1 Amakuru 15 - Ebibulia 2001

Esanduku y'Omukama

¹ Daudi ayombeka amaju omu Kigo kya Daudi. Atekatekera Esanduku ya Ruhanga omwanya, agitelera eihema.

² Aho agamba ati, “Taliho muntu shana Abalevita bonkai babe nibo bashutura Esanduku ya Ruhanga, kuba Omukama akabaronda kushutura Esandukuye n'okumukolera ebiro byona.”

³ Isiraeli yona agihuruliza Yerusalemu kwija kuleta Esanduku y'Omukama aha mwanya gwayo ogwo yabaire agitekatekeire.

⁴ Ahuruza baijukuru ba Aroni n'Abalevita:

⁵ Omu Bakohati omukuru ni Urieli, hamoi n'abanyaruganda 120;

⁶ omu Bamerari omukuru ni Asaya, hamoi n'abanyaruganda 220;

⁷ omu Bagerishoni omukuru ni Yoeli, hamoi n'abanyaruganda 130;

⁸ omu Baelifazi omukuru ni Shemaya, hamoi n'abanyaruganda 200;

⁹ omu Baheburoni omukuru ni Elieli, hamoi n'abanyaruganda 80;

¹⁰ omu Bauzieli omukuru ni Aminadabu, hamoi n'abanyaruganda 112.

¹¹ Aho Daudi ashuba ayeta abakuhani Zadoki na Abiatari, n'Abalevita abalimu Urieli, Asaya, Yoeli, Shemaya, Elieli na Aminadabu,

¹² abagambira ati, “Inywe muli bakuru b'amahiga g'Abalevita; mweshemeze, mushemeze na barumuna banyu Abalevita mwije kwetweka Esanduku ya Ruhanga wanyu wa Isiraeli mugilete aha mwanya ogwo mbatekatekeire.

¹³ Kuba obubere mubuzirwe kugyetweka, Omukama Ruhanga waitu yatubonabonyia aha rw'okutagitwara okwo eragiirwe.”

¹⁴ Aho abakuhani n'Abalevita beshemeza kubona kutwara Esanduku y'Omukama Ruhanga wa Isiraeli.

¹⁵ Abalevita bashutura Esanduku ya Ruhanga aha mabega okwo eli omu migamba, nk'okwo Musa yabaire aragire kuhonderana n'okwo Omukama yabaire agambire.

¹⁶ Daudi ashuba aragira abakuru b'Abalevita kuronda abahoyi omuli barumuna babo abaratera ebikwato by'omuziiki: Enanga, eningili, enkunturo; bikaba byera.

¹⁷ Aho Abalevita baronda Hemani eya Yoeli, omu barumuna babo barondamu Asafu eya Berekia; omu Bamerari abanyaruganda babo barondamu Etani eya Kushaya;

¹⁸ hamoi n'abanyaruganda babo ab'omugingilika gwa kabili nibo Zekaria, Yaazieli, Shemiramoti, Yehieli, Uni, Eliabu, Benaya, Maaseya, Matitia, Elifelehu na Mikineya, n'abakumilizi abalimu Obediedomu na Yeieli.

¹⁹ Abahoyi abo ni Hemani, Asafu na Etani, bakaba baragiirwe kuchenkura enkunturo z'omulinga.

²⁰ Zekaria, Yaazieli, Shemiramoti, Yehieli, Uni, Eliabu, Maaseya na Benaya, abo bakarondwa kutera enanga omu rulya rwa Alamoti.

²¹ Kyonkai Matitia, Elifelehu, Mikineya, Obediedomu, Yeyeli na Azazia bakarondwa kuba batezi b'enanga omu rulya rwa Sheminiti.

²² Kenania omukuru w'Abalevita ab'omuziki, niwe yabaire ali mwebembezi, kuba akaba nabishobokerwa.

²³ Berekia na Elikana bakaba bali bakumilizi b'Esanduku.

²⁴ Shebania, Yoshafati, Netaneli, Amasai, Zekaria, Benaya na Eleazari abakuhani bakabaha ogw'okutera amakondere omu maisho g'Esanduku ya Ruhanga; Obediedomu na Yehia kwakwo bakaba bali bakumilizi b'Esanduku.

²⁵ Aho Daudi n'abagurusi ba Isiraeli, n'abakuru b'abaisherukare enkumi, bagenda kuleta Esanduku y'Endagano y'Omukama kugihya omwa Obediedomu nibashanduka.

²⁶ Ruhanga akajuna Abalevita ababaire bashutwire Esanduku egyo, batamba ente mushanju n'empaya z'entaama mushanju.

²⁷ Daudi akaba ayambaire akanzu ya kitani nungi; kwakwo n'Abalevita bona ababaire bashutwire Esanduku nikwo babaire bajwete, kumoi n'abahoyi na Kenania. Daudi akaba ajwete n'efodi ya kitani.

²⁸ Nikwo Isiraeli balesire Esanduku y'Endagano y'Omukama omu kanyahwera, amakondere nigataga, nibatera enkunturo n'enanga, eningili nizigamba kundi.

²⁹ Orwo Esanduku y'Endagano y'Omukama yabaire netaha omu Kigo kya Daudi, Mikali muhara wa Sauli alinguliza ayemire omw'idirisha, abona Omukama Daudi nahwera eiguru, nashanduka, amugayira aha mutima.