1 Abakama 18 - Ebibulia 2001

Eliya na Obadia

¹ Ebiro bingi kabyabaire byakeire, Omukama agambira Eliya omu mwaka gwa kashatu ati, “Oyetware owa Ahabu; kandi ensi ninyija kugiha enjura.”

² Kityo Eliya ayetwara owa Ahabu. Eifa likaba lili lingi muno omuli Samaria.

³ Ahabu ayeta Obadia, omusigire w'omutungogwe. (Kandi Obadia ogwo yakuniraga muno Omukama;

⁴ nangu orwo Yezebeli yaisire abarangi b'Omukama, Obadia akakwata abarangi 100, yabasheleka makumi gatanu gatanu omu mpako, yaba nabaha ekyakulya n'amaizi).

⁵ Ahabu agambira Obadia ati, “Orabemu ensi yona ogobe aha nchuro zona z'amaizi n'omu mpanga zona, rundi twakubonayo obunyasi turokora efarasi n'endogobe n'ebitunganwa ebindi bitaija bikafa.”

⁶ Aho babegana ensi eyo bararabamu. Ahabu agenda wenkai rubaju oru, na Obadia agenda wenkai rubaju orundi.

⁷ Obadia kayabaire nagenda, abuganganwa Eliya. Obadia amumanya, ajumara ahansi, agamba ati, “Mukama wange Eliya n'iwe?”

⁸ Amuhorora ati, “Ninye, ogende ogambire Mukama wawe oti, ‘Eliya ali kunu.’ ”

⁹ Obadia agamba ati, “Nfakaireki iwe kunnaga omu mikono ya Ahabu kunyita?

¹⁰ Obuso bw'Omukama Ruhanga wawe, Mukama wange yatumire abantu omu mahanga gona n'omu ngoma zona kukuhiga. Kwija bakagamba bati, ‘Taliyo,’ niho honkai naba yarahiire kutabalira engoma anga eihanga mbali wabura.

¹¹ Mbwenu nogamba oti, ‘Ogende ogambire Mukama wawe oti Eliya ali kunu?’

¹² Okwo kandakurugaho nti Mwoyo w'Omukama akutware mbali ntalikumanya, kandi kandaija nkagambira Ahabu, akahiga okabura, anyite, mara inye omwiru wawe nkunira Omukama kwema obusigazi bwange.

¹³ Isi Mukama wange, tibakakugambiraga ekyo nakozire orwo Yezebeli yaisire abarangi b'Omukama, okwo abandi 100 b'Omukama nabashelekire kikumi: Makumi gatanu gatanu omu mpako, nkata nimbaha ekyakulya n'amaizi?

¹⁴ Mbwenu iwe nogamba oti, ‘Ogende ogambire Mukama wawe oti, “Leba Eliya ali kunu,” ’ naija kunyita.”

¹⁵ Eliya agamba ati, “Obuso bw'Omukama w'amahe owo nkolera, mazima kir'eki ninyija kwetwara ahali Ahabu.”

¹⁶ Kityo Obadia agenda kuhiga Ahabu, mara amugambira. Ahabu nawe agenda kuhiga Eliya.

¹⁷ Ahabu kayaboine Eliya amugambira ati, “N'iwe kaleta bobo omuli Isiraeli?”

¹⁸ Eliya ahorora ati, “Tinkabaga kaleta bobo muli Isiraeli, shana iwe na barumuna bawe, aha rw'okuba munagireho emihango y'Omukama mwafukamira Baali.

¹⁹ Mbwenu aha rw'ekyo otumeho Isiraeli yona ehurure enshange aha Ibanga lya Karimeli, hamoi n'abarangi ba Baali 450 n'abarangi ba Ashera 400 abalya na Yezebeli.”

Ekitambo aha Ibanga lya Karimeli

²⁰ Ahabu atumaho Abaisiraeli bona n'abarangi abahuruliza aha Ibanga lya Karimeli.

²¹ Eliya agoba abantu, agamba ati, “Muliberahai n'okutera oku n'oku? Omukama k'araba n'iwe aba Ruhanga mumuhondere, kandi k'araba aba Baali aho mpaho muhondere ogwo.” Abantu tibamuhoroire kigambo.

²² Aho wenene abagambira ati, “Inye, mara inye nyenkai, ninye murangi w'Omukama asigaireho; kyonkai abarangi ba Baali bali 450.

²³ Batuhe ente ibili, bonene barondeho eyabo emoi, bagitemateme, bagitungike aha nkwi, kyonkai batagyokya. Nanye ndatematema ente endijo, ngitungike aha nkwi mara nanye tingyokye.

²⁴ Inywe mutakire ruhanga wanyu, nanye ntakire Omukama Ruhanga. Arahorora akataishura omuliro n'iwe Ruhanga.” Abantu bona bahorora bati, “Wagambage.”

²⁵ Aho Eliya agambira abarangi ba Baali ati, “Murondeho ente emoi mube n'inywe muba ba mbere kugitematema n'okugigeleka aha nkwi orw'okuba muli bangi, mushube mutakire ruhanga wanyu, kyonkai mutagyokya.”

²⁶ Bakwata ente eyo babaha, bagitematema, bagitungika aha nkwi, batakira Baali kwema bwankya kugoba omw'ihangwe, bakwese, “Waitu Baali, singa otuhorore!” Kyonkai tibahuliire iraka lyona lyona, ow'okuhorora chei. Bataho n'okuchokachoka nibazingora ealutare eyo bashangirwe bombekire.

²⁷ Kalyagobire eihangwe, Eliya abaruulira ati, “Mwete muno enshonga ni ruhanga, shana aina eky'alikutekeleza eky'amani, anga aina mbali ali, anga yatabara, anga yaraihya, mumusisimure.”

²⁸ Bakunga muno, besharashara n'embanda n'amachumu nk'okwo bagiraga balemwa batulika obwamba.

²⁹ Eihangwe lihingura, bagendelera kwamuza kuhika bwaigoro mbali ebitambo byatambirwaga, kyonkai tibahuliire iraka lyona lyona; ow'okuhorora chei, ow'okuhulira chei.

³⁰ Aho Eliya agambira abantu bona ati, “Mungobe.” Bamugoba. Ayombeka buhya ealutare y'Omukama eyabaire akambwirwe.

³¹ Akwata amabare 12 kuhonderana n'orubara rw'enganda za batabani ba Yakobo ow'Omukama yagambire ati, “Orayetwaga Isiraeli.”

³² Ayombekera Omukama ealutare n'amabare ago. Alima orwina obuzingora bwayo, obuhango bwarwo rwakugirwemu ebipimo bibili by'embibo.

³³ Atahoge enkwi, atematema ente, agitungika aha nkwi. Agamba ati, “Mwijuze emuga inai amaizi, mugasheshere ekitambo ky'okwokibwa n'enkwi zaho.”

³⁴ Agamba ati, “Kora mutyo elya kabili.” Bakora batyo elya kabili. Agamba ati, “Kora mutyo elya kashatu.” Bakora batyo elya kashatu.

³⁵ Amaizi gaijura ealutare obuzingora, n'orwina garwijura.

³⁶ Akanya k'okutamba ekitambo kakagobire, omurangi Eliya ailira haihi, agamba ati, “Waitu Mukama Ruhanga wa Aburahamu, Isaka na Isiraeli, kimanyike kir'eki okwo n'iwe Ruhanga omuli Isiraeli, nanye okwo mba mukozi wawe, n'okwo ebi byona nabikora obingambire.

³⁷ Bamporore, waitu Mukama, bamporore, abantu aba bamanye okwo iwe, waitu Mukama, oba Ruhanga, n'okwo wakubura emitima yabo ekakugarukira.”

³⁸ Aho Omukama ataishura omuliro, gusongoka gusosotora ekitambo, n'enkwi, n'amabare n'eitaka, gurambaramba n'amaizi agabaire gali omu rwina.

³⁹ Abantu bona kubona byaba bityo bagwa bajumaire, bagamba bati, “Omukama n'iwe Ruhanga, Omukama n'iwe Ruhanga.”

⁴⁰ Eliya abagambira ati, “Kwata abarangi ba Baali, hatasigaraho muntu n'omoi.” Babakwata; Eliya abasongora aha Kaiga ka Kishoni, abaitiraho.

Enjura nehanguka

⁴¹ Eliya agambira Ahabu ati, “Mbwenu aha olye, onywe; kuba haliyo akahiliro kangi muno k'enjura.”

⁴² Ahabu agenda alya, anywa. Eliya atemba aha katwetwe ka Karimeli. Ainama muno, omutwe aguteka omu majwi gombili.

⁴³ Agambira omwiruwe ati, “Mbwenu aha otembe olebe omu nyanja.” Atemba aleba, agamba ati, “Taliyo kantu.” Amugambira ati, “Shubayo emirundi mushanju.”

⁴⁴ Aha murundi gwa mushanju agamba ati, “Nimbona akachwi nikaigana omukono gw'omuntu nikaimuka omu nyanja.” Eliya agamba ati, “Ogende ogambire Ahabu oti, ‘Otekateke egali yawe osongoke enjura etaija ekakutanga.’ ”

⁴⁵ Omu kanya kake ebichwi aha iguru biiragura, omuyaga gwihya, n'enjura egwa nyingi. Ahabu abuga egali agya Yezereeli.

⁴⁶ Omukama atunga Eliya amani. Ayekoma enyugunyu, airuka ayebembeire Ahabu alemwa ataha Yezireeli.