1 Amakuru 11 - Ebibulia 2001

Daudi naba mukama wa Isiraeli na Yuda

¹ Ahanyuma Isiraeli yona eteranira ahali Daudi omuli Heburoni, bagamba bati, “Leba ichwe tuli bawe buchwichwi.

² Makiro agahingwire, n'orwo Sauli abaire natwara, iwe n'iwe obaire notabaza Isiraeli nogihuruza. Kandi Omukama Ruhanga wawe akakugambira ati, ‘Oliba mushumba w'abantu bange, Isiraeli, kandi oliba mukama wabo.’ ”

³ Kityo abagurusi bona ba Isiraeli baija Heburoni mbali Omukama Daudi yabaire asingire, Daudi akora nabo endagano omu maisho g'Omukama. Bamukora amajuta aba mukama wa Isiraeli, nk'okwo Omukama yabaire agambire omu kanwa ka Samweli.

⁴ Aho Daudi na Isiraeli yona bagya Yerusalemu, niyo Yebusi, mbali Abayebusi abanyansi baturaga.

⁵ Abanyansi ba Yebusi bagambira Daudi bati, “Tolikwija kutaha munu.” Nawe Daudi akwata eboma ya Sioni, nikyo kigokye kikuru.

⁶ Agamba ati, “Omuntu wena araba wa mbere kwita Abayebusi, ogwo araba mutwazi mara mukuru w'eihe.” Yoabu eya Seruya atabara ali wa mbere, kityo aba mutwazi.

⁷ Daudi atura omu boma, nikwo eboma egyo kugyeta Kigo kya Daudi.

⁸ Ayombeka ekigo embaju zona kwema Milo obuzingora, kandi Yoabu ashemeza ebichweka by'ekigo ebisigaire.

⁹ Daudi ayeyongera kugira amani, kuba Omukama w'amahe yamwemagamu.

Abaisherukare emanzi za Daudi

¹⁰ Aba nibo babaire bali bakuru b'abaisherukare emanzi za Daudi, abamwemiremu n'amani omu ngomaye, hamoi na Isiraeli yona kumuteka aha ngoma nk'okwo Omukama yabaire agambire ahali Isiraeli.

¹¹ Aga nigo makuru g'abaisherukare emanzi za Daudi: Yashobeamu Omuhakimoni, niwe yabaire ali mukuru w'abashatu; akajunjumya eichumulye yaita abantu 300.

¹² Ayamuhonderaga omu manzi zonshatu ni Eleazari eya Dodo, Omwahohi.

¹³ Akaba ali hamoi na Daudi omuli Pasidamimu orwo Abafilisiti bahuruliire kulinya kurashana. Akaba aliho endimiro y'eshayiri nyingi. AbaIsiraeli bairuka Abafilisiti.

¹⁴ Kyonkai wenene akemelera omu musiri omugati yagurashanira, yaita Abafilisiti abo, Omukama yabarokora, basinga muno.

¹⁵ Abashatu omu bakuru b'amakumi gashatu, bagya aha rwazi mbali Daudi yabaire ali aha mpako ya Adulamu, orwo eihe ly'Abafilisiti lyabaire lisisire omu Ruhanga rwa Refaimu.

¹⁶ Daudi omu kanya kalinya akaba ali omu boma, kandi eihe ly'Abafilisiti likaba lili Betelehemu.

¹⁷ Daudi agira eiliho, agamba ati, “K'omuntu yakumpa amaizi g'eiziba lya Betelehemu bwatana aha kihigi, nkaganywa!”

¹⁸ Nikwo emanzi ezo zonshatu kushenshera orusisira rw'Abafilisiti, zigya zitaha amaizi aha iziba lya Betelehemu elyabaire lyataine ekihigi, zigaletera Daudi. Kyonkai Daudi tiyaganyoire, shana akagashesha ahansi yagahongera Omukama,

¹⁹ yagamba ati, “Nikikabure inye kugira nti omu maisho ga Ruhanga wange. Nywe amaizi agaba gaizire kwisa abantu aba? Kuba n'orwo bagaleta baba benagire omu kabi.” Aha rw'ekyo tiyaganyoire. Ebi bikakorwa emanzi ezi zonshatu.

²⁰ Abishai eya Yoabu niwe yabaire ali mukuru w'amakumi gashatu. Ajunjumya eichumulye alirasira abantu bikumi bishatu abaita; nawe agira eibara nk'abashatu.

²¹ Omu makumi gashatu yagiraga eiranga kubashaga, nangu yaba mukuru wabo, kyonkai abashatu tiyabagobire.

²² Benaya eya Yehoyada akaba ali mushaija emanzi eya Kabuzeeli, ayakoraga ebikorwa by'amaani; niwe yaisire entare ibili rururuma eza Moabu. Akashuba yasongoka yaitira entare omu kina kiro eky'eseruji yarara.

²³ Akaita Omumisri w'ekyema kingi, aina oburai bulikushaga omu mita ibili. Omumisri ogwo akaba akwete eichumu nilishusha orubaho rw'omushuki w'emyendo. Kyonkai Benaya asongoka amugoba n'enkoni, amushwaikura eichumu, aba nilyo amwisa.

²⁴ Ebi bikakorwa Benaya eya Yehoyada, yagira eibara nka balinya abashatu.

²⁵ Yaranganwaga omu 30, kyonkai abashatu tiyabagobire. Aho Daudi amweta amuhindura mukuru w'abalinzibe.

²⁶ Abashaija emanzi omu mahe akaba ali Asaheli murumuna Yoabu, Elihanani eya Dodo owa Betelehemu,

²⁷ Shamoti eya Harodi, Helesi Omupeloni,

²⁸ Ira eya Ikeshi owa Tekoa, Abiezeri owa Anatoti,

²⁹ Sibekai owa Husha, Ilai owa Ahohi,

³⁰ Maharai owa Netofati, Heledi eya Baana owa Netofati,

³¹ Itai eya Ribai owa Gibea Omubenjamini, Benaya owa Piratoni,

³² Hurai ow'obwiga bwa Gashi, Abieli owa Ariba,

³³ Azimaweti owa Bahurumi, Eliaba owa Shaalaboni,

³⁴ Hashemu owa Gizoni, Yonatani eya Shagi owa Harari,

³⁵ Ahiamu eya Sakari owa Harari, Elifali eya Uri,

³⁶ Heferi owa Nekerati, Ahiya owa Peloni,

³⁷ Heziro owa Karimeli, Naarai eya Ezibai,

³⁸ Yoeli murumuna Natani, Mibuhari eya Hagiri,

³⁹ Zeleki owa Amoni, Naharai owa Beroti, omutwazi w'ebikwato bya Yoabu eya Seruya,

⁴⁰ Ira, Garebu aba Yatiri,

⁴¹ Uria Omuhiti, Zabadi eya Ahilai,

⁴² Adina eya Shiza Omurubeni, rugambwa akaba aina abaisherukare 30 abe,

⁴³ Hanani eya Maaka, Yoshafati owa Mitini,

⁴⁴ Uzia owa Ashitera, Shama na Yeieli batabani ba Hotamu owa Aroeri,

⁴⁵ Yadiaeli na Yoha batabani ba Shimuri owa Tizi,

⁴⁶ Elieli owa Havi, Yeribai na Yoshavia batabani ba Elinaamu, Itima owa Moabu,

⁴⁷ Elieli, Obedi na Yaasieli aba Mezobai.