1 Abakama 19 - Ebibulia 2001

Eliya nairuka Yezebeli

¹ Byona ebyo Eliya yakozire Ahabu abibarulira Yezebeli, okwo abarangi bona yabaisa embanda.

² Aho Yezebeli atuma entumwa ahali Eliya nagamba ati, “Nyenkya tutakagobire izoba eli baruhanga banyite, mara banyite kantakwisire nk'okwo waita abarangi aba.”

³ Aho Eliya atina, abanduka asingwa. Agoba Beerisheba eya Yuda, aba nimwo asiga omwiruwe.

⁴ Kyonkai wenene agenda orugendo rw'ekiro kyona, agya omw'irungu. Kayagobire ashuntama aha muti gw'omuretemu, ayegomba orufu nagamba ati, “Waitu Mukama, mwebu aha niho, bandeke nfe, kuba inye tindi murungi kushaga batata.”

⁵ Abyama anagiliraho, omumalaika aija amukoraho, amugambira ati, “Imuka olye.”

⁶ Kugya kuburura leba omukate aha makara g'omuliro n'emuga y'amaizi, bimuli aha mutwe. Alya, anywa, ashuba abyama.

⁷ Omumalaika w'Omukama aija omurundi gwa kabili amukoraho, agamba ati, “Imuka olye, kuba noija kugenda orugendo rungi muno.”

⁸ Aimuka alya, anywa. Ekyakulya ekyo akigenderaho ebiro 40 kiro na mushana, alemwa agoba Horebu aha Ibanga lya Ruhanga.

Omukama nahabukira Eliya

⁹ Eliya kayagobireyo ataha omu mpako araramu. Aho Omukama amubaza ati, “Eliya aha nokorahoki?”

¹⁰ Eliya ahorora ati, “Waitu Mukama Ruhanga w'amahe, nkukwatiirwe eibuba lingi muno, aha rw'okuba Abaisiraeli baisire endagano yawe, ealutare zawe bazikambura, abarangi bawe babaisa embanda; inye mara inye nyenkai, ninye nsigaireho, kandi nibampiganisa.”

¹¹ Omukama agamba ati, “Shohora oyemelera aha omu maisho gange.” Aho Omukama amurabaho. Omuyaga gungi gwija n'amani gwasa amabanga, gushekenyura enyazi omu maisho g'Omukama, kyonkai Omukama akaba atali mu muyaga ogwo. Omuyaga kagwahingwire haijwa omusisi, kyonkai Omukama akaba atali mu musisi ogwo.

¹² Omusisi kagwahingwire aijwa omuliro, kyonkai Omukama akaba atali mu muliro ogwo. N'omuliro kagwahingwire haijwa akaraka kake akachuleire.

¹³ Orwo Eliya yakakahulire akwata ebeboye ayebunda aha maisho, ashohora ayemelera aha munwa gw'empako. Aho ahulira eiraka nilibaza liti, “Nokoraki Eliya?”

¹⁴ Ogu ahorora ati, “Waitu Mukama Ruhanga w'amahe, nkukwatiirwe eibuba lingi muno, kuba Abaisiraeli baisire endagano yawe, ealutare zawe bazikambura, abarangi bawe babaisa embanda; inye, mara inye nyenkai ninye nsigaireho, kandi nibampiganisa kunyita.”

¹⁵ Omukama amugambira ati, “Okwate omuhanda oshube omw'irungu lya Damasiko. K'oragobayo okore Hazaeli amajuta abe Mukama wa Siria;

¹⁶ Yehu eya Nimushi nawe omukore amajuta abe Mukama wa Isiraeli; kandi Elisha eya Shafati owa Abelimehola omukore amajuta abe murangi, akusikire.

¹⁷ Arahunga aha mbanda ya Azaeli, Yehu aramwita. Kandi arahunga aha mbanda ya Yehu, Elisha aramwita.

¹⁸ Kyonkai omuli Isiraeli ndasigamu abantu 7,000; bona abatakafukamiraga Baali na buli omoi atakamunywegeraga.”

Okwetwa kwa Elisha

¹⁹ Eliya aba nikwo arugayo atyo, aija ashanga Elisha eya Shafati nalimisa ente zikomesize enkomo ikumi n'emoi zimwebembeire, wenene aina ezikomesize enkomo 12. Eliya amurabaho ashuba amuteza ebeboye.

²⁰ Elisha asigaho ente, ahondera Eliya airukire, agamba ati, “Kambanze nywegere tata na mawe mbarazege nyije nkuhondere.” Amugambira ati, “Oshubeyo; iwe wabona nakukoraki?”

²¹ Elisha agaruka, aba atakimuhondera, akwata ente zona okwo zabaire zikomesiibwe enkomo, aziita, enyama yazo azichumbisa enkomo zazo, amara agiha abantu bagilya. Aho aimuka ahondera Eliya, ata namukolera.