1 Amakuru 16 - Ebibulia 2001

¹ Batahya Esanduku ya Ruhanga omw'ihema elyo Daudi yabaire aliteleire. Batambira Ruhanga ebihongo by'okwokibwa n'eby'emilembe.

² Daudi kayabaire yamazire kutamba ebihongo by'okwokibwa n'eby'emilembe, aha enteko omugisha omw'ibara ly'Omukama,

³ kandi agabira Isiraeli yona abashaija n'abakazi buli muntu omukate, ekipimo ky'enyama n'ekeki y'ezabibu zomire.

⁴ Kandi agira Abalevita abo yaronda kuba bakozi omu maisho g'Esanduku y'Omukama kuta nibatakira Omukama Ruhanga wa Isiraeli, kumusima n'okumuhaisiliza.

⁵ Asafu niwe yabaire ali mukuru, nahonderwa Zekaria, Yeyeli, Shemiramoti, Yehieli, Matitia, Eliabu, Benaya, Obediedomu na Yeleli ababaire baina omuruka gw'okutera enanga n'eningili. Asafu akaba ahairwe ogw'okuchekenkura enkunturo,

⁶ kandi abakuhani abalimu Benaya na Yahazieli bakaba baina ogw'okwikara nibatera amakondere omu maisho g'Esanduku y'Omukama.

Oruhoya rw'okusingiza Omukama

⁷ Aho kir'ekyo Daudi abanza aragira Asafu n'Abalevita n'abarumuna kuhoyera Omukama oruhoya rw'esimi bati,

⁸ “Musime Omukama, mutakire eibaralye, ebikorwabye mubirange omu mahanga!

⁹ Mumuhoyere, mumuhoyere ebisingizo, eby'okutangazabye byona mubigambe.

¹⁰ Musingize eibaralye elitakatifu; emitima y'abamuhiga eshanduke.

¹¹ Muhige Omukama n'obushoborabwe, mwitanire okwikara omu mabonage!

¹² Mwijuke ebigirobye eby'okutangaza ebyo yakozire, ebitangazo eby'akozire, n'emishango ey'aramwire.

¹³ Inywe ruzaro rwa Aburahamu omwiruwe, batabani ba Yakobo endondwaze.

¹⁴ Niwe Mukama Ruhanga waitu, niwe aramura ensi zona.

¹⁵ Naijuka endaganoye eirai lyona, ekigambo ekyo yagambire nakijuka emizarwa rukumi.

¹⁶ Tayebirwe ndagano eyo yaragaine na Aburahamu, endagano eyo yarahiliire Isaka;

¹⁷ niyo y'ahamisize Yakobo kili kiragiro, endagano y'eirai lyona ahali Isiraeli,

¹⁸ nagamba ati, ‘Ndikuha ensi ya Kanaani, omugabo gwawe gw'obusika.’ ”

¹⁹ Orwo orubara rwabo rwabaire rukyali ruke, bakyali bajege mara baizi omuli Kanaani,

²⁰ nibabunga, nibaruga ihanga eli nibagya lili, nibaruga ngoma egi nibagya ihanga lindi.

²¹ Tiyakunzire muntu n'omoi kubabonesa naku, kulinda Isiraeli yakanga abakama,

²² nagamba ati, “Enkorwa majuta zange mutazikoraho, abarangi bange mutabakora kubi.”

²³ Ensi yona muhoyere Omukama! Buli kiro mugambe okwo abarokoire.

²⁴ Mubarure ekitinwakye omu mahanga, ebikorwabye eby'okutangaza omu mahanga gona.

²⁵ Kuba Omukama aba mukuru ow'okuhaisilizibwa muno, w'okutinwa kushaga baruhanga bona.

²⁶ Kuba baruhanga bona ab'amahanga bihuuku, kyonkai Omukama niwe yatonzire eiguru.

²⁷ Ekitiinwa n'obukuru bimwebembeire, obushobora n'amashemelerwa bili mbali asingiire.

²⁸ Mumanye, inywe nganda z'amahanga, mumanye okwo ekitinwa n'obushobora biba by'Omukama!

²⁹ Muhe Omukama ekitinwa ky'eibaralye, mulete ekihongo, mwije omu maishoge! Mufukamire Omukama mujwete ebitakatifu;

³⁰ iwe nsi yona ochundwe omu maishoge; ego, ensi ebaamire, tiyakutunguta.

³¹ Eiguru lishemelerwe, ensi eshanduke, bigambe omu mahanga okwo Omukama obukama bubabwe.

³² Enyanja ehilire na byona ebikagijwire, eiguru lishanduke na byona ebikalilimu!

³³ Aho n'ebibira birahoya n'ebyera omu maisho g'Omukama kuba naija kuramura ensi.

³⁴ Musiimire Omukama oburungibwe, kuba ekishakye kiba ky'eirai lyona.

³⁵ Mushube mugambe muti, “Turokore, waitu Ruhanga aturokora, otwihye omu mahanga otukize, tubone kusiima eibara lyawe elitakatifu, tukuhe ekitinwa nitukusingiza.

³⁶ Ahaisilizibwe Omukama Ruhanga wa Isiraeli, kwema eirai lyona kuhika eirai lyona!” Aho abantu bona bagamba bati, “Amina!” Mara Omukama asingizibwe.

³⁷ Kityo Daudi asigaho Asafu n'abarumuna aha Shanduku y'Endagano y'Omukama kukora emilimo obutosha aha Shanduku egyo nk'okwo kyayetagwaga buli kiro.

³⁸ Kwakwo asigaho na Obediedomu n'abarumuna 68, kandi Obediedomu eya Yeduthuni na Hosa bakaba bali bakumilizi.

³⁹ Asiga Zadoki omukuhani n'abarumuna abakuhani aha Kiikaro ky'Omukama aha Rushozi rwa Gibeoni,

⁴⁰ kutambira Omukama ebihongo by'okwokibwa obutosha ahali ealutare y'ekihongo ky'okwokibwa bwankya na bwaigoro, kuhonderana na byona ebyakahandikirwe omu Mateka g'Omukama ago y'ahangiire Isiraeli.

⁴¹ Bakaba bainaho na Hemani na Yeduthuni, n'abandi abaronzirwe n'okutondwa butondwa amabara, kuta nibasiima Omukama kuba ekishakye kiba ky'eirai lyona.

⁴² Hemani na Yeduthuni bakaba baina amakondere n'enkunturo, n'ebikwato by'empoya ezitakatifu. Batabani ba Yeduthuni baba bakumilizi.

⁴³ Aho buli muntu ashuba amaruge, na Daudi agaruka omuka kushuliza aba wenene.