1 Abakama 12 - Ebibulia 2001

Obutahulira bwa Rehoboamu

¹ Rehoboamu agenda Shekemu, mbali Abaisiraeli bona babaire bateraniire kumuta aha ngoma.

² Yeroboamu eya Nebati kayahuliire amakuru ago, kuba akaba akyali Misiri mbali yabaire asingiirwe orwo yairukire Omukama Solomoni, arugayo agaruka.

³ Batuma ab'okumweta, Yeroboamu n'embaga yona ya Isiraeli baija bagambira Rehoboamu bati,

⁴ “Isho akatubonesa enaku zingi muno. Mbwenu iwe otuyugizemu ensika za sho n'enaku ezo yatubonesize nirwo turakukolera.”

⁵ Abagambira ati, “Mugende mumareyo ebiro bishatu, mushube mugaruke.” Embaga egenda.

⁶ Nikwo Omukama Rehoboamu kwehanuza aha bagurusi ababaire bali baramata ba Solomoni ishe akyarora. Ababaza ati, “Nimuntegekera abantu aba mbahorore ntai?”

⁷ Bamugarukamu bati, “K'oraba nogonza kushemeleza abantu aba mbwenu obahorore kurungi mara aho baraba bairu bawe ebiro byona.”

⁸ Kyonkai ayanga entegeka ey'abagurusi bamutegekeire, ahondera entegeka y'abasigazi ab'omwimukogwe; nibo babaire bali baramatabe.

⁹ Nabo ababaza ati, “Abantu aba nimutegeka katubahorora tutai? Bangambiire bati, ‘Otuyugizemu ensika ezo sho yatukomireho.’ ”

¹⁰ Abasigazi ab'omwimukogwe bamugambira bati, “Ebi nibyo oragambira abantu abakugambiire bati, ‘Sho akatubonesa enaku, kyonkai iwe otuyugizemu,’ Iwe obagambire oti, ‘Akara kange akehelera kahango kushaga enyugunyu za tata.

¹¹ Mpaho tata k'araba yababonesize enaku zibi, inye ndabashumbura. K'araba akabateza enshanju, inye ndabateza amahwa.’ ”

¹² Aha kiro kya kashatu Yeroboamu n'embaga baija ahali Rehoboamu nk'okwo yabaire abagambiire ati, “Mugaruke aha kiro kya kashatu.”

¹³ Ahorora embaga egyo n'amani, ayanga entegeka ey'abagurusi bamutegekeire,

¹⁴ abagambira nahondera entegeka y'abasigazi ati, “Tata akababonesa enaku zingi, kyonkai inye kanyije mbashumbure; akabateza enshanju, kyonkai inye ndaija kubateza amahwa.”

¹⁵ Rehoboamu tiyahuliliize mbaga. Kuba eki Omukama Ruhanga n'iwe yakigendeleire, kugobesheleza ekigambokye ekyo yabaire agambiire Yeroboamu eya Nebati omu kanwa ka Ahiya Omushiloni.

Abaisiraeli nibashenga

¹⁶ Abaisiraeli bona kabaaboine okwo Omukama atabahuliliza, bamuhorora bati, “Omwa Daudi nekaigare. Ichwe omwa mutabani wa Yese nitwija kusikamuki? Inywe Baisiraeli buli muntu ashube omuka! Inywe aba Daudi mwemanye.” Aho Abaisiraeli bagaruka omu maka gabo.

¹⁷ Rehoboamu atwara Abaisiraeli abaturaga omu bigo bya Yuda.

¹⁸ Ahanyuma atuma Adoramu, omunyampara mukuru w'omujarabo omu Baisiraeli, Abaisiraeli bona bamuyokera bamuteza amabare bamwita. Omukama Rehoboamu arahuka akuuba omu galiye airukira Yerusalemu.

¹⁹ Nikwo Isiraeli yashengire etyo eihiga lya Daudi na mambwenu.

²⁰ Abaisiraeli bona kabahuliire okwo Yeroboamu agarukire, batuma ab'okumweta kwija mbali bahuruliire. Bamuteka aha ngoma, atwara Isiraeli yona. Taliho n'omoi yahondeire ihiga lya Daudi, shana oruganda rwa Yuda rwonkai.

²¹ Rehoboamu kayagobire Yerusalemu, ahuruza oruganda rwa Yuda rwona n'orwa Benjamini, abaisherukare 180,000 kinana abarashani emanzi, kurashanisa engoma ya Isiraeli, kugarura Rehoboamu eya Solomoni aha ngoma.

²² Ruhanga agambira Shemaya omushaijawe ati,

²³ “Ogambire Rehoboamu eya Solomoni, Omukama wa Yuda na bona ab'oruganda rwa Yuda na Benjamini, n'abantu abandi bona oti,

²⁴ ‘Omukama Ruhanga nagamba ati: Mutakutabalira barumuna banyu Abaisiraeli; buli muntu agaruke omwe, enshonga ekigambo eki ninye nkigendeleire.’ ” Aho bahulira ekigambo ky'Omukama, bashuba omu maka gabo nk'okwo yabagambiire.

²⁵ Ayo Yeroboamu ayombeka Shekemu omu mabanga ga Efuraimu, atura okwo nayemayo kwombeka Penueli.

²⁶ Atekeleza ati, “Mbwenu obukama bwakugaruka omw'ihiga lya Daudi,

²⁷ abantu aba kabakutemba Yerusalemu kutambira Omukama ebitambo omuli Rwensinga, bakushuba bagaruka owa Mukama wabo Rehoboamu Omukama wa Yuda, baija banyita.”

²⁸ Aha rw'ekyo ayehanuza, akora enyana ibili z'ezahabu. Agambira embaga ati, “Inywe Baisiraeli, mbali mwakagendeire Yerusalemu ti juba. Leba baruhanga banyu ababaihire Misiri.”

²⁹ Omoi amuteka Betheli n'ondijo amuteka Dani.

³⁰ Abantu bata nibagya Betheli kufukama nangu bagoba na Dani, egyo ntambara bagikora.

³¹ Ashuba ayombekera baruhanga obuju aha mabanga g'okufukamiramu. Aronda abakuhani omu mbaga ababaire batali Balevita.

³² Ataho ekiro kya ikumi na bitanu by'omwezi gwa munana kiba kiro kikuru nk'ekyakorwaga Yuda. Atamba ebitambo ahali ealutare. Akora atyo na Betheli. N'enyana ezo yabaire akozire azitambira ebitambo. Ata abakuhani Betheli omu buju obwo yayombekire aha mabanga.

³³ Agya Betheli aha kiro kya ikumi na bitanu by'omwezi gwa munana, ekyo yabaire ayerondeire, akolera Abaisiraeli obugenyi, agya na ealutare ayotera obunuma.