1 Samweli 10 - Ebibulia 2001

Shauli nakorwa naba

¹ Samweli akwata echupa y'amajuta agafuka aha mutwe gwa Shauli, mara amunywegera, amugambira ati, “Omukama yakukora amajuta k'oba mutwazi w'Abaisiraeli abantube. Oraba mukama w'abantu b'Omukama, obarokore omu mikono y'ababisha babo ababataine. Aka karabaga kabonero ahali iwe okw'Omukama yakukora amajuta kuba mutwazi w'eihangalye.

² Kir'eki k'orandugaho, orashanga abantu babili aha kituro kya Raheli ahali Selasa omu nsi ya Benjamini. Barakugambira bati, ‘Endogobe ez'obaire ogire kuhiiga zabonekire Isho takihangarwa ndogobe, shana nahangarwa inywe, nagamba ati, “Nkoreki aha mwana wange?” ’

³ Ahanyuma oruge aho ogendere kimoi ogobe aha mwaloni gwa Tabori. Noija kutanganwaho abashaija bashatu nibatemba Betheli ahali Ruhanga. Omoi araba akwete obwana bw'embuzi bushatu, ondijo akwete emikate eshatu, owa kashatu akwete enshaho y'oruhu rw'edivai.

⁴ Barakukeisa, kandi bakuhe emikate ebili, ogibatore.

⁵ Ahanyuma oragoba Gibeatielohimu, mbali Abafilisiti baina eboma. Orwo orataha omu kigo oratanganwa ekikakaro ky'abarangi, nibaruga aha rushozi bebembeirwe enanga, obudiika, emilere n'efilimbi, nibaranga.

⁶ Aho omwoyo gw'Omukama gurakutungamaho naiwe orange nabo, ohinduke obe muntu ondijo.

⁷ Obubonero obu kaburakwizira, okore nk'okwo kiraba nikyetagwa, kuba Ruhanga aina iwe.

⁸ Ahanyuma osoke Giligali onyebembereyo. Nanye ningya kukushangayo kutamba ebitambo by'okwokibwa n'eby'emilembe. Ontegeleze ebiro mushanju, kuhika orwo ndaija kukumanyisa eky'orakora.”

⁹ Kayateire ati Samweli amabega kumurugaho, Ruhanga amuhindura omutima, nobubonero obu bwona bwija kir'ekyo.

¹⁰ Kabagobire Gibea, atanganwa ekikakaro ky'abarangi, n'omwoyo gwa Ruhanga gumutungamaho, aho aranga nabo.

¹¹ Aho bona abamumanyaga kwema karai, kubona naranga hamoi n'abarangi babazangana bati, “Mutabani wa Kishi yabaki? Shauli nawe ali omu barangi?”

¹² Omuntu omoi owa halinya abagarukamu ati, “Ishebo n'ohai?” Kwema aho guba mugani bati, “Shauli nawe ali omu barangi?”

¹³ Kayamazire kuranga atemba aha rushozi.

¹⁴ Ishento Shauli amubaza n'omwiruwe ati, “Mubaire mugiire nkahai?” Shauli ati, “Kuhiga endogobe; orwo tutaziboine twagya owa Samweli.”

¹⁵ Aho ishento amugira ati, “Ngambira ebyo Samweli abagambiire.”

¹⁶ Shauli amugambira ati, “Atugambiire akature okwo endogobe zabonekire.” Kyonkai ekigambo ky'obukama ekyo Samweli yamugambiire tiyakimutebeize.

¹⁷ Ahanyuma Samweli yayeta abantu kuteranira Mizipa omu maisho g'Omukama.

¹⁸ Agambira Abaisiraeli ati, “Omukama Ruhanga wa Isiraeli nagamba ati, ‘Nkaihya Abaisiraeli Misiri, nkabachungura omu mikono y'Abamisiri, n'omu mikono y'amahanga agabaire nigabagingiza.’

¹⁹ Kyonkai mbwenu Ruhanga wanyu ogwo abarokora omu naku zanyu n'omu matangwa mwamushenga, nimungambira muti, ‘Chei, otutereho omukama.’ Mpaho mwemelere omu maisho g'Omukama omu nganda zanyu n'omu mahiga ganyu.”

²⁰ Samweli kayalesire haihi enganda zona za Isiraeli, oruganda rwa Benjamini rwarondwamu.

²¹ Aleta haihi oruganda rwa Benjamini, omu mahiga garwo, eihiga lya Matiri lirondwamu; aha nzindo aleta haihi eihiga lya Matiri, buli mushaija, aho Shauli mutabani wa Kishi arondwamu. Kyonkai kabamuhigire tiyabonekire.

²² Bashuba babaza Omukama bati, “Omuntu ogu yaizire hanu?” Omukama agamba ati, “Leba, ayeshelekire omu bintu.”

²³ Aho bairuka bamwihyayo. Kwemelera omu bantu abakira bona aha mutwe, bamugarukira aha mabega.

²⁴ Samweli agambira abantu bona ati, “Mwamubona ow'Omukama yaronda? Aha rw'okuba omu bantu bona thalimu n'omoi alikumushusha.” Aho abantu bona batokera bati, “Omukama ahangare.”

²⁵ Ahanyuma Samweli ashoborora abantu emitwalize y'obukama, agihandika omu kitabo agibiika omu maisho g'Omukama. Araga abantu, buli muntu agaruka omwe.

²⁶ Na Shauli agenda omwe Gibea, n'abashaija emanzi abo Ruhanga yakozire aha mutima, bamushendekeleza.

²⁷ Kyonkai abashaija abafano bagamba bati, “Ogu yakuturokora atai?” Bamugaya, tibamuleteire na bya kumugabira. Kyonkai wenene yayesiza.