1 Abakama 14 - Ebibulia 2001

Enzindo y'obukama bwa Yeroboamu

¹ Omu biro ebyo Abiya eya Yeroboamu arwara.

² Yeroboamu agambira mukaziwe ati, “Imuka oyehindure, batakumanya okw'oli mukazi wange ogende Shilo. Haliyo omurangi Ahiya, ayangambiire okwo ndiba Mukama w'abantu aba.

³ Otware emikate 10, n'ekeki, n'echupa y'obwoki, omugyeho; arakugambira okw'omwana araba.”

⁴ Muka Yeroboamu akora atyo, akwata omuhanda agya Shilo, agoba omwa Ahiya. Ahiya akaba atakishobora kubona kuba amaishoge gakaba gagizire ekibubi aha rw'obugurusi.

⁵ Omukama amugambira ati, “Leba muka Yeroboamu naija omwawe kuraguliza omwanawe, kuba arwaire. Omugambire oti n'oti. N'orwo araija ayehindwire mukazi ondijo.”

⁶ Ahiya kayamuhuliire nalibata, amunyegeza yagoba omu kishasi, ati, “Nyegera muka Yeroboamu; kubaki noyehindura? Nyina amakuru agasikiire ago ntumirwe ahali iwe.

⁷ Ogende ogambire Yeroboamu oti, ‘Omukama Ruhanga wa Isiraeli nagamba ati, “Nkakuha ekitinwa omu bantu, nakuhindura mwebembezi w'embaga yange ya Isiraeli,

⁸ kandi eka ya Daudi nagyaka engoma nagiha iwe. Kyonkai iwe tobaire nka mwiru wange Daudi ayahikize emihango yange, akaba mwesigwa ahali inye n'omutimagwe, akankolera ebirungi byonkai.

⁹ Iwe ohenire kushaga bona abakwebembeire, wakora baruhanga abandi, wahesha ebishushani wannigaza, wanyeihyaho.

¹⁰ Aha rw'ekyo ninyija kuteza eka yawe enaku, omwawe nyite buli mushaija, omwiru, n'atali mwiru araba asigaire omuli Isiraeli. Eka yawe ningisosotora okw'omuntu ayokya obushai bw'ente bukahwaho bwona.

¹¹ Ali wawe wena aragwa omu kigo, embwa ziramulya; n'arafera omw'irungu amahungu garamulya. Ayakigamba ninye Omukama.” ’

¹² Mbwenu okwate omuhanda ogaruke omuka. K'orataha oti omu kigo omwana afe.

¹³ Isiraeli yona eramuchulira, bamuziike. Omwana ogwo n'iwe wenkai omu ba Yeroboamu araziikwa omu nyanga, kuba n'iwe wenkai ow'Omukama Ruhanga wa Isiraeli alikushemelerwa.

¹⁴ Kandi kir'eki Omukama Ruhanga naija kweteraho Omukama ow'okutwara Isiraeli, Omukama ogwo ashube asilikye eka ya Yeroboamu.

¹⁵ Nikwo Omukama aramara atyo Abaisiraeli amani nk'okwo ekisharunga kichundaiguka omu maizi, mara asindure Isiraeli omu nsi egi nungi eyo yahaire baishebo, abanaganage buseli bwa Efurati; enshonga bakozire Abaashera banigaza Omukama.

¹⁶ Arahwamu Isiraeli aha rw'amafu ga Yeroboamu ag'afakaire akashuba akagafakaza Isiraeli.”

¹⁷ Aho muka Yeroboamu akwata omuhanda agaruka Tiriza. Kayagobire omu kishasi omwana afa.

¹⁸ Isiraeli yona emuchulira, emuziika. Bamutekera ekibi nk'okwo Omukama yagambire omu kanwa k'Omurangi Ahiya.

Okufa kwa Yeroboamu

¹⁹ Ebindi ebyo Yeroboamu yakozire, okwo yarashaine, n'okwo yatwetwe, bihandikirwe omu Kitabo ky'Amakuru g'Abakama ba Isiraeli.

²⁰ Akatwara engoma emyaka 22. Atahya, bamubyalira. Omutabani Nadabu amusikira.

Ebyabaireho omu makiro ga Rehoboamu

²¹ Rehoboamu eya Solomoni atwara Yuda. Engoma akagigyaho aina emyaka 41. Emyaka 17 akagitwara ayemire Yerusalemu, ekigo eky'Omukama yabaire aronkire omu nganda zona za Isiraeli kufukamirwamu. Nyina eibaralye ni Naama Omwamonikazi.

²² Ahanyuma Abayuda bahena aha Mukama; bamugiza eibuba. Amafu gobakozire gashaga aga baishebo.

²³ Bakashuba bayombeka obuju aha bubanga bwona, n'enyomyo, n'Abaashera, n'aha bigabiro.

²⁴ Kandi omu nsi egyo bakundaga emize y'obusiyaga. Bakwata emize mibi ey'amahanga ag'Omukama yabingire Kanaani orwo Abaisiraeli babaire nibatahamu.

²⁵ Omu mwaka gwa kashatu gw'Omukama Rehoboamu, Shishaki Omukama wa Misiri atabalira Yerusalemu.

²⁶ Anyaga eitunga lyona lya Rwensinga y'Omukama n'ely'ekikaare. Atwara buli kantu, atwara n'engabo zona z'ezahabu ezo Solomoni yabaire ahangire.

²⁷ Omukama Rehoboamu agaruraho engabo z'omulinga, azikwasa abakuru b'abakumilizi b'ebihigi by'ekikaare.

²⁸ Buli orwo Omukama yatahaga Rwensinga y'Omukama, abalinzi bazikwataga, bashuba bazigarura omu kiyumba ky'abakumilizi.

²⁹ Ebindi byona ebyo Rehoboamu yakozire bihandikire omu Kitabo ky'Amakuru g'Abakama ba Yuda.

³⁰ Rehoboamu na Yeroboamu tibayoshaga kutabalirangana.

³¹ Rehoboamu atahya, abyalirwa omu magashani ga baishe omu Kigo kya Daudi. Nyina eibaralye ni Naama Omwamoni. Omutabani Abiya amusikira.