1 Abakama 22 - Ebibulia 2001

Omurangi Mikaya natatira Ahabu

¹ Siria na Isiraeli bakamara emyaka eshatu batarashana.

² Kyonkai omu mwaka gwa kashatu Yehoshafati Omukama wa Yuda agya kubona Ahabu owa Isiraeli.

³ Omukama Ahabu abaza abaramatabe ati, “Mbere nimumanya okwo Ramotigileadi eba yaitu, mara ichwe twayesiza, titwagyaka Mukama wa Siria?”

⁴ Ashuba agambira Yehoshafati ati, “Tugende hamoi Ramotigileadi omu ndashana.” Yehoshafati amuhorora ati, “Inye naiwe tuli bamoi, abantu bange nibo bawe, n'efarasi zange nizo zawe.”

⁵ Yehoshafati ashuba agambira Ahabu ati, “Obanze oraguze omanye Omukama nagambaki.”

⁶ Ahabu ayeta abarangi nka. Ababaza ati, “Ntabalire Ramotigileadi anga ndekeyo?” Bamushubamu bati, “Ogitabalire, aha rw'okuba Omukama naija kugikunaga omu mikono.”

⁷ Kyonkai Yehoshafati abaza ati, “Hanu aha taliho murangi ondijo w'Omukama owo twakubaza?”

⁸ Ahabu amugarukamu ati, “Hakyahaliyo ondijo, Mikaya eya Imula, owo twakurabaho kubaza Omukama; kyonkai inye munoba, enshonga tandangaho makuru garungi shana agabi.” Yehoshafati agamba ati, “Leka kugamba otyo, Mukama.”

⁹ Aho Ahabu ayeta omuramata omoi amugambira ati, “Mikaya eya Imula mulete bwangu.”

¹⁰ Omu kanya ako Ahabu Omukama wa Isiraeli na Yehoshafati Omukama wa Yuda bakaba bambaire enyambarwa zabo, basingiire aha nketo zabo aha kyano omu kishasi ky'ekihigi kya Samaria, abarangi bona nibaranga omu maisho gabo.

¹¹ Zedekia eya Kenana ahesha amahembe g'ekyoma, agamba ati, “Omukama Ruhanga nagamba ati, ‘Amahembe aga nigo orasindikisa Abasiria bakalemwa bakasilika.’ ”

¹² Aho abarangi bona nabo baranga batyo, bati, “Otabalire Ramotigileadi, noija kusinga; Omukama ekigo naija kukikunaga omu mikono.”

¹³ Entumwa eyagenzire kweta Mikaya, emugambira eti, “Leba abarangi bona nibagamba kumoi ebirashemeleza Omukama Ahabu. Naiwe ogambe nk'okwo balikugamba, ogambe ebiramushemeleza.”

¹⁴ Kyonkai Mikaya agamba ati, “Obuso bw'Omukama, ekyo Omukama arangambira nikyo ndagamba.”

¹⁵ Kayabaire yamugobire, Omukama Ahabu abaza ati, “Mikaya, tugende Ramotigileadi kurashana anga tulekeyo?” Amuhorora ati, “Otabare, noija kusinga; Omukama ekigo naija kukikunaga omu mikono.”

¹⁶ Kyonkai Ahabu agira ati, “Nkunahize kangahai omw'ibara ly'Omukama kuta nongambira amazima gonkai?”

¹⁷ Nirwo Mikaya yagambire ati, “Mboine Abaisiraeli bona benaganagire omu mabanga nk'entaama ezitaina mushumba; Omukama Ruhanga agambire ati, ‘Aba tibaina Mukama, buli muntu agaruke omwe n'emilembe.’ ”

¹⁸ Nikwo Ahabu kugambira Yehoshafati ati, “Tinkugambiire nti, Talikwija kundangaho birungi, shana ebibi?”

¹⁹ Aho Mikaya agamba ati, “Aha rw'ekyo hulira ekyo Omukama alikugamba: Nkabona Omukama Ruhanga asingiire aha nketoye, n'amahe gona g'omw'iguru gamwemeleire aha rubaju aha mukono gwa bulyo n'aha gwa bumosho.

²⁰ Omukama abaza ati, ‘Nohai alikwija kulemba Ahabu kugya Ramotigileadi kugwayo?’ Ogu ahorora eki, ogu ahorora kili.

²¹ Aho omuzimu gwija gwemelera omu mabona g'Omukama gugamba guti, ‘Inye ndamulemba.’

²² Omukama agubaza ati, ‘Ngeliki?’ Gugamba guti, ‘Ndagenda mbe muzimu gw'ebishuba omu kanwa k'abarangibe bona.’ Omukama agugambira ati, ‘Omulembe, mara orashobora; ogende okore otyo.’

²³ Mbwenu aha rw'ekyo leba, Omukama omu kanwa k'abarangi bawe aba bona yatairemu omuzimu gw'ebishuba; yagambire okwo oraterwa enaku.”

²⁴ Niho honkai Zedekia eya Kenana ailira haihi atera Mikaya oruhi, nagamba ati, “Mwoyo w'Omukama yansigaho atai kwija kugambira iwe?”

²⁵ Mikaya amuhorora ati, “Kiro ekyo orashenshera enjuruguru kwesheleka, orabona.”

²⁶ Ahabu agamba ati, “Kwata Mikaya, mumugarure owa Amoni gavana w'ekigo n'omurangira Yoashi,

²⁷ mubagambire muti, ‘Omukama Ahabu nagamba ati, Ogu mumufunge, mutamugabira kindi shana akakulya kake n'amaizi kuhika orwo ndagaruka eli milembe.’ ”

²⁸ Aho Mikaya agamba ati, “K'oragaruka eli milembe Omukama araba atagambire muli inye.” Mikaya ashuba agamba ati, “Inywe bantu inywena mubihulire ebyo.”

Okufa kwa Ahabu

²⁹ Ahabu Omukama wa Isiraeli na Yehoshafati Omukama wa Yuda batabalira Ramotigileadi.

³⁰ Ahabu agambira Yeshoshafati ati, “Ninyija kwehindura ngye omu ndashana, kyonkai iwe oyambare enyambarwa zawe.” Ayehindura agenda omu ndashana.

³¹ Omukama Benihadadi owa Siria akaba aragiire abakuru 32 b'amagalige ati, “Na muhango na muke mutarashana na Yehoshafati, shana murashane na Ahabu Omukama wa Isiraeli wenkai.”

³² Abakuru b'amagali kababoine Yehoshafati bagamba bati, “Ogu rwona n'iwe Mukama wa Isiraeli.” Kityo bamuyokera bamutera, Yehoshafati akunga.

³³ Abakuru b'amagali kubona okwo atali Mukama wa Isiraeli, baleka kumubinga.

³⁴ Nawe omushaija omoi aleega obuta afa kurasha, achumita Ahabu Omukama wa Isiraeli omw'iteraniro ly'ebijwarobye by'endashana n'engabo y'omu kifuba. Ahabu agambira omubugi w'egaliye ati, “Hinduka onyihye omu ndashana kuba nahutara.”

³⁵ Kir'ekyo endashana ekanya muno, Omukama ayemelera ayeyegekire omu galiye alebire Abasiria; kalyatobeire yafa. Obwamba obwajwire mbali yahutaire bugelera omu gali.

³⁶ Kalyabaire lyaija kutobera eihe balitaho omuku bati, “Buli muntu ashube omu kigokye, buli muntu omu nsiye.”

³⁷ Aho Ahabu atahya, bamuleta Samaria, baba nimwo bamubyalira.

³⁸ Egali bagyogeza aha rutunga rwa Samaria, embwa ziramba obwambabwe, n'abamalaya bogerana obwamba obwo omu maizi nk'okwo Omukama Ruhanga yabaire agambire.

³⁹ Ebindi byona ebyo Ahabu yakozire, n'enju y'emino y'enjoju eyo yayombekire, n'ebigo byona ebyo yayombekire, bihandikire omu Kitabo ky'Amakuru g'Abakama ba Isiraeli.

⁴⁰ Nikwo Ahabu yatahize atyo; Ahazia omutabani agya aha ngoma amusikira.

Yehoshafati Omukama owa Yuda

⁴¹ Yehoshafati eya Asa akabanza kutwara Yuda omu mwaka gwa kanai Ahabu Omukama wa Isiraeli agiire aha ngoma.

⁴² Akagya aha ngoma aina emyaka 35. Akatwalira Yerusalemu emyaka 25. Nyina eibaralye yayetwaga Azuba muhara wa Shilihi.

⁴³ Akarondora ishe, Asa, omuli byona. Akabikwata, yakora ebyabaire nibishemelera Omukama; shana obuju bw'aha mabanga nibwo atakambwire; n'abantu bagendelera kutamba ebitambo n'okwoteza obunuma omu buju obwo.

⁴⁴ Yehoshafati yakora endagano y'emilembe n'Omukama wa Isiraeli.

⁴⁵ Ebindi byona ebyo Yehoshafati yakozire, n'amanige ago yayolekire, n'okwo yarashaine, bihandikire omu Kitabo ky'Amakuru g'Abakama ba Yuda.

⁴⁶ Kandi abashaija abayekozaga emize y'obusiyaga ababaire basigaireho omu makiro ga ishe, Asa, akabachwa omu nsiye.

⁴⁷ Omuli Edomu hakaba hatalimu Mukama, shana omulinzi w'engoma.

⁴⁸ Yehoshafati yakora emeli nk'ez'enyanja ya Tarishishi kuta nizigya Ofiri kuleta ezahabu, kyonkai tizagiireyo, ahaokuba zikasinjagulikira Eziongeberi.

⁴⁹ Aho Ahazia eya Ahabu agambira Yehoshafati ati, “Abairu bange basabare n'abawe omu meli,” kyonkai Yehoshafati ayanga.

⁵⁰ Ahanyuma Yehoshafati atahya, bamubyalira omu magashani ga baishe omu Kigo kya Daudi, ishe. Yehoramu omutabani amusikira, atwara.

Ahazia Omukama wa Isiraeli

⁵¹ Ahazia eya Ahabu akabanza kutwara Isiraeli ayemire Samaria omu mwaka gwa 17 Yehoshafati Omukama wa Isiraeli agiire aha ngoma. Akatwara Isiraeli emyaka ebili.

⁵² Akarondora ishe na nyina yagokera Omukama Ruhanga, yarondora na Yeroboamu eya Nebati, ayafakaize Isiraeli.

⁵³ Yakolera Baali, yamufukamira, yanigaza Omukama Ruhanga wa Isiraeli, aha rw'okurondora ishe omuli buli kantu.