1 Abakama 8 - Ebibulia 2001

Esanduku y'Endagano neletwa Rwensinga

¹ Solomoni aketa abagurusi bona n'abakuru b'enganda n'ab'amahiga omuli Isiraeli, baija owe Yerusalemu, kwihyayo Esanduku y'Endagano y'Omukama omu Kigo kya Daudi ekyetwa Sioni.

² Abaisiraeli bamugoba aha kiro kikuru ky'omwezi gwa Etanimu, nigwo mwezi gwa mushanju.

³ Orwo bagobire, abakuhani n'Abalevita bashutura Esanduku y'Omukama,

⁴ Eihema ly'Omuterano, n'ebikwato bitakatifu byona ebyabaire bili omw'Ihema.

⁵ Omukama Solomoni n'enteko yona ya Isiraeli ababaire bamukurasire, bema nawe aha Shanduku, batamba entama n'ente zingi muno ezitaina rubara.

⁶ Aho abakuhani baleta Esanduku y'Endagano y'Omukama omu mwanya gwayo Ahatakatifu nyakabara omuli Rwensinga ahansi y'amapapa g'abakerubi.

⁷ Abakerubi bakaba bashanshurwire amapapa gabo eiguru y'Esanduku, kityo bagishwekerana n'emigamba y'okugishutuza.

⁸ Emigamba ekaba eli mirai, enshonga zayo zabonekaga kwema ahatakatifu omu maisho g'Ahatakatifu nyakabara, kyonkai tiyabonekaga oyemire heru. Ekyabaho kuhika mwaha.

⁹ Omu Sanduku hakaba hatalimu kantu shana embengo ibili ezo Musa yateleiremu Horebu, mbali Omukama yakoleire endagano n'Abaisiraeli orwo babaire nibaruga Misiri.

¹⁰ Abakuhani kabaturukire Ahatakatifu, ekichwi kibunda Rwensinga y'Omukama.

¹¹ Kityo tibashoboire kukora muruka gwabo aha rw'enshonga y'ekichwi ekyo, ekitinwa ky'Omukama kikaijura Rwensinga.

¹² Aho Solomoni agamba ati, “Omukama akataho eizoba aha iguru, kyonkai akahanga okwo alitura omu mwilima lindindi.

¹³ Leba, nkwombekeire Rwensinga y'ekitinwa, ebe buturo bwawe eirai lyona.”

Solomoni nahutubia Abaisiraeli

¹⁴ Omukama Solomoni aleba enteko yona ya Isiraeli eyemeleire, agiha omugisha.

¹⁵ Agamba ati, “Omukama Ruhanga wa Isiraeli asingizibwe, ayagobesheleza omu bushoborabwe ekyo yaraganisize tata Daudi ati,

¹⁶ ‘Kwema kiro ekyo naihire abantu bange ba Isiraeli Misiri, tinaronzire kigo kyona kyona omu ngada zona za Isiraeli kwombeka Rwensinga mbali ndafukamirwaga. Kyonkai nkaronda Daudi kutwara eihanga lyange lya Isiraeli.’

¹⁷ Tata Daudi yayendaga kwombekamu Rwensinga y'okufukamiramu Omukama Ruhanga wa Isiraeli.

¹⁸ Kyonkai Omukama wenene akamugambira ati, ‘N'orwo obaire nogonza kwombeka Rwensinga y'okunfukamiramu, ego obaire otekeleizege.

¹⁹ Kyonkai t'iwe orayombeka Rwensinga egyo, shana ndigyombekerwa mutabani wawe ow'olizara.’

²⁰ Mbwenu Omukama Ruhanga wa Isiraeli yagobesheleza endaganoye eyo yaragaine, kuba antaireho kusikira tata Daudi, kandi nshuntamire aha nketo y'obukama bwa Isiraeli nk'okwo Omukama yaragaine, mara namwombekera Rwensinga y'okumufukamiramu.

²¹ Kandi ntairemu omwanya gw'Esanduku y'Endagano y'Omukama, eyo yaragaine na batat'enkurw'ichwe orwo yabaihire Misiri.”

Enshara ya Solomoni

²² Solomoni ayemelera omu maisho ga ealutare y'Omukama, omu maisho g'enteko yona ya Isiraeli, aimukya emikono eiguru,

²³ agamba ati, “Waitu Mukama Ruhanga wa Isiraeli, taliho Ruhanga ondijo nka iwe omw'iguru owa kaleire anga okuzimu owa dondondo. Tochwa ndagano mara ogilira abairu bawe abakuhulira ekisha.

²⁴ Ogobesheleize ebyo waraganisize omwiru wawe Daudi. Ebyo wamugambiire okamugambira amazima kandi mbwenu wabigobesheleza omu bushobora bwawe.

²⁵ Aha rw'ekyo waitu Mukama Ruhanga wa Isiraeli, singa ogobesheleze ekyo waraganisize tata Daudi omwiru wawe oti, ‘Ndikubonera omuntu w'okubandara aha nketo ya Isiraeli, ekikuru baijukuru bawe belinde omu mirolere yabo bampulire nk'okwo iwe ompulira.’

²⁶ Aha rw'ekyo waitu Ruhanga wa Isiraeli singa ekyo waraganisize tata omwiru wawe kigobelere.

²⁷ “Nawe mazimakwo Ruhanga wakutura omu nsi? Leba n'eiguru elya kaleire tilishobora kukubumbatira; lero Rwensinga egi eyo nyombekire eshurweki?

²⁸ Kyonkai waitu Mukama Ruhanga wa Isiraeli, ohulire enshara y'omwiru wawe n'okutakakwe. Ohulire okutaka n'enshara y'omwiru wawe eyo alikushoma ahali iwe kir'eki.

²⁹ Singa kiro na mushana oyemere Rwensinga egi, omwanya ogwo wagambire kufukamirwamu. Ohulire enshara y'omwiru wawe k'arashomaga enshara ayolekeire Rwensinga egi.

³⁰ Singa ohulire okutaka kw'omwiru wawe n'okw'abantu bawe ba Isiraeli, kabarashomaga enshara bolekeire omwanya ogu. Singa oyeme omw'iguru omu businge bwawe, otuhulire; mara orw'orakatuhuliraga otuganyire.

³¹ “Omuntu k'arafakaliraga mutahiwe bakamunahiza, akaija akanahira ahali ealutare omuli Rwensinga egi,

³² singa oyeme omw'iguru oramure abairu bawe. Omufakare omubonabonyie okwo asaine, kandi ataina ntambara omutaishure, omurongore kuhonderana n'oburungibwe.

³³ “Orwo Abaisiraeli barasingwaga ababisha babo aha rw'okushangwa bakufakaliire, bakaija bakakutonganaho nibakushaba, nibakutakaho omuli Rwensinga egi,

³⁴ singa oyeme omw'iguru ogarulire Abaisiraeli obufu bwabo, oshube obagarure omu nsi eyo watungire baish'enkurubo.

³⁵ “K'olitanga enjura ekaburwa kugwa, kuba bakufakaliire, kabalishoma enshara bolekeire omwanya ogu nibakutonganaho, bakechuza obufu bwabo, k'oliba wababonabonyize,

³⁶ singa oyeme omw'iguru oganyire eihanga lyawe lya Isiraeli obufu bwabo, obegese kukora ebirungi ebyolekeire, ogwisize ensi yawe enjura, ensi eyo wasikisize eihanga lyawe.

³⁷ “K'ensi eliterwa eifa, anga endwara, anga omushana, ensi ekahya enyamwenge anga ekatabalirwa enzige anga ebihuka, anga k'ababisha babo balibabunda omu bigo byawe, kyaba kibundoki anga ndwaraki,

³⁸ enshara n'okutaka okw'omuntu wena wena anga eihanga lyona lyona lya Isiraeli lilitaka, buli omoi akemanya enakuze, k'aliimukya emikonoye agyolekeize Rwensinga egi,

³⁹ singa oyeme omw'iguru omu businge bwawe obahulire, obagarulire mara obajune. Iwe wenkai n'iwe omanya ebitekelezo bya buli muntu. Buli muntu omukolere okwo asaine;

⁴⁰ nirwo eihanga lyawe lilikuhulira ebiro byona ebyo balitura omu nsi egi eyo watungire batat'enkurw'ichwe.

⁴¹ “Kutyo n'omunyamahanga atali wa ihanga lyawe lya Isiraeli aliruga ensi y'aharai aha rw'eiranga lyawe

⁴² (aha rw'okuba balihulira eiranga lyawe n'obushobora bwawe n'ebikorwa byawe eby'amani), k'alija akashoma enshara ayolekeire Rwensinga egi,

⁴³ osinge oyeme omw'iguru omu businge bwawe omuhulire, omutunge byona eby'alikutakaho. Aho nirwo amahanga gona galikumanya mara gakakutina nk'eihanga lyawe lya Isiraeli; mara balimanya okwo Rwensinga egi eyo nyombekire, mwanya gw'okukufukamiramu.

⁴⁴ “Kandi abantu bawe kabaratabaliraga ababisha babo, omu ngeli yona yona eyo iwe orabatwekaga, bakashoma enshara bolekeire ekigo ekyo waronkire na Rwensinga eyo nkwombekeire,

⁴⁵ singa oyeme omw'iguru ohulire enshara yabo n'okutaka kwabo obahe okusinga ababisha babo.

⁴⁶ “Kabarakufakaliraga (aha rw'okuba tabaho muntu n'omoi atafakara), naiwe okabanigalira, okabanaga omu mikono y'ababisha bakabatwara endore omu nsi yabo, yaba harai anga haihi,

⁴⁷ kyonkai kabalyeshubaho bali omu nsi eyo batwetwemu endore, bakechuza, bakakutakira bemire omu nsi y'obuzahe nibagamba bati, ‘Tufakaire, tuhabire, twakora kubi.’

⁴⁸ Kabalyechuza n'omwoyo gwabo gwona, n'emitima yabo yona bakakushaba bolekeire owabo ensi eyo watungire baishebo, ekigo ekyo waronkire, na Rwensinga eyo nkwombekeire,

⁴⁹ osinge oyeme omw'iguru omu businge bwawe, ohulire enshara yabo n'okutaka kwabo mara obahe okusinga ababisha babo.

⁵⁰ Ogarulire abantu bawe abaliba bakufakaliire n'entambara zabo ezo baliba bakukoleire. Obagilire embabazi omu maisho g'abaliba babatwete endore, babone kubagilira ekisha.

⁵¹ (Kuba ihanga lyawe mara bantu bawe nyabwawe, abo waihire Misiri omu kyokezo ky'ekyoma.)

⁵² Singa obone okutaka kw'omwiru wawe, n'okutaka kw'eihanga lyawe lya Isiraeli, obahulire buli orwo barakushabaga;

⁵³ aha rw'okuba okabashorora omu mahanga gona g'ensi baba ihanga lyawe nyabwawe, nk'okwo wagambire omu kanwa ka Musa omwiru wawe orwo wabaire noihya batat'enkurw'ichwe Misiri, waitu Mukama Ruhanga.”

Solomoni nashabira enteko

⁵⁴ Ka Solomoni yamazire kushoma enshara aha Mukama n'okumutakira, aimuka aruga omu maisho ga ealutare y'Omukama, mbali yabaire atekire majwi, aimukize emikonoye eiguru.

⁵⁵ Ayemelera, aha omugisha enteko yona ya Isiraeli n'eiraka lihango ati,

⁵⁶ “Omukama ahaisilizibwe atungire eihangalye Isiraeli emilembe nk'okwo yaragaine. Taliho kibuzireho aha birungi byona ebyo yaragaine omu kanwa ka Musa omwiruwe.

⁵⁷ Omukama Ruhanga waitu aikare naichwe, nk'okwo yaikaire na batat'enkurw'ichwe, atatusigaho anga atatunaga.

⁵⁸ Atuhe okumuhulira, tukore eby'alikwenda byona, tukwate emihangoye n'ebiragirobye n'emigenzoye ebyo yahangiire batat'enkurw'ichwe.

⁵⁹ Ebigambo byange ebyo nataka omu maisho g'Omukama Ruhanga wairu abiijuke kiro na mushana. Asinge aganyire omwiruwe n'eihangalye lya Isiraeli kuhonderana n'ebyetago byabo bya buli kiro.

⁶⁰ Amahanga gona gamanye okwo Omukama n'iwe Ruhanga, taliho ondijo.

⁶¹ Aha rw'ekyo mube besigwa aha Mukama Ruhanga waitu, mwekomye ebiragirobye, mukwate emihangoye nk'okwo mulikugira na mbwenu.”

Ebitambo bya Solomoni omuli Rwensinga

⁶² Omukama Solomoni n'Abaisiraeli bona abo yabaire ainabo batambira Omukama ekitambo.

⁶³ Solomoni atambira Omukama ebitambo by'emilembe, ente 22,000 n'entama 120,000. Nikwo Omukama n'Abaisiraeli bahaire batyo Rwensinga omugisha.

⁶⁴ Kiro kyonene ekyo, Omukama aha endaragati ya nyarubuga eli omu maisho ga Rwensinga y'Omukama omugisha, kuba aho niho yatambiliire ekitambo ky'okwokibwa n'ekitambo ky'emyaka, n'ebishaju by'ebitambo by'emilembe; aha rw'okuba ealutare y'omulinga eyabaire eli omu mabona g'Omukama ekaba eli nke muno kutashobora kutambirwaho bitambo bya kwokibwa n'ebitambo by'emyaka n'ebishaju by'ebitambo by'emilembe.

⁶⁵ Kityo Solomoni na Isiraeli yona, enteko mpango kwema aha butahiro bwa Hamati kugoba aha Kaiga ka Misiri bakora obugenyi ebiro mushanju omu mabona g'Omukama waitu kiro na mushana.

⁶⁶ Aha kiro kya munana Omukama Solomoni ataishura enteko, nayo emurazage, bashuba omuka nibashemelerwa nibashanduka omu mitima aha rw'ebirungi eby'Omukama Ruhanga yakoleire Daudi omwiruwe, na Isiraeli eihangalye.