1 Abakama 9 - Ebibulia 2001

Ruhanga nahabukira Solomoni orundi

¹ Solomoni kayamazire kwombeka Rwensinga y'Omukama na nyaruju ya wenene n'amaju gona ago yabaire nayenda kwombeka,

² Omukama Ruhanga amuhabukira omurundi gwa kabili nk'okwo yamuhabukiliire Gibeoni.

³ Amugambira ati, “Mpuliire okushaba kwawe n'okutaka kwawe ahali inye. Naha omugisha Rwensinga egi ey'oyombekire kuba nimwo nfukamirwa eirai lyona. Ndigilinda ngigonze ebiro byona.

⁴ Kandi naiwe k'olingumaho nk'okwo sho Daudi yangumireho, n'omutima gurungi n'obwesigwa, okakora byona ebyo nakuragiire, okahikya ebiragiro byange n'emigenzo yange,

⁵ aho ndihikya endagano yange nk'okwo naraganisize sho Daudi nti, ‘Omuli baijukuru bawe toliburwamu muntu wa kubandara aha nketo y'obukama bwa Isiraeli eirai lyona.’

⁶ Kyonkai kamulinshenga anga abana banyu, mukanga kukwata ebiragiro byange n'emihango yange ebyo nabateleireho, mukagenda kufukamira baruhanga abandi n'okubashaba,

⁷ aho ndichwa Abaisiraeli omu nsi eyo nabahaire; na Rwensinga egi eyo naha omugisha kuba nimwo nfukamirwa ndigikambura ngihye omu maisho gange. Isiraeli baligichwa omugani, bagiganike omu mahanga gona.

⁸ Rwensinga egi eliba itongo, buli omoi aligirabaho aligyechura, atangare asheke, bagambe bati, ‘Ensi egi na Rwensinga egi Omukama akabituraki?’

⁹ Aho baligamba bati, ‘Kuba bakasigaho Omukama Ruhanga wabo, ayaihire baishebo omu nsi ya Misiri, bayekwata baruhanga abandi, babafukamira mara babakolera. Nikwo Omukama kubateza enaku ezi zona.’ ”

Solomoni narongora Hiramu

¹⁰ Solomoni, Rwensinga n'ekikaarekye akabyombeka emyaka 20.

¹¹ Omukama Hiramu owa Tiro akamutwekera embaho z'emielezi n'emivure n'ezahabu nk'okwo yabaire nayetaga. Omukama Solomoni aha Hiramu ebigo 20 omu nsi ya Galilaya.

¹² Kyonkai Hiramu kayarugire Tiro kwija kurambura ebigo ebyo Solomoni yamuhaire tibyamushemeleire.

¹³ Amubaza ati, “Murumuna wange ompaire bigo nyabaki?” Nikyo byayeteirwe nsi ya Kabuli na mambwenu.

¹⁴ Hiramu akaba atwekeire Omukama Solomoni ekilo 4,000 n'okushagamu z'ezahabu.

Ebindi ebyo Solomoni yakozire

¹⁵ Omukama Solomoni kugya kukora emilimo egi: Kwombeka Rwensinga y'Omukama n'ekikaare, oburugaizoba bw'ekigo (Milo) kubutinda eitaka, kwombeka eboma ya Yerusalemu na Hazori na Megido na Gezeri, abakozi akabajaraba.

¹⁶ Farao, Omukama wa Misiri aija akwata Gezeri, agisosotora, aita Abakanaani abaturagamu; yashuba ekigo ekyo yakiragiza omuhara, muka Solomoni.

¹⁷ Nikyo Solomoni yashubire kwombeka Gezeri na Betihoroni ey'obugya ifo;

¹⁸ na Balaati na Tamari omw'irungu lya Yuda,

¹⁹ n'ebigo byona eby'esitoaze, n'ebigo by'amagalige g'endashana, n'ebigo by'efarasi na buli nju yona eyo yayenzire kwombeka Yerusalemu na Lebanoni n'omu ngomaye yona.

²⁰ Abantu bona ababaire basigaireho omu Baamori n'Abahiti, n'Abaperizi n'Abahivi, n'Abayebusi ababaire batali Baisiraeli;

²¹ nibo baijukuru b'abasigaire omu nsi egyo abo Abaisiraeli batashoboire kusilikya limoilimoi, aba nibo Solomoni yajarabire akahindura bairu. Nikwo bakyaba na mambwenu.

²² Kyonkai omu Baisiraeli taliho bo Solomoni yahindwire bairu. Abo bakaba bali baisherukale, bali batwazi, bakuru b'eihelye, n'abakuru b'amagali g'endashana n'ab'efarasi.

²³ Abatwazi bakuru ababaire nibalebelera emilimo ya Solomoni bakaba bali 550.

²⁴ Kyonkai muhara wa Farao aruga omu Kigo kya Daudi agya omu nju eye eyo Solomoni yabaire amwombekeire. Aho Omukama ayombeka Milo.

²⁵ Emirundi eshatu buli mwaka, Solomoni yahongaga ebihongo by'okwokibwa n'ebihongo by'emilembe ahali ealutare eyo yayombekeire Omukama Ruhanga, amwoteza n'obunuma. Nikwo Rwensinga yagimazire atyo.

²⁶ Omukama Solomoni akakora emeli zingi ahali Eziongeberi bwatana Eloti aha mwegego gw'Enyanja Rutuku omu nsi ya Edomu.

²⁷ Hiramu atweka omu meli ezo abairube, abalimba abamanyiire enyanja, hamoi n'abairu ba Solomoni,

²⁸ bagenda Ofiri baihyayo ezahabu ey'ekilo 14,000 n'omushobyo, bagiletera Omukama Solomoni.