1 Amakuru 12 - Ebibulia 2001

Ababenjamini abahaire Daudi emikono obubere

¹ Aba nibo bashangire Daudi Zikilagi orwo yabaire nayesheleka Sauli eya Kishi aha rw'okumutina. Bakaba bali omu manzi 30 abamwemagamu omu ndashana.

² Bakaba nibamanya kurashanisa amata, kurasha emyambi n'okurasha amabare omu kihubeezo nibakoza omukono gwa bulyo anga ogwa bumosho. Bakaba bali Babenjamini abanyaruganda ba Sauli.

³ Omukuru wabo akaba ali Ahiezeri, nahonderwa Yoashi, bombili batabani ba Shema owa Gibea; kwakwo na Yezieli na Peleti batabani ba Azimaweti; Beraka, Yehu owa Anatoti,

⁴ Ishimaya owa Gibeoni, omwisherukale emanzi omu makumi gashatu ayayebemberaga; Yeremia, Yahazieli, Yohanani, Yozabadi owa Gedera,

⁵ Eluzai, Yeremoti, Bearia, Shemaria, Shefasia owa Harufi,

⁶ Elikana, Ishia, Azareli, Yoezeri na Yashobeamu ow'oruganda rwa Kora,

⁷ Yoela na Zebadia batabani ba Yerohamu owa Gedori.

Abagadi abahaire Daudi emikono

⁸ Omu Bagadi harugwamu emanzi abamanyaga endashana, babuya omu mikwatire y'engabo n'amachumu, aha maisho nibashusha entare, emyanguhire nk'enjaza aha mabanga, bashanga Daudi omu kigo ky'omw'irungu omu boma.

⁹ Bonene abo omukuru ni Ezeri, owa kabili ni Obadia, Eliabu wa kashatu,

¹⁰ owa kanai ni Mishimana, owa katanu ni Yeremia,

¹¹ Atai wa mukaga, Elieli wa mushanju,

¹² Yohanani wa munana, Elizabadi wa mwendai,

¹³ Yeremia wa ikumi, Makabanai wa ikumi n'omoi.

¹⁴ Abagadi aba bakaba bali bakuru b'eihe, ayatwaraga bake, 100; n'ayatwaraga bangi, 1,000.

¹⁵ Aba nibo bashabukire Yordani omu mwezi gwa mbere, orwo amaizi gayasire gakashaga aha nkunguru zayo zona n'abaturaga omu ruhanga gakabaatamu, gayemalira oburugaizoba n'obugwaizoba.

¹⁶ Bamoiho omu Babenjamini n'Abayuda baija, bashanga Daudi omu boma.

¹⁷ Daudi ashohora kubakiilira, abagambira ati, “Kamuraba mwampondera aha rw'obutahi kunjuna, turanywana; kyonkai kakuraba kuli kumbanja aha babisha bange, n'orwo ntaina kabi ako nkozire, Ruhanga wa baisheichwe abone, ababonabonyie.”

¹⁸ Nirwo Mwoyo yatungamiire Amasai, omukuru w'amakumi gashatu akagamba ati, “Ichwe tuli bawe, iwe Daudi; twemire naiwe, mwana wa Yese! Emilembe, ogire emilembe, n'abalikukuha emikono bagire emilembe! Kuba Ruhanga wawe niwe akujuna.” Aho Daudi abatora, abahindura bakuru b'abaisherukarebe.

Ab'oruganda rwa Manase abahaire Daudi emikono

¹⁹ Abamoiho omu ruganda rwa Manase bayehongera Daudi orwo yatabaire n'Abafilisiti kurashanisa Sauli. Kyonkai Abafilisiti tiyabajunire, kuba abatwazi babo bakaramura kumubinga, nibagamba bati, “Naija kwehongera mukamawe Sauli atunage omu kabi atwise.”

²⁰ Daudi kayabaire nagya Zikilagi, abantu aba ab'oruganda rwa Manase bamwehongera. Nibo Adina, Yozabadi, Yadiaeli, Mikaili, Yozabadi, Elihu na Zeleati, abakuru b'enkumi omu ruganda rwa Manase.

²¹ Bahwera Daudi bamujuna abanyagi, kuba bona bakaba bali bashaija b'amani emanzi, kandi bashangwa bali bakuru b'eihe.

²² Buli kiro obutosha abantu baikaraga nibaija ahali Daudi kumwemamu, eihe lyalemwa lyaba lihango, nk'eihe lya Ruhanga.

Amahe ga Daudi

²³ Oru nirwo rubara rw'abaisherukare ababaire bekomire bahondeire Daudi Heburoni, kwihya Sauli aha ngoma kugiha Daudi nk'okwo Omukama yabaire agambire.

²⁴ Abayuda ab'engabo n'amachumu bakaba bali baisherukale 6,800.

²⁵ Abasimeoni, abashaija b'amani emanzi z'endashana, bakaba bali 7,100.

²⁶ Abalevita 4,600.

²⁷ Yehoyada omukuru w'eihiga lya Aroni akaba aina 3,700;

²⁸ kandi Zadoki, omusigazi w'amani emanzi, ogwo akaba aina abakuru b'eihe 22 kuruga omw'ihigalye.

²⁹ Omu Babenjamini, abanyaruganda ba Sauli 3,000; kuba kulemwa kugoba omu bir'ebyo Ababenjamini abali bangi bakaba bagumire ahali Sauli.

³⁰ Omu Baefuraimu 20,800 abanyamani, emanzi, ab'eiranga omu mahiga gabo.

³¹ Ab'omu nusu y'oruganda rwa Manase 18,000 abatonzirwe butondwa amabara kwija kuta Daudi aha ngoma.

³² Omu b'oruganda rwa Isakari, abashaija abamanyaga eby'amakiro n'emichwo y'AbaIsiraeli, bagurusi 200 n'abanyaruganda babo bona okwo babaire nibabagelera.

³³ Ab'oruganda rwa Zebuluni 50,000 abegesiibwe geigeigei endashana, betekatekeire endashana, baina ebikwato byona by'endashana kuhwera Daudi obuzira kabajoka.

³⁴ Ab'oruganda rwa Nafutali, abagabe 1,000 hamoi n'abaisherukare 37,000 abakwete engabo n'amachumu.

³⁵ Omu Badani baisherukale 28,000 abetekatekeire eby'endashana.

³⁶ Omu ruganda rwa Asheri abaisherukare ababuya 40,000 abetekatekeire endashana,

³⁷ n'Abagadi n'omu nusu y'Abamanase abarugire buseli bwa Yordani, 120,000 ababaire baina ebikwato byona by'endashana.

³⁸ Aba bona, abaisherukare emanzi, baija Heburoni bamalize kuteka Daudi aha ngoma kuba mukama wa Isiraeli; kutyo n'AbaIsiraeli abasigaire bona bakaba bali ba Daudi kumuteka aha ngoma.

³⁹ Bamarayo ebiro bishatu baina Daudi, nibalya, nibanywa, kuba barumuna babo bakaba bababisire.

⁴⁰ Kumoi n'ababaire babali haihi kwema Isakari kuturuka Zebuluni na Nafutali bakabaletera ebyakulya babitwekire endogobe, engamia, enyumbu n'ente, eby'okulya ebitali bya kugambwa: Ensano, emikate y'etini, engoobe z'ezabibu zomire, edivai n'amajuta, ente n'entaama, kuba Isiraeli ekaba eijwire ebyera.