1 Abakama 2 - Ebibulia 2001

Daudi naragira Solomoni ely'enzindo

¹ Ka Daudi akanyake k'okufa kagobire haihi, aragira omutabani Solomoni ati,

² “Inye ndi haihi kufa nk'abantu bona. Obe manzi, okwate mashaija.

³ Ohikye byona eby'Omukama Ruhanga wawe alikukuragira. Okorega eby'alikwenda. Okwate ebiragirobye, emihangoye, emigenzoye n'emikuye; nk'okwo bihandikire omu Mateka ga Musa; nirwo oligoshoka omuli byona eby'orakoraga na hona mbali oragyaga.

⁴ Omukama abone kuhamisa ekigambokye ekyo yangambiireho ati, ‘Batabani bawe kabalyelinda, bakaba besigwa ahali inye n'omutima gwabo gwona, n'omwoyo gwabo gwona, toliburwa muntu wa kushuntama aha nketo ya Isiraeli.’

⁵ “Kandi nomanya n'ekyo Yoabu mutabani wa Zeruya yakozire abakuru babili b'amahe ga Isiraeli, Abuneri eya Neri na Amasa eya Yetheri abo yaisire endashana yahoire, nayeholera ababaire baisirwe omu ndashana. Yaita abataina ntambara; nanye yankomaho entambara y'okwita banyakatetere.

⁶ Aha rw'ekyo okore nk'okwo obumanyi bwawe buli, otalimuleka kukura akefera.

⁷ Kyonkai batabani ba Barizilai Omugileadi obakolerege. Na bonene balye aha kiihuro kyawe, bakankorage orwo nabaire ninyiruka murumuna wawe Abusalomu.

⁸ “Kandi oinayo na Shimei eya Gera, Omubenjamini wa Bahurimu, ayankeenire kubi kiro ekyo nabaire ningya Mahanaimu. Kyonkai kayaizire kunchwekera ahali Yordani, nkamunahilira obuso bw'Omukama nti, ‘Tinkwite.’

⁹ Aha rw'ekyo nawe otamuleka nk'ataina ntambara, aha rw'okuba oli muntu w'obumanyi, oramanya ekyo osaine kumukolera. Ataligya Sheoli otamwisire n'orwo aliba yagurusire.”

Daudi nafa

¹⁰ Aho Daudi atahya, bamubyalira omu kigo kya Daudi.

¹¹ Ebiro ebyo Daudi yatwete Isiraeli myaka 40. Emyaka mushanju yagitwalira Heburoni, n'emyaka 33 yagitwalira Yerusalemu.

¹² Solomoni abandara aha nketo ya Daudi ishe, n'obukamabwe buhama.

Solomoni naita Adoniya, Yoabu na Shimei

¹³ Aho Adoniya mutabani wa Hagiti aija ahali Batisheba nyina Solomoni. Batisheba amubaza ati, “Waija milembe?” Amuhorora ati, “Milembe.”

¹⁴ Aho agamba ati, “Nyina eky'okukugambira.” Batisheba ati, “Gamba.”

¹⁵ Agamba ati, “Nomanya okwo obukama bwabaire buli bwange, kandi n'okwo Abaisiraeli bona bashubiraga inye limoi limoi kantwara, nawe obukama bwahinduka bwatwarwa murumuna wange, aha rw'enshonga akabuhabwa Omukama Ruhanga.

¹⁶ Mbwenu nyina eky'okukushaba, otanyangira.” Batisheba amugambira ati, “Gamba.”

¹⁷ Agamba ati, “Ninkutagiliza oshabe Omukama Solomoni, takwangire, ampe Abishagi Omushunamikazikazi abe mukazi wange.”

¹⁸ Batisheba agamba ati, “Kurungi, Omukama ndamukugambilira.”

¹⁹ Batisheba agya aha Mukama Solomoni kutelera Adoniya omushango. Omukama abanduka kunyegeza nyin'engoma, amubandamira, ashuba abandara aha nketoye. Baletera Omukama mukuru enketo. Ashuntama aha bulyo bwa Solomoni.

²⁰ Aho Batisheba agamba ati, “Nyina ako ndikwenda kukushaba; otanyangira.” Omukama amugambira ati, “Mawe, gamba eky'olikwetaga, tinkwangire.”

²¹ Batisheba agamba ati, “Abishagi Omushunamikazi omuhe murumuna wawe Adoniya abe mukaziwe.”

²² Omukama Solomoni ahorora nyina ati, “Kubaki Abishagi Omushunamikazi nomwendera Adoniya? Mpaho omushabire n'obukama, kuba wenene ni mukuru wange, mara omu rubajurwe haliyo Abiatari omukuhani na Yoabu eya Zeruya.”

²³ Aho Omukama Solomoni arahira obuso bw'Omukama ati, “Ruhanga anyite, ekyo Adoniya yagamba kakiraba kitamurugiremu rufu.

²⁴ Obuso bw'Omukama ayantaireho, akanteka aha nketo ya Daudi tata, akampa engoma inye n'oruzaro rwange nk'okwo yaragaine, Adoniya kir'eki nafa.”

²⁵ Omukama Solomoni atuma Benaya eya Yehoyada, agenda amwita, afa.

²⁶ Kandi Omukama Solomoni agambira Abiatari omukuhani ati, “Ogende Anatoti omu butaka bwawe, ahakuba noragirwa kufa. Kyonkai tinkwite kanya aka enshonga watwaraga Esanduku y'Omukama Ruhanga orwo waikaraga na tata Daudi, kandi enakuze zona mukazibona hamoi.”

²⁷ Amubinga aha muruka gw'obukuhani bw'Omukama; yaba nikwo agobesheleza atyo eky'Omukama yagambire aha ka ya Eli omuli Shilo.

²⁸ Amakuru ago kagagobi Yoabu, airukira omw'Ihema ly'Omukama, akwata amahembe ga ealutare. Okugira atyo akaba ashengire na Adoniya, nirwo obubere yabaire atagweleire wa Abusalomu.

²⁹ Kabagambiire Omukama Solomoni bati, “Yoabu yairukira omw'Ihema ly'Omukama, mara ali ealutare;” Solomoni atuma Benaya eya Yehoyada ati, “Genda omwite.”

³⁰ Aho Benaya agenda omw'Ihema ly'Omukama amugambira ati, “Omukama yaragira ngu orugeyo.” Yoabu agamba ati, “Chei, inye ndagwa aha.” Benaya ashubayo agambira Omukama ebyo Yoabu yamuhorora.

³¹ Omukama amuhorora ati, “Kora okwo yagamba, omwite, omuziike. Inye n'abange otwihyeho entambara y'obwitamuntu aha rw'abantu bataina mushango abo Yoabu yaisire.

³² Omukama amubonabonyie amuture okwita abantu. Akaita abantu babili abagorogoki mara abarungi kumushaga, yabaita tata Daudi atalikumanya. Akaita Abuneri eya Neri omukuru w'eihe lya Isiraeli na Amasa eya Yetheri omukuru w'eihe lya Yuda.

³³ Kityo obwamba bwabo bumururukire na baijukurube ebiro byona. Kyonkai Daudi n'abe na baijukurube n'engomaye, Omukama Ruhanga alibatunga emilembe.”

³⁴ Nikwo Benaya eya Yehoyada kugenda kumutera akamwita. Bakamuziika omwe omw'irungu.

³⁵ Omukama Solomoni ahindura Benaya eya Yehoyada mukuru w'eihe aha mwanya gwa Yoabu, kandi aha mwanya gwa Abiatari omukuhani ataho Zadoki.

³⁶ Ahanyuma Solomoni atumaho Shimei ati, “Oyombeke enju Yerusalemu, oturemu. Otalirugamu kugira mbali wagya.

³⁷ Ekiro ekyo olituruka, okashabuka Akaiga ka Kidironi, omanyire kimoi olifa, ogwo guliba guli mushango gwawe.”

³⁸ Shimei ahorora Solomoni ati, “Mukama wange nikwo; okwo wagamba nikwo ndakora.” Shimei atura Yerusalemu ebiro bingi.

³⁹ Kyonkai emyaka eshatu kayahoire, abairu babili ba Shimei bairukira owa Akishi, mutabani wa Maaka, Omukama wa Gati. Kababigambiire Shimei bati, “Leba abairu bawe bali Gati,”

⁴⁰ ayara endogobe, agenda Gati owa Akishi kubahiga, mara abaihyayo.

⁴¹ Solomoni kuhulira okwo Shimei arugire Yerusalemu akagya Gati akagaruka,

⁴² atuma ab'okumweta, amubaza ati, “Iwe tinakunahiize obuso bw'Omukama, nkakukomeleza nti, ‘Omanyire kimoi okwo kiro eky'olituruka okagira mbali wagya, olifa?’ Okamporora oti, ‘Ekyo wagamba kirungi, nakihulira.’

⁴³ Kubaki aho ochwire ekyo waragaine omw'ibara ly'Omukama, okashaga n'omuhango ogwo nakuragiire?

⁴⁴ Nomanyage ebibi byona ebyo wakoleire tata Daudi; mbwenu Omukama Ruhanga arakubonabonyia nakutura entambara yawe egyo.

⁴⁵ Kyonkai inye ndagoshoka, n'engoma ya Daudi Omukama Ruhanga aligiramukya ebiro byona.”

⁴⁶ Kumara kugamba atyo aragira Benaya eya Yehoyada; ashohora amutema, afa. Aho obukama bwa Solomoni bugilira kimoi amani.