1 Amakuru 21 - Ebibulia 2001

Daudi nabara abantu

¹ Sitani agonza kunaga Isiraeli omu kabi, ayohya Daudi kubara AbaIsiraeli.

² Kityo Daudi agambira Yoabu n'abakuru b'eihe ati, “Mugende mubare AbaIsiraeli kwema Berisheba kugoba Dani, mundetere amakuru manye orubara rwabo.”

³ Kyonkai Yoabu agamba ati, “Okwo abantube bali bangi, Omukama asinge abakanyise kushaga aha emirundi 100. Rugaba mukama wange, manya bona bairu bawe; mbwenu kubaki nogonza kubabara? Kiki kukwasa Isiraeli entambara?”

⁴ Kyonkai ekigambo ky'Omukama Daudi kikiza Yoabu amani. Yoabu aimuka araba omuli Isiraeli yona, ashuba agaruka Yerusalemu.

⁵ Aha Daudi orubara. Omuli Isiraeli yona hakaba halimu abashaija 1,100,000 abakushoboire kutabara. N'omuli Yuda abashaija 403,000 abakushoboire kutabara.

⁶ Kyonkai Abalevita n'Ababenjamini Yoabu tiyababaliraine, kuba eky'omukama yamuragiire kikaba kimutamire.

⁷ Ekigambo eki kikatama na Ruhanga, yaita Isiraeli.

⁸ Daudi agambira Ruhanga ati, “Nfakaire muno kubara embaga. Kyonkai mbwenu ninkutagiliza oganyire omwiru wawe entambaraye, kuba ngikolize obufera bungi muno.”

⁹ Omukama agambira Gadi kaboni wa Daudi ati,

¹⁰ “Ogende ogambire Daudi oti, ‘Omukama nagamba ati: Nakuha ebintu bishatu, orondemu kimoi nkikukolere.’ ”

¹¹ Aho Gadi aija ahali Daudi amugambira ati, “Omukama nagamba ati, ‘Orondeho eky'olikwenda:

¹² Emyaka eshatu y'eifa, anga emyezi eshatu ababisha bawe bakwite bakusilikye; kitali kityo Omukama akwise embanda, ebiro bishatu ensi ebundwe endwara, n'omumalaika w'Omukama asilikye ensi yona ya Isiraeli.’ Mbwenu oihyeho empororo eyo ndatwalira ayantuma.”

¹³ Aho Daudi agambira Gadi ati, “Nashasha muno, kanyenage omu mikono y'Omukama, kuba obuganyizibwe buba bungi muno, kyonkai ntagwa mu mikono ya muntu.”

¹⁴ Kityo Omukama ateza Isiraeli endwara; AbaIsiraeli 70,000 bafa.

¹⁵ Omukama atuma omumalaika kusilikya Yerusalemu; kyonkai kayabaire yaija kugisilikya, Omukama aleba, ayeiza, agambira omumalaika ayabaire naija kugisilikya ati, “Nikimara, otaimukya mukono.” Omumalaika w'Omukama akaba ayemeleire bwatana aha kyano kya Orinani Omuyebusi.

¹⁶ Daudi kunaga amaisho abona omumalaika w'Omukama ayemeleire omu rwerwerwe, embanda yagiihire omu kiraro agikwete omu byara, agyolekeize Yerusalemu. Aho Daudi n'abagurusi bajwara engunia, bagwa bajumaire.

¹⁷ Daudi agambira Ruhanga ati, “N'inye ndagiire kubara embaga. N'inye nfakaire, nkozire kubi muno. Kyonkai abantu aba nyakatetere bakozireki? Singa ninkutagiliza, waitu Mukama Ruhanga wange, obonabonyie inye n'abanyaruganda bange, kyonkai ekibundo eki kitagwera bantu bawe.”

¹⁸ Aho omumalaika w'Omukama agambira Gadi kugambira Daudi kugenda kwombekera Omukama ealutare aha kyano kya Orinani Omuyebusi.

¹⁹ Daudi agenda nk'okwo Gadi yamugambira omw'ibara ly'Omukama.

²⁰ Orinani ashangwa natera engano; kukubuka abona omumalaika, abatabani banai abo yabaire ainabo besheleka.

²¹ Daudi agoba Orinani. Orinani kugya kuleba abona Daudi, aruga aha kyano amubandamira obuso buli aha itaka.

²² Daudi agambira Orinani ati, “Ompe omwanya ogulimu ekyano kyawe nyombekeremu Omukama ealutare, ogunguze omw'iguzi lyagwo lyona abantu bange bakire aha kibundo.”

²³ Aho Orinani amugambira ati, “Ogutware, Rugaba Mukama wange, okore eky'olikwenda. Leba nagira ente z'ebihongo by'okwokibwa, n'ebigali by'okuseisa birugwemu enkwi, n'engano erugwemu ensano y'ekihongo. Byona nabikuha.”

²⁴ Kyonkai Omukama Daudi amuhorora ati, “Chei, omwanya ndagugura omw'iguzi lyona. Tindikwija kuhongera Mukama ebili byawe, handiki kuhonga bihongo bya kwokibwa ebyo ntagizire.”

²⁵ Aho amuguraho ekyano ekyo, amushashura esarafu 600 z'ezahabu.

²⁶ Daudi ayombekeraho Omukama ealutare, ahongaho ebihongo by'okwokibwa n'eby'emilembe, atakira Omukama, Omukama amuhoroza omuliro, guruga omw'iguru gwija aha ealutare y'ekihongo ky'okwokibwa.

²⁷ Aho Omukama agambira omumalaika, agarura embandaye omu kiraro kyayo.

²⁸ Omu kanya ako Daudi kayaboine okwo Omukama yamuhorora aha kyano kya Orinani Omuyebusi, ata natambiraho ebitambobye.

²⁹ Nobona eihema ly'Omukama elyo Musa yabaire akoleire omw'irungu, na ealutare y'ekihongo ky'okwokibwa omu kanya kali, bikaba bikyali Gibeoni eiguru mbali bafukamaga.

³⁰ Kyonkai Daudi tiyashoboire kugya mu maisho ga ihema elyo kuraguza ahali Ruhanga kuba akaba natina embanda y'omumalaika w'Omukama.