1 Amakuru 26 - Ebibulia 2001

Abakumilizi ba Rwensinga

¹ Ezamu z'abakumilizi: Omu Bakorahi ni Yeshelemia eya Kore, ow'eihiga lya Asafu.

² Kandi Yeshelemia akaba aina abana b'abojo: Omuzigaijo ni Zekaria, omushubiro ni Yedieli, owa kashatu ni Zebadia, owa kanai ni Yatinieli,

³ owa katanu ni Elamu, owa mukaga ni Yehohanani, owa mushanju ni Eliehoenani.

⁴ Obediedomu nawe akaba aina abana b'abojo: Omuzigaijo ni Shemaya, omushubiro ni Yehozabadi, owa kashatu ni Yoa, owa kanai ni Sakari, owa katanu ni Netaneli,

⁵ owa mukaga ni Amieli, owa mushanju ni Isakari, owa munana ni Peuletai; aha rw'okuba Ruhanga akamutunga omugisha.

⁶ Kwakwo na Shemaya akazara abana b'abojo baba batwazi b'amahiga gabo, kuba bakaba bali bashaija emanzi.

⁷ Batabani ba Shemaya ni Otini, Refaeli, Obedi na Elizabadi ow'abarumuna babaire bali bashaija emanzi, Elihu na Semakia.

⁸ Aba bona bakaba nibatabuka omw'ihiga lya Obediedomu, bonene na batabani babo na barumuna babo bakaba bali bashaija emanzi ababaire nibashobora omulimo ogu. Eka ya Abaobededomu bantu 62.

⁹ Kandi Meshelemia akaba aina abana b'abojo n'abarumuna abashaija emanzi 18.

¹⁰ Na Hosa, ow'eihiga lya Merari akaba aina abana b'abojo abalimu Shimuri mukuru wabo (n'orwo yabaire atali muzigaijo nawe ishe niwe yakulize),

¹¹ omushubiro ni Hilikia, owa kashatu ni Tebalia, kandi owa kanai ni Zekaria. Batabani ba Hosa n'abarumuna bona bakaba bali bantu 13.

¹² Ezamu ezi z'abakumilizi, kuhonderana n'abakuru babo bagiraga emyoga omuli Rwensinga nk'okwo Abalevita babo bakoraga.

¹³ Amahiga ago, agake n'agahango kumoi, bakatomelera ebihigi kumanya buli ihiga ni kihigiki ekyo baralinda.

¹⁴ Eitomelera likakwata Shelemia kulinda oburugaizoba. Kwakwo bateka enshoga omutabani Zekaria, omutegeki omugezi, eitomelera limukwata kulinda bikara.

¹⁵ Obediedomu akwatwa ely'okulinda kasi, kandi abatabani bakwasibwa buhanika.

¹⁶ Shupimu na Hosa bakwatwa ely'obugwaizoba, aha kihigi kya Shaleketi aha muhanda ogulikutemba. Ezamu yaihyaga ezamu.

¹⁷ Oburugaizoba haikarwagayo abakumilizi mukaga buli kiro. Bikara haikarwagayo banai buli kiro, na kasi haikarwagayo banai buli kiro, kandi babili babili ahali buhanika.

¹⁸ Ahali Paribari obugwaizoba habagayo banai ab'okulinda omuhanda n'abandi babili ab'okulinda Paribari.

¹⁹ Ezi nizo zabaga zamu z'abakumilizi omuli baijukuru ba Kora n'aba Merari.

Emyoga endijo eya Rwensinga

²⁰ Kandi omu Balevita Ahia yageleraga buhanika z'enju ya Ruhanga na buhanika ez'ebihongo.

²¹ Ladani Omugerishoni akaba natabukwaho amahiga gangi, nangu n'elya Yehyeli libulimu.

²² Batabani ba Yehyeli ni Zetamu na Yoeli; bageleraga buhanika z'enju y'Omukama.

²³ Baijukuru ba Amuramu, Izihari, Heburoni na Uzieli nabo bakahabwa emyoga.

²⁴ Kandi Shebweli mutabani wa Gerishomu, Gerishomu eya Musa, niwe yabaga muhanika mukuru ayageleraga buhanika zona.

²⁵ Rubaju orwabarumuna haliho Rehabia eya Eliezeri, Rehabia nazara Ishia, Ishia nazara Yoramu, Yoramu nazara Zikiri, Zikiri nazara Shelemoti.

²⁶ Shelemoti ogu n'abarumuna bageleraga buhanika zona z'ebihongo byona eby'Omukama Daudi, n'abakuru b'amahiga, n'abakuru b'enkumi, n'abakuru b'eihe bahongaga.

²⁷ Aha byo banyagaga omu ndashana bahongagaho eby'okulinda Rwensinga y'Omukama.

²⁸ Kwakwo byona ebyo Samweli kaboni, na Sauli eya Kishi, na Abuneri eya Neri, na Yoabu eya Seruya babaire bahongire, byamanywaga Shelemoti n'abarumuna.

Emiruka y'Abalevita abandi

²⁹ Omu Baizihari, Kenania n'abatabani nibo babaire bakwasibwe emiruka y'aheru eya Isiraeli, bali bakuru mara baramuzi.

³⁰ Omu Baheburoni, Hashabia n'abarumuna, abashaija emanzi 1,700 nibo bakozaga Isiraeli obugwaizoba bwa Yorudani emilimo yona ya Ruhanga n'emilimo y'omukama.

³¹ Omu Baheburoni, Yeria niwe yabaire ali mukuru wabo kuhonderana n'amazarwa gabo anga amahiga gabo. (Omu mwaka gwa 40 Daudi ali aha ngoma, bakahigiliza omuli bonene aba, abashaija emanzi muno, babashanga Yazeri eya Gileadi).

³² Omukama Daudi akamutaho n'abarumuna, abashaija emanzi 2,700 kuba bagurusi b'amahiga kukoza Abarubeni, Abagadi n'enusu ya Manase emilimo yona ekwete ahali Ruhanga n'ekwete aha mukama.