1 Abakama 4 - Ebibulia 2001

Abami omu makiro ga Solomoni

¹ Omukama Solomoni akaba ali Mukama wa Isiraeli yona.

² Aba nibo bami enyanwanwa abo yabaire ainabo: Azaria eya Zadoki akaba ali mukuhani.

³ Elihorefu na Ahiya batabani ba Shisha, bakaba bali bahandiki. Yehoshafati eya Ahiludi, muhandiki w'amakuru ga buli kiro.

⁴ Benaya eya Yehoyada, mukuru w'eihe. Zadoki na Abiatari bakaba bali bakuhani.

⁵ Azaria eya Natani, akaba ali gavana mukuru. Zabudi eya Natani, akaba ali mukuhani mara nganzi y'Omukama.

⁶ Ahishari n'iwe yalebeleraga ekikaare, na Adoniramu eya Abuda, yakozaga emilimo y'ensika.

⁷ Solomoni akaba aina abagavana 12 omuli Isiraeli yona, bashombokezaga Omukama n'omutungogwe ebyakulya. Buli gavana yaragirwaga kugira ekyakulya omwezi gumoi buli mwaka.

⁸ Aga nigo mabara gabo: Benihuri yatwaraga amabanga ga Efuraimu.

⁹ Bendekeri yatwaraga Makasi, Shaalibimu, Betishemeshi na Elonibetihanani.

¹⁰ Benihesedi yatwaraga Aruboti na Soko ekaba eliye n'ensi yona ya Heferi.

¹¹ Benabinadabu yatwaraga Nefatidori yona, (akaba ashweire Tafati muhara wa Solomoni).

¹² Baana eya Ahiludi yatwaraga Taanaki, Megido na Betisheani yona eyataine Zaretani, eifo ya Yezereeli; kandi ayema Betisheani agoba Abelimehola na Yokimeamu.

¹³ Bengeberi yatwaraga Ramotigileadi, n'ebyaro bya Yairi eya Manase omuli Gileadi, bikaba bilibye, hamoi n'omukoa gwa Arigobu eya Bashani; ebigo ebihango 60 eby'eboma n'emihingo y'omulinga.

¹⁴ Ahinadabu eya Ido yatwaraga Mahanaimu.

¹⁵ Ahimaasi yatwaraga Nafutali (akaba ashweire Basemati muhara wa Solomoni).

¹⁶ Baana eya Hushai yatwaraga Asheri na Bealoti;

¹⁷ Yehoshafati eya Palua yatwaraga Isakari.

¹⁸ Shimei eya Ela yatwaraga Benjamini.

¹⁹ Geberi eya Uri yatwaraga ensi ya Gileadi, ensi ya Sihoni Omukama w'Abaamori n'eya Ogi Omukama wa Bashani. Kandi omu nsi ya Yuda hakaba halimu gavana omoi.

Obukama bwa Solomoni nibugoshoka

²⁰ Abayuda n'Abaisiraeli bakaba bali bangi nk'omushenye gw'omwaro, nibalya, nibanywa, nibashemelerwa.

²¹ Solomoni akatwara engoma zona kwema Efurati kugoba Filisitia na Misiri. Bamuleteraga omushoro, mara bakamukolera oburorabwe bwona.

²² Ekiro kimoi Solomoni yayetagaga amapipa 30 g'ensano n'amapipa 60 g'engano,

²³ enumi 10 n'ente 20 ezigomokire, entama 100 otatairemu njaza n'engabi n'enyemera n'enkoko ezishaire.

²⁴ Aha rw'okuba akaba natwara omukoa gw'obugwaizoba bwa Efurati, kwema Tifusa kugoba Gaza. Yatwaraga abakamabona obugwa izoba bwa Efurati. Yagiraga milembe embaju zona ezimwataine.

²⁵ Abayuda n'Abaisiraeli batura buhoro emilembe, buli muntu ashuntama ahansi y'emizabibuye n'emitiniye, kwema Dani nangu kugoba Beerisheba oburora bwa Solomoni bwona.

²⁶ Solomoni akaba aina ebiraro by'efarasi z'amagalige enkumi 40,000. Akaba aina ab'efarasi 12,000.

²⁷ Abakuru abo bagabiraga Omukama Solomoni n'omutungogwe abalyaga aha kiihurokye. Buli mukuru yagiraga omwezigwe. Taliho kyaburagaho.

²⁸ Baletaga eshayiri n'obunyasi bw'efarasi n'efarasi ezilikwiruka muno. Babileta mbali byayetagwaga, buli muntu omu zamuye.

²⁹ Ruhanga atunga Solomoni obumanyi n'obushobokerwa obushobeize. Amutunga amagezi gangi agatakulengwa nk'omushenye gw'omwaro.

³⁰ Kityo obumanyibwe bukakira obw'abantu bona b'oburugaizoba n'obwa Misiri.

³¹ Ahkaba ali mumanyi kukira abantu bona, yakira na Etani Omwezirahi, na Hemani, Kalikoli na Darida batabani ba Maholi, eirangalye lyagoba amahanga gona agamwataine.

³² Kandi akachwa emigani 3,000. Ebizinabye bikaba bili 1,500.

³³ Emiti yagimanyaga bunyanungi, kwema aha mwelezi gwa Lebanoni kugoba ahali hisopo emera aha rukuta. Kandi n'enyamaishwa, n'ebinyonyi n'ebilikwekurura n'enfuru nabyo yabimanyaga bunyanungi.

³⁴ Abantu baruga omu mahanga gona kuhulira obumanyi bwa Solomoni. Bakaba baruga n'omu ngoma zona z'ensi, ababaire bahuliire obumanyibwe.