimiro akuratiire ente, abaza ati, “Kubaki abantu nibachura?” Kityo bamugambira amakuru g'aba Yabeshi.

⁶ Shauli kayahuliire ebigambo ebyo Mwoyo wa Ruhanga amwijaho n'amani, agira ekiniga kingi muno.

⁷ Akwata ente azihyaho enkomo, azitematema ebichweka, abitweka entumwa omu nsi yona ya Isiraeli, nagamba ati, “Wena araba atatabaire kuhondera Shauli na Samweli, enteze zirakorwa zityo.” Aho abantu batina Omukama, bahurura bona obutasigarwayo muntu n'omoi.

⁸ Abahuruliza Bezeki ababara, Abaisiraeli 300,000, kandi aba Yuda 30,000.

⁹ Aho bagambira entumwa ezabaire zitumirwe bati, “Mugye mugambire abanya Yabeshigileadi muti, ‘Nyenkya omw'ihangwe murabona obujuni.’ ”

¹⁰ Nikwo aba Yabeshigileadi kugambira Abaamoni bati, “Nyenkya turabehongera mutukore okwo murayenda.”

¹¹ Bwankya omu birahi, Shauli ateka embaga omu mitwe eshatu, bagoba omu rusisira rw'Abaamoni, babachwagachwagura kulemwa kuhika omw'ihangwe. Abahungireho batataama nangu thaliho bowakushangire bali babili.

¹² Aho abantu bagambira Samweli bati, “N'ohai abaire nagamba ati, ‘Shauli tiyakututwara?’ Leta abantu abo tubaite.”

¹³ Kyonkai Shauli agamba ati, “Chei, kir'eki thaliho muntu araitwa, aha rw'okuba Omukama yarokora Isiraeli.”

¹⁴ Samweli agambira abantu ati, “Ija tugye Giligali tushube twebuge Shauli omukama waitu.”

¹⁵ Kityo abantu bona bagya Giligali, bateka Shauli aha ngoma omu maisho g'Omukama omuli Giligali. Batamba ebihongo by'emilembe omu maisho g'Omukama, Shauli n'Abaisiraeli bona bashanduka muno.