1 Abakama 3 - Ebibulia 2001

Solomoni nashwera muhara wa Farao

¹ Solomoni ashwera muhara wa Farao Omukama wa Misiri, abone kushobokeranganwa kurungi na Farao wenene ogwo. Amutahya omu kigo kya Daudi kulemwa kuhika orwo yamazire kwombeka ekikaarekye na Rwensinga y'Omukama n'eboma eyo yazingoize Yerusalemu.

² Abantu batambaga ebitambo aha bubanga, ahakuba hakaba hatakombekirwe Rwensinga y'okutambiliramu Omukama ekitambo.

³ Solomoni agonza Omukama, ayekomya ebiragiro ebyo Daudi ishe yamusigiire; aihyaho okutamba ebitambo n'okwoteza obunuma aha bubanga.

⁴ Agenda Gibeoni kutambirayo ebitambo enshonga kuli niho habaire hali ealutare nkuru muno. Eirai ealutare egyo akaba yagitambiireho ebitambo 1,000 by'okwokya.

Solomoni nashaba obumanyi

⁵ Ahali Gibeoni, Omukama Ruhanga ahabukira Solomoni omu kiroto omu kiro. Amugambira ati, “Gamba, nkuheki?”

⁶ Solomoni agamba ati, “Okagilira tata Daudi omwiru wawe ekisha, aha rw'okuba akaba mwesigwa, yaba murungi mara nyakatetere ahali iwe, nikwo naiwe kuguma omugiliire ekisha kingi okamutunga omwana w'omwojo akashuntama aha nketoye.

⁷ Mbwenu waitu Mukama Ruhanga wange, inye omwiru wawe ompindwire Mukama aha mwanya gwa tata Daudi, n'orwo nkyali mwana muto mara tinkamanyire mitwalire.

⁸ Nanye ndi omoiho omw'ihanga lyawe elyo waronkire, eihanga lihango elitakubarwa aha rw'obungi.

⁹ Aha rw'ekyo ontunge obumanyi ntware abantu bawe, manye ebirungi n'ebibi, kuba n'ohai ayakushobora kutwara eihanga lyawe elihango nk'eli?”

¹⁰ Omukama Ruhanga ashemelerwa kubona Solomoni yashaba obumanyi.

¹¹ Amugambira ati, “N'orwo washaba obumanyi kandi tiwashaba burora burai, anga itunga, anga kwita babisha bawe, washaba okushobokerwa obone kumanya ekili kirungi,

¹² leba, mbwenu nakuha nk'okwo wagamba. Nakuha omutima gw'obumanyi n'obushobokerwa obwo omuntu wena wena atakagiraga kandi ataligira.

¹³ N'ebyotashaba nabyo nabikuha, byombili eitunga n'ekitinwa. Oburora bwawe bwona taliho Mukama alikwelengaho.

¹⁴ Kandi k'olikora ebyo ndikwenda, okahikya ebiragiro byange n'emihango yange nk'okwo sho Daudi yagizire, aho ndikwongeraho oburora.”

¹⁵ Aho Solomoni asisiimuka, ashanga okwo kyaba kili kiroto. Aija Yerusalemu ayemelera omu maisho g'Esanduku y'Endagano y'Omukama, atamba ebitambo by'okwokya, n'ebitambo by'emilembe. Akolera abaramatabe bona obugenyi.

Solomoni naramura abakazi babili

¹⁶ Omu biro ebyo abamalaya babili baija aha Mukama bamwemelera omu maisho.

¹⁷ Omukazi omoi agamba ati, “Waitu, Mukama wange, omukazi ogu nanye tutura nju emoi. Kanazaire omwana nawe ogu omu nju akaba alimu.

¹⁸ Aha kiro kya kashatu nzaire, nawe yazara. Tukaba tuli chwenkai, omu nju hakaba hatalimu muntu ondijo shana ichwe babili.

¹⁹ Kir'eki omu kiro akatabani kafa kuba akabyamiire.

²⁰ Kayaimuka akwata katabani kange akanyihya omu rubaju, inye omuzana wawe nagiire, akebyamika omu kifuba. Kandi akatabani akafa akambyamika omu kifuba.

²¹ Bwankya ninyimuka kwonkya omwana wange, nshanga afire. Kweta omwana nshanga atali mwana wange owo nazaire.”

²² Kyonkai omukazi ogu agamba ati, “Chei, omwana alikurora n'iwe wange, afire n'iwe wawe.” Owa mbere agamba ati, “Chei! Afire wawe, omwana alikurora wange.” Nikwo bagambire batyo omu maisho g'Omukama.

²³ Aho Omukama agamba ati, “Omoi nagamba ati, ‘Omwana alikurora n'iwe wange, owawe afire,’ n'ondijo nagamba ati, ‘Chei, kyonkai omwana wawe n'iwe afire, n'omwana owange n'iwe alikurora.’ ”

²⁴ Omukama ashuba ati, “Ndetera embanda.” Bagimuletera.

²⁵ Ati, “Yasa omwana alikurora, orubaju muruhe omoi n'orundi ondijo.”

²⁶ Aho nyina mwana ayabaire narora, aganyibwa omwanawe, agambira Omukama ati, “Waitu, Mukama wange, omwana alikurora mumuhe, otamwita.” Kyonkai ondijo agamba ati, “Ataba wange anga ataba wawe, bamwasemu kabili.”

²⁷ Aho Omukama ahorora ati, “Omwana alikurora muhe omukazi owa mbere, mutamwita, ogu n'iwe nyina.”

²⁸ Isiraeli yona ehulira eiramu ely'Omukama yaramwire. Bamutangalira kuba bakamanya okwo obumanyi bw'Omukama Ruhanga mazima bumulimu.