1 Abakama 6 - Ebibulia 2001

Solomoni nayombeka Rwensinga

¹ Omu mwaka gwa 480 kwema Abaisiraeli barugire Misiri, omu mwaka gwa kanai Solomoni atwete Isiraeli, omu mwezi gwa Zivu, nigwo mwezi gwa kabili, atandika kwombeka Rwensinga y'Omukama.

² Rwensinga egyo eyo Solomoni yayombekeire Omukama ekaba eina oburai bw'emita 27, obukika bw'emita 9 n'obwemi bw'emita 13 1/2.

³ Ekishasi kya Rwensinga kikaba kina oburai bw'emita 9 obwiganiraine n'obukika bwa Rwensinga, obuhango bw'orukuta rwayo 4 1/2.

⁴ Rwensinga yagitamu n'obumore.

⁵ Kandi enkuta z'aheru obuzingora akazombekaho ebiyumba, ekishasi kitabulimu.

⁶ Buli kiyumba eky'ahansi kikaba kina obukika bw'emita 2 n'okushagamu kake. Eky'egorofa ya mbere kikaba kina emita nka 3, n'eky'egorofa ya kabili kina obukika bw'emita 3. Enkuta za Rwensinga akazihanguhya ahansi, yagenda nazikeyesa hatabaho kyetago kya kushobekamu boriti.

⁷ Rwensinga bakagyombekesa amabare agabaire gatekatekirwe aha kirombe. Kityo orwo yabaire neyombekwa, tiyakuhuliirwe nyondo anga ndyamiti, anga kikwato kyona kyona kya kyoma.

⁸ Obutahiro bw'ebiyumba by'ahansi bukaba buli omu rubaju rwa kasi ya Rwensinga. Omuntu kwija kutaha omu gorofa ya mbere yarabaga aha matembero, aruga omu ya mbere ataha omu ya kabili.

⁹ Nikwo yayombekire atyo Rwensinga akagimara. Eiguru akashakaza eboriti n'embaho z'emielezi.

¹⁰ Ebiyumba ebyo ebizingoire Rwensinga yona, yabyombekera orukuta, buli gorofa n'ebiyumba by'ahansi ekaba eina obwemi bw'emita 2 n'okushagamu kake. Kwija kubikwatanisa ahali Rwensinga akakoza emiti y'emielezi.

¹¹ Omukama agambira Solomoni ati,

¹² “Aha bikwete Rwensinga egi ey'olikwombeka, k'orayekomya ebiragiro byange, okahulira emigenzo yange, okakwata emihango yange okagihikya, ndagobesheleza ekigambo kyange ekyo naraganisize sho Daudi.

¹³ Ndisingira omu Baisiraeli abantu bange, tindibanagirana.”

¹⁴ Aho Solomoni ayombeka Rwensinga agimara.

¹⁵ Enkuta z'omunda azishwekesa embaho z'emielezi kwema aha sakafu kukwata aha boriti z'orushwi. Omunda azishwekesa embaho, kandi esakafu agishwekesa embaho z'emielezi.

¹⁶ Omuli Rwensinga enyuma ayombekamu orukuta rw'embaho z'emielezi kwema aha sakafu kugoba aha boriti. Ekichweka ekyo ky'enyuma kyetwa Ahatakatifu nyakabara.

¹⁷ Rwensinga ekichweka ekili omu maisho g'Ahatakatifu nyakabara, kikaba kina oburai bw'emita 18.

¹⁸ Embaho z'emielezi ezabaire zili Rwensinga omunda bakaba bazichongireho obushusi n'enyakyo. Ekaba eli mielezi yonkai, eibare tilyabonekaga.

¹⁹ Ahatakatifu aha kweru akombekaho ekiyumba ky'okutekamu Esanduku y'Endagano y'Omukama.

²⁰ Kikaba kina oburai bw'emita mwenda, obukika bw'emita 9, n'obwemi bw'emita 9. Akakisiga ezahabu enchenkure. Yashuba yatamu ealutare y'emielezi.

²¹ Rwensinga omunda Solomoni akagisiga ezahabu enchenkure. Ahatakatifu nyakabara n'obwikaro bw'abantu yarabyamu eminyororo y'ezahabu.

²² Rwensinga yona yagisiga ezahabu. Kityo na ealutare yona eyabaire eli y'Ahatakatifu muno nayo agisiga ezahabu.

²³ Yakora abakerubi babili b'embaho z'emizeituni yabata Ahatakatifu nyakabara. Obwemi bwa buli mukerubi bukaba nibugya omu mita 4 1/2.

²⁴ Eipapa limoi ly'omukerubi likaba nilishagamu emita 2, n'eipapa lya kabili kutyo. Kwema aha pembe y'eipapa eli kugya aha nshonda y'eipapa elindi zikaba nizigya omu mita 4 1/2.

²⁵ Amapapa g'omukerubi wa kabili nago gakaba gaina oburai bw'emita 4 1/2. Abakerubi bombili bakaba nibaiganirana, nibashushana.

²⁶ Obwemi b'womukerubi omoi bukaba buli bw'emita nka 4 1/2, n'obw'ondijo kwakwo.

²⁷ Abakerubi abo yabata Ahatakatifu nyakabara. Amapapa gabo gakaba gashanshurwire, eipapa ly'omoi lyakwata aha rukuta oru, n'eipapa ly'omukerubi ondijo lyakwata aha rukuta orundi. Amapapa gabo agandi gateranira omugati ya Rwensinga;

²⁸ nabo babasiiga ezahabu.

²⁹ Enkuta zona za Rwensinga omunda n'aheru yazichongaho abakerubi n'emikindo n'enyakyo.

³⁰ Esakafu yona yagisiga ezahabu, n'omu biyumba by'aheru n'eby'omunda.

³¹ Yataho enyigi z'emizeituni omu butahiro bw'Ahatakatifu nyakabara. Enyigi ezo zikaba zina epembe itanu.

³² Eibili ez'emizeituni yazitonaho abakerubi n'emikindo n'enyakyo, yazisiiga ezahabu. Yasiiga ezahabu aha bakerubi n'aha mikindo.

³³ Kwija kutaha omu bwikaro bw'abantu yatamu emizilingiti y'emizeituni ey'epembe inai,

³⁴ n'enyigi ibili z'emiberoshi ezina ebipande bibili bya buli rwigi bikaba nibizingwa n'ebipande ebibili eby'orwigi orundi.

³⁵ Yazichongaho abakerubi n'emikindo n'enyakyo, yabisiga ezahabu.

³⁶ Orukuta rw'okuzingora nyakabuga ey'omunda yarwombekesa enjuru ishatu z'amabare agabaizire, n'orujuru rumoi rw'enyomyo z'emielezi.

³⁷ Ekitebe kya Rwensinga y'Omukama kikombekwa omu mwezi gwa Zivu omu mwaka gwa kanai.

³⁸ Omu mwaka gwa ikumi na gumoi omu mwezi gwa Buli, nigwo mwezi gwa munana, Rwensinga ekaba yahoire buli kantu, nk'okwo yabaire etegekirwe. Akagyombeka emyaka mushanju.