1 Amakuru 19 - Ebibulia 2001

Daudi nasinga Abaamoni n'Abasiria

¹ Ebyo kabyabaire byahingwire, Nahashi omukama w'Abaamoni atahya; omutabani amusikira.

² Daudi agamba ati, “Hanuni eya Nahashi ndamukolerage, kuba ishe nawe akankorage.” Aho atuma entumwa kumushura n'orufu rwa ishe, atweka abaramatabe.

³ Kyonkai abarangira b'Abaamoni bagambira Hanuni bati, “Nolenga oti Daudi atwekire ab'okukutekesa orufu okuba nakunira sho? Abaramatabe baizire kurambura ensi n'okuginyomoza kwija kugitera.”

⁴ Aho Hanuni akwata abaramata ba Daudi abamoisa ebileju, ebijwaro byabo abishalira omugati omu nyugunyu, ababinga bagenda.

⁵ Orwo Bagambiire Daudi amakuru g'abaramata abo, atuma ab'okugya kubachwekera, kuba enshoni zikaba zibali kubi muno. Omukama agamba ati, “Mwikare Yeriko kuhika orwo ebileju byanyu biramera, aho mugaruke.”

⁶ Abaamoni kabaaboine okwo benobesize Daudi, Hanuni n'Abaamoni batweka ekilo 34,000 z'efeza kukodi amagali n'ab'efarasi kuruga Mesopotamia, Arammaaka na Zoba.

⁷ Bakakodi amagali 32,000, bataho n'omukama wa Maaka n'eihelye, baija basisira balebire Medeba. Abaamoni baruga omu bigo byabo, bahurura kurashana.

⁸ Daudi kukihulira atweka Yoabu n'eihe lyona ely'abaisherukare emanzi.

⁹ Abaamoni bashohora bemelera omu maisho g'ekigo kurashana, n'abakama ababaire baizire baikara bonkai omu karungu.

¹⁰ Yoabu kubona endashana okwo yamwema obuso n'enyuma, arondamu abaisherukare emanzi z'amani omuli Isiraeli abateka kurashanisa Abasiria.

¹¹ Abaisherukare abasigaire abakwasa Abishai, omurumuna, nabo batekwa kurashanisa Abaamoni.

¹² Agamba ati, “K'Abasiria baranshaga amani aho iwe onjune; kyonkai k'Abaamoni barakushaga amani, aho inye ndakujuna.

¹³ Obe manzi, tukwate mashaija, turashanire eihanga lyaitu n'ebigo bya Ruhanga waitu. Omukama asinge akore okwo arayenda.”

¹⁴ Aho Yoabu n'abantu abo yabaire ainabo bailira haihi omu maisho g'Abasiria kurwana endashana, kyonkai bonene bamwiruka.

¹⁵ Abaamoni kabaaboine okwo Abasiria basingwa, nabo kutyo Abishai murumuna Yoabu bamwiruka, bataha omu kigo. Aho Yoabu aija Yerusalemu.

¹⁶ Kyonkai orwo Abasiria baboine okwo basingwa Isiraeli, batuma entumwa kuleta Abasiria ababaire bali buseli bwa Efurati, baija na Shofaki, omukuru w'eihe lya Hadadezeri, abebembeire.

¹⁷ Kababigambiire Daudi, yahuruza Isiraeli yona, bashabuka Yordani, babagoba, ateka abaisherukare kubarashanisa. Abasiria barashana nawe.

¹⁸ Abasiria bairuka AbaIsiraeli, kyonkai Daudi abaita, abaisherukare 7,000 ab'amagali, abaisherukare ab'amaguru 40,000; aita na Shofaki omukuru w'eihe lyabo.

¹⁹ Orwo abairu ba Hadadezeri baboine basingwa Isiraeli, bayehongera Daudi, yabatwara. Kwema aho Abasiria tibakunzire kujuna Baamoni rundi.