1 Abakama 5 - Ebibulia 2001

Solomoni nayetekateka kwombeka Rwensinga

¹ Hiramu Omukama Tiro kayahuliire okwo Solomoni bamukozire amajuta akaba Mukama akasikira ishe, kuba Hiramu ogwo yagonzaga Daudi, amutumaho ababakabe.

² Ahanyuma Solomoni atuma ahali Hiramu ati,

³ “Nomanya okwo tata Daudi atashoboire kwombekera Mukama Ruhangawe Rwensinga aha rw'enshonga y'endashana ezabaire zimuzingoire kuhika orwo Omukama Ruhanga yamunagire ababishabe abo omu mikono akabasinga.

⁴ Kyonkai mbwenu Omukama Ruhanga wange antungire emilembe buli rubaju. Taliyo babisha anga biyengo.

⁵ Aha rw'ekyo nindenga kwombekera Omukama Ruhanga wange Rwensinga nk'okwo Omukama yahangiire tata Daudi, ati, ‘Omwana wawe owo nditeka aha nketo yawe akakusikira n'iwe alinyombekera Rwensinga.’

⁶ Mpaho oragire bantemere emyelezi ya Lebanoni. Abairu bange barakora n'abawe, kandi abairu bawe ndabahera aha mpera ey'orataho, enshonga nomanya okwo omu bantu bange ntainamu balikumanya kushara mbaho nk'Abasidoni.”

⁷ Hiramu kayahuliire ebigambo bya Solomoni ashemelerwa muno; agamba ati, “Kir'eki Omukama asingizibwe, ayahaire Daudi omwana aina obumanyi kutwara eihanga lihango eli.”

⁸ Atuma ahali Solomoni ati, “Amakuru ago ag'ontumireho ngahuliire, ninyikiliza kukora byona nk'okw'olikwetaga, kutema emielezi n'emivure.

⁹ Abairu bange baragihya Lebanoni bagisongore aha nyanja. Ndagikomejanyia, ngyeleze aha nyanja egobe mbali oragamba. Aho niho ndagikomorolera naiwe okagitora. Inye ekyo ndikwenda iwe orampa ebyakulya by'okuliisa abange.”

¹⁰ Aho Hiramu aha Solomoni emiti y'emielezi n'emivure nk'okwo yabaire nayetaga.

¹¹ Solomoni ogwo aha Hiramu engano amapipa 20,000 g'okulisa aba wenene n'amapipa 20 g'amajuta agarungi muno. Yamushashuraga atyo buli mwaka.

¹² Omukama atunga Solomoni obumanyi nk'okwo yamuraganisize. Hiramu na Solomoni bagira emilembe. Bombili bakora hamoi endagano.

¹³ Omukama Solomoni akajaraba abantu ab'okuta nibaihyana omuli Isiraeli yona. Abajarabirwe abo bakaba bali bantu 30,000.

¹⁴ Buli mwezi yatwekaga Lebanoni abantu 10,000 kwihyangana n'abandi. Omwezi gumoi bagumaraga Lebanoni, n'emyezi ebili bagimaraga owabo. Omunyampara w'abajarabwa akaba ali Adoniramu.

¹⁵ Solomoni akaba aina abagata enkumi nshanju n'ababaizi b'amabaare omu mabanga 80,000,

¹⁶ otakabazire banyamparabe 3,300 abalebeleraga abajarabwa abo.

¹⁷ Nk'okwo Omukama yaragiire bakashokora amabare gahango agalengize ag'eiguzi kwombekesa ekitebe kya Rwensinga.

¹⁸ Kityo abombeki ba Solomoni n'aba Hiramu n'abarugire Gebali, bakabaija amabare, batekateka n'emiti kwombeka Rwensinga.