1 Amakuru 23 - Ebibulia 2001

¹ Daudi kayakuzire muno, yataho omutabani Solomoni kuba mukama wa Isiraeli.

Eikora ly'Abalevita

² Daudi ahuruza abakuru bona ba Isiraeli n'abakuhani n'Abalevita.

³ Abalevita ab'emyaka 30 n'okushaga, babarwa, bagoba 38,000.

⁴ Daudi agamba ati, “Omuli aba 24,000 bakwasibwe omulimo gw'okukora omuli Rwensinga y'Omukama. 6,000 baraba bakuru n'abaramuzi;

⁵ 4,000 babe bakumilizi; kandi 4,000 ezindi basingize Omukama nibatera ebikwato ebyo nakozire.”

⁶ Daudi achwamu Abalevita ebichweka kuhonderana n'amahiga gabo: Abagerishoni, Abakohati n'Abamerari.

⁷ Batabani ba Gerishoni ni Ladani na Shimei.

⁸ Batabani ba Ladani ni Yehieli omukuru, Zetamu na Yoeli, nibo bashatu.

⁹ Batabani ba Shimei ni Shelemoti, Hazieli, Harani, nabo bashatu. Aba bakaba bali bakuru b'oruganda rwa Ladani.

¹⁰ Batabani ba Shimei ni Yahati, Zina, Yeushi na Beria; bona hamoi banai.

¹¹ Omukuru akaba ali Yahati, Ziza ali wa kabili; kyonkai Yeushi na Beria bakaba bataina bana b'abojo bangi, nikyo kyabaleteire okubarwa nk'eihiga limoi.

¹² Batabani ba Kohati ni Amuramu, Izihari, Heburoni na Uzieli, bali banai.

¹³ Batabani ba Amuramu ni Aroni na Musa. Aroni akaronkwa kulebelera ebitakatifu muno, hamoi na baijukurube kuta nibotera obunuma omu maisho g'Omukama ebiro byona, kumukolera n'okuha abantu omugisha omw'ibaralye ebiro byona.

¹⁴ Kyonkai batabani ba Musa omushaija wa Ruhanga babalirwaga omu ruganda rwa Levi.

¹⁵ Abatabani abo ni Gerishomu na Eliezeri.

¹⁶ Omuli batabani ba Gerishomu, Shebweli niwe mukuru wabo.

¹⁷ Eliezeri akazara omutabani omoi wenkai, Rehabia. Kyonkai Rehabia ogwo akaba aina abana b'abojo bangi muno.

¹⁸ Mutabani wa Izihari ni Shelomiti.

¹⁹ Batabani ba Heburoni, Yeria niwe mukuru, Amaria wa kabili, Yahazieli wa kashatu na Yekameamu wa kanai.

²⁰ Batabani ba Uzieli, Mika niwe mukuru, kandi Ishia niwe wa kabili.

²¹ Batabani ba Merari ni Mahuli na Mushi. Batabani ba Mahuli ni eleazari na Kishi.

²² Eleazari akafa ataina bana ba bojo, shana abaisiki bonkai abashweirwe abanyaruganda babo batabani ba Kishi.

²³ Batabani ba Mushi ni Mahuli, Ederi na Yeremoti; bali bashatu.

²⁴ Aba bakaba bali batabani ba Levi kuhonderana n'amahiga gabo, abakuru b'amahiga nk'okwo babaire bahandikirwe kuhonderana n'orubara rw'amabara, omuntu omoi omoi kwema aha myaka 20 n'okushaga ababaire bali b'okukora eikora omuli Rwensinga y'Omukama.

²⁵ Kuba Daudi akagamba ati, “Omukama Ruhanga wa Isiraeli atungire eihangalye emirembe, mara asingiire Yerusalemu eirai lyona.

²⁶ Kityo Abalevita tibakyetaga kushutura Ihema ly'Obusinge anga ebintu ebikwete aha mulimo gwalyo.”

²⁷ Omu bigambo by'enzindo bya Daudi oru nirwo rubara rw'Abalevita kwema aha baina emyaka 20 n'okugendelera.

²⁸ Ati, “Kyonkai omulimo gwabo gurabaga kuhwera baijukuru ba Aroni omw'ikora lya Rwensinga y'Omukama, kumanya nyakabuga zona n'ebiyumba, kwogya ebili bitakatifu byona, kukora na buli mulimo omuli Rwensinga egyo;

²⁹ kuhwera kukora omukate gw'obusinge, n'ensano y'ekihongo ky'emyaka, echapati ezitatumbisiibwe, ekihongo ekikanzirwe, ekihongo ekitoberainwe amajuta, n'ebipimo byona eby'okupimisa obungi n'obuhango.

³⁰ Buli bwankya bayemelerega kusiima Ruhanga n'okumusingiza, na bwaigoro kutyo;

³¹ na buli orwo Omukama alikuhongerwa ebihongo by'okwokibwa aha Sabato, aha kwema kw'okwezi, aha biro bikuru, kuhonderana n'orubara okwo balikwetagwa, nibakora batyo obutosha omu maisho g'Omukama.

³² Oku nikwo baramanyaga Eihema ly'Omuterano Ahatakatifu, baheleze barumuna babo baijukuru ba Aroni omw'ikora lya Rwensinga y'Omukama.”