1 Amakuru 22 - Ebibulia 2001

¹ Aho Daudi agamba ati, “Rwensinga y'Omukama Ruhanga elyombekwa aha. Altare egi AbaIsiraeli baratambiragaho ebihongo by'okwokibwa.”

Daudi natekateka elyombeka lya Rwensinga

² Daudi aragira kuhuruza abanyamahanga bona ababaire bali Isiraeli. Ataho abatezi b'amabaare kutera amabare g'okwombekesa Rwensinga ya Ruhanga.

³ Kandi yagira n'ebyoma bingi muno eby'okukoramu emishumare y'okukoza enyigi z'ebihigi, n'ebihimbo n'omulinga gungi muno ogutakulengirwe busikizi.

⁴ Yataho n'emielezi etaina rubara, kuba Abasidoni n'Abatiro bakaba bagimuleteire nyingi muno.

⁵ Daudi akaba atekeleize ati, “Omwana wange Solomoni akyali muto takamanyire, kandi Rwensinga ey'Omukama alikwija kwombekerwa esaine kuba nungi muno, ey'eiranga n'ekitinwa omu nsi zona. Aha rw'ekyo inye ndagitekateka.” Nikwo kutaho ebikwato bingi muno atakatahize.

⁶ Ashuba ayeta omutabani Solomoni, amuragira kwombekera Omukama Ruhanga wa Isiraeli Rwensinga.

⁷ Amugambira ati, “Mwana wange, omu mutima gwange ntura ningonza kwombekera Omukama Ruhanga wange Rwensinga.

⁸ Kyonkai Omukama akangambira ati, ‘Okaita abantu bangi, warashana endashana zihango zingi; tonyombekere Rwensinga.

⁹ Leba, noija kuzara omwana w'omwojo, aliba muntu w'emilembe. Ndimuha emirembe, ababisha bona abamwataine tibalimutabalira, kandi omu makiroge ndiha Isiraeli emirembe n'obwikarage.

¹⁰ Wenene niwe alinyombekera Rwensinga. Aliba mwana wange, nanye ndiba ishe, ndihamisa n'enketoye omuli Isiraeli eirai lyona.’

¹¹ Mbwenu mwana wange, Omukama Ruhanga wawe abe naiwe, oshobore kumwombekera Rwensinga nk'okwo yakugambireho.

¹² Ekiliho Omukama akutunge amagezi n'okushobokerwa, orwo alikuhindura mutwazi wa Isiraeli, ohikye Amatekage.

¹³ Aho oligoshokage k'olihikyage ebiragiro n'emigenzo eby'Omukama yaragiire Musa kubiha AbaIsiraeli. Ogume mara obe manzi, otatina; kandi otahahanwa mutima.

¹⁴ Nshasire muno kanyizire kubonera Rwensinga y'Omukama etalenta 100,000 z'ezahabu 1,000,000, n'omulinga n'ebyoma ebitali bya kulengwa busikizi, aha rw'okuba bingi muno. Kandi emiti n'amabare nabyo mbitaireho. Ahali ebi orayongeraho.

¹⁵ Oina abakozi bangi muno: Abatezi b'amabaare, abombeki b'amabaare, abaseremala n'ababuya ba buli ngeli abatakubarwa,

¹⁶ abahesi b'ezahabu, efeza, omulinga n'ekyoma. Imuka okore! Omukama abe naiwe.”

¹⁷ Kandi ashuba aragira abakuru bona ba Isiraeli kujuna Solomoni omutabani, ati,

¹⁸ “Omukama Ruhanga wanyu ali hamoi nainywe. Abatungire emirembe buli rubaju. Aha rw'okuba abataka b'ensi egi abanagire omu mikono yange, mbwenu babaire bairu b'Omukama n'eihangalye.

¹⁹ Muhige Omukama Ruhanga wanyu n'amagezi ganyu gona n'emitima yanyu yona. Mwimuke mwombeke ahatakatifu h'Omukama Ruhanga, Esandukuye n'ebikwatobye ebitakatifu bije bitahe Rwensinga eyo muramwombekera.”