1 Abakama 13 - Ebibulia 2001

Omurangi nakeena ealutare ya Betheli

¹ Omurangi aruga Yuda aija Betheli atumirwe Ruhanga. Yeroboamu akaba ayemeleire ealutare naija kwotera obunuma.

² Ruhanga agambira omurangi ogwo kukeena ealutare ati, “Iwe ealutare, iwe ealutare; Omukama nagamba ati, ‘Leba omw'ihiga lya Daudi, arazarwamu omwana w'omwojo, eibaralye ni Yosia. Ahali iwe alitambiraho abakuhani ab'obuju bw'amabanga abakwoteraho obunuma, ashube akwokezeho amagufa g'abantu.’ ”

³ Kir'ekyo abaha akabonero nagamba ati, “Aka niko kabonero ak'Omukama yagambire ati, ‘Altare elikamburwa, n'eijwi ligiliho lishesheke.’ ”

⁴ Omukama Rehoboamu kuhulira ebigambo ebyo omurangi yakeenesa ealutare ya Betheli, ayema ealutare aimukya omukono agamba ati, “Mumukwate.” Aho omukono ogwo yabaire aimukize omurangi gwoma, alemwa kugufunya.

⁵ Ealutare nayo ekambuka, eijwi elyabaire ligiliho lishesheka, kuhonderana n'akabonero ako yabaire agambiire omurangi k'ataho.

⁶ Rehoboamu agambira omurangi ati, “Otagilize Omukama Ruhanga wawe, omuntagililize nkire omukono.” Omurangi atagiliza Omukama, Rehoboamu akira omukono, gushuba guba okwo gwabaire guli orwa mbere.

⁷ Rehoboamu agambira omurangi ati, “Ija tugye omuka oikyeho kake, ndakuhera.”

⁸ Omurangi amugambira ati, “N'orwo wakumpa enusu y'eitunga lyawe tinkuhondere mwawe, kunu tindikwija kulyayo kyakulya anga kunywayo maizi.

⁹ Omukama angambiire ati, ‘Otalyayo kyakulya, otanywayo maizi, n'ogwakutwara gutakugarura.’ ”

¹⁰ Aho akwata muhanda gundi; ogwamulesire Betheli tigwamushubizeyo.

Omurangi nachwa omuhango gw'Omukama

¹¹ Hakaba haliho omurangi mugurusi ayaturaga Betheli. Kir'ekyo abatabani baija bamugambira byona eby'omurangi yakora Betheli, n'ebyo yabaire agambiire Yeroboamu.

¹² Ishebo abagambira ati, “Yatwarwa muhandaki?” Abatabani bamwoleka omuhanda ogwatwete omurangi ogwo ayabaire arugire Yuda.

¹³ Agambira abatabani ati, “Muntereho endogobe amatandiko.” Bamukolera batyo, agikuuba.

¹⁴ Ahondera omurangi ogwo, amushanga ashuntamire aha mwaloni. Amubaza ati, “Iwe n'iwe murangi arugire Yuda?” Ogu agamba ati, “Ninye!”

¹⁵ Aho amugambira ati, “Ija tugye omuka, olye akakulya.”

¹⁶ Ogu ati, “Tinshobora kugarukayo naiwe, anga kutaha mwawe, mara tinakulya kyakulya anga kunywa maizi ndi kunu,

¹⁷ aha enshonga Omukama angambiire ati, ‘Otalyayo kyakulya, kandi otanywayo maizi, n'ogwakutwara gutakugarura.’ ”

¹⁸ Amugambira ati, “Inye nanye ndi murangi nka iwe. Omukama aragiire omumalaika kungambira ati, ‘Omugarure, oije nawe omwawe, alye akakulya, anywe n'amaizi.’ ” Kyonkai akaba namubeiya.

¹⁹ Kityo agaruka nawe omwe, alya ekyakulya, anywa n'amaizi.

²⁰ Kababaire bashuntama bati kulya, Omukama agambira omurangi omugurusi

²¹ kwatikiraho omurangi wa Yuda nagamba ati, “Orwo otaahulira kyo Mukama akugambiire, okachwa omuhango ogw'Omukama Ruhanga wawe akuhaire,

²² okagaruka kunu okalyayo ekyakulya, okanywayo n'amaizi mbali akutangire, orafa, mara toziikwe mwanyu mu nziiko yanyu.”

²³ Kayabaire yamazire kulya n'okunywa, atandiikira omurangi owo yagarwire endogobe.

²⁴ Kayabaire nagenda abuganganwa entare omu muhanda, emwita. Omutumbigwe egunaga omu muhanda, endogobe egwemeleraho, n'entare kwakwo.

²⁵ Abantu barabaho, babona okwo omutumbi gunagire omu muhanda, n'entare okwo egwemeleireho. Baija babigamba omu kigo mbali omurangi omugurusi yaturaga.

²⁶ Omurangi ogwo ayabaire amugaruliire omu muhanda kayabihuliire agamba ati, “Murangi w'Omukama atahuliire ky'Omukama yamugambiire, aha rw'ekyo yamunaga aha ntare yamwita, okw'Omukama yabaire amugambiire.”

²⁷ Agambira abatabani ati, “Muntandiikire endogobe.” Bagitandiika.

²⁸ Agenda, ashanga omutumbi gunagire omu muhanda, endogobe n'entare zigwemeleireho. Entare tiyaliire mutumbi anga kwita ndogobe.

²⁹ Omurangi ashutura omutumbi gw'omurangi mutahiwe, aguteka aha ndogobe, agugarura omu kigo, achulira omurangi ogwo mara amuziika.

³⁰ Aziika omutumbi omu nyangaye, amuchulira ati, “Yoo, murumuna wange.”

³¹ Aho kayamazire kumuziika agambira abatabani ati, “Kandifa munziike omu nyanga omw'omurangi ogu yaziikwa, omutumbi gwange muguteke aha rubajurwe.

³² Okuba ebigambo eby'Omukama yagambire kukeenesa ealutare ya Betheli n'obuju bw'amabanga omu bigo bya Samaria, tibyakubura kubaho.”

³³ N'orwo byabaire bityo Yeroboamu tiyalekeire mizeye. Akazigilira, yaronda abakuhani abatali Balevita ab'okumanya obuju bw'amabanga. Ayakendaga kuba mukuhani amutendeka.

³⁴ Ekigiro eki niyo ntambara eyasilikize eka ya Yeroboamu ekachweka.