1 Samweli 1 - Ebibulia 2001

Elikana n'ekaye

¹ Hakaba haliyo omushaija omoi wa Ramataimuzofimu, ekigo ky'omu mabanga ga Efuraimu, eibaralye ni Elikana, mutabani wa Yerohamu, Yerohamu eya Elihu, Elihu eya Tohu, Tohu eya Sufu, ow'oruganda rwa Efuraimu.

² Akaba aina abakazi babili; omoi eibaralye ni Hana n'ondijo ni Penina. Penina akaba aina abana, kyonkai Hana akaba atainabo.

³ Buli mwaka omushaija ogu yarugaga omu kigokye, agya kufukamira Omukama w'amahe n'okumutambira ekitambo omuli Shilo, mbali batabani ba Eli babili, Hofuni na Finehasi babaire bali bakuhani b'Omukama.

⁴ Kir'ekyo Elikana yatambaga ekitambo, y'ahaga mukaziwe Penina n'abatabani bona n'abahara emishondo.

⁵ Nawe n'orwo yagonzaga Hana yamuhaga omushondo gumoi gwonkai, kuba Omukama akaba amukomire oruzaro.

⁶ Mukaiba yamuhelebuzaga muno kumutamisa aha rw'Omukama kutamuha ruzaro.

⁷ Nikwo byabaga bityo buli mwaka; buli orwo Penina yagyaga Rwensinga y'Omukama amuherebuza atyo. Aha rw'ekyo Hana alira ayanga n'okulya.

⁸ Kyonkai Elikana, iba, yamubazaga ati, “Kubaki ojunaire omutima? Inye tindikukukilira abana b'abojo 10?”

Enshara ya Hana

⁹ Kabamazire kulya n'okunywa omuli Shilo, Hana aimuka. Omu kanya ako Eli omukuhani akashangwa ashuntamire aha kitebe omu kishasi kya Rwensinga y'Omukama.

¹⁰ Omukazi ogwo akaba ajunaire muno. Ashaba Omukama mara alira muno.

¹¹ Aragana ekiragano ati, “Waitu Mukama w'amahe, kawakusinga okaleba obushasi bw'omuzana wawe, okumutunga omwana w'omwojo, nakumukuha oburorabwe bwona, n'orumoiso tirwakumugya aha mutwe.”

¹² Kayabaire akyashaba omu maisho g'Omukama, Eli akaba amulebire aha munwa.

¹³ Hana akaba nagamba aha mutima, eminwa neyetengya yonkai, n'eirakalye likaba litalikuhulirwa. Aha rw'ekyo Eli akamulenga nk'omukazi atamiire.

¹⁴ Aho Eli amugambira ati, “Oragobahai n'etamiiro? Tamuruguka.”

¹⁵ Kyonkai Hana amuhorora ati, “Chei, mukama wange, inye ndi mukazi omujune muno; tinkanyoire divai anga marwa gona gona; shana nayanjulira Omukama ebindi aha mutima.

¹⁶ Omuzana wawe otamulenga mukazi ataina mugasho. Amashoberwa gangi n'obujune ebyo nyinabyo nibyo byangabisa kuhika mwaha.”

¹⁷ Aho Eli amuhorora ati, “Ogende n'emilembe, Ruhanga wa Isiraeli akutunge ekyo wamushaba.”

¹⁸ Nikwo Hana kugamba ati, “Waitu bagilire omuzana wawe ekisha.” Akwata omuhanda agenda, alya, mara obujune tibwamubonekireho rundi.

Samweli nazarwa mara nahongerwa Omukama

¹⁹ Elikana n'ekaye baimuka bwankya karai, bafukamira Omukama ahanyuma bagaruka omuka Rama. Elikana amanya Hana mukaziwe, mara Omukama amwijuka.

²⁰ Obukiro kabwagobire, Hana atwara enda azara omwana w'omwojo, amuruka eibara amweta Samweli, nagamba ati, “Mushabire Omukama.”

²¹ Elikana ashuba agenda n'ekaye yona kutambira Omukama ekitambo kya buli mwaka, n'okuhikya ekiraganokye.

²² Kyonkai Hana tiyagiireyo. Akagambira iba ati, “K'omwana alimara kuchuka, ndimutwara Rwensinga y'Omukama atulireyo kimoi.”

²³ Elikana iba amugambira ati, “Kora okw'olikwenda, linda ogobe aha kumuchukura, mara Omukama agobesheleze ekigambokye.” Omukazi asigara, mara ayonkya omwanawe, kuhika orwo yamuchukwire.

²⁴ Kayamazire kumuchukura amutwara n'enumi y'emyaka eshatu, n'ensano ekilo 10 n'enshaho y'edivai. Amutwara Rwensinga y'Omukama omuli Shilo, mara omwana akaba akyali muto.

²⁵ Aho kabamazire kwita enumi, omwana bamutwalira Eli.

²⁶ Hana agambira Eli ati, “Waitu mukama wange osingire, n'inye mukazi ayabaire ayemeleire haihi naiwe ninshaba Omukama.

²⁷ Omwana ogu niwe nashabire. Omukama antungire ekyo namushabire.

²⁸ Mbwenu nanye namumuhongera oburorabwe bwona; abe nyehonge y'Omukama.” Aho bafukamira Omukama.