1 Abakama 10 - Ebibulia 2001

Omukamakazi wa Sheba nazindukira Solomoni

¹ Omukamakazi wa Sheba kayahuliire eiranga lya Solomoni aha byo yabaire akoleire Omukama Ruhanga, aija kumulenga, amubaza ebigumire.

² Aija Yerusalemu aina abamushembire bangi muno, n'engamia ezitwete ebirungo n'ezahabu nyingi muno n'obubare bw'eiguzi. Kayagobire Solomoni amubaza byona ebyabaire bimuli aha mutima.

³ Solomoni abimuhorora. Taliho kintu na kimoi ekyalemire Mukama kukimushoborora.

⁴ Omukama kayaboine obumanyi bwa Solomoni, na nyaruju eyo yayombekire,

⁵ ebyakulya ebyo yalyaga, emitulire y'abatwazibe, n'emikolere y'abairube, ebijwaro byabo, abakwasi b'enkorogo, n'ebihongo by'okwokibwa ebyo yahongeraga Rwensinga y'Omukama, agwa omu kitangaro.

⁶ Agambira Omukama ati, “Amakuru gawe gona n'obumanyi ebyo nkuhuliireho nkyali owaitu, mazima gonkai.

⁷ Kyonkai mbaire ntagaikiliize kuhika orwo nyizire nkabyebonera n'amaisho gange; kandi nobona, n'enusu y'obumanyi bwawe yonkai babaire batagingambiire, kuba bwonene n'eitunga lyawe nibishaga harai amakuru ago mbaire mpuliire.

⁸ Abakazi bawe baberwa n'abaramata bawe aba nabo baberwa abaikara bemeleire omu maisho gawe bakahulira obumanyi bwawe.

⁹ Omukama Ruhanga wawe asingizibwe ayakuronkire akakuta aha nketo y'obukama bwa Isiraeli. Omukama akagonza Isiraeli eirai lyona, yakuha obukama obone kubaramura omu mazima n'obugorogoki.”

¹⁰ Omukamakazi aha Omukama Solomoni ezahabu y'obusikizi bw'ekilo 4,000 n'omushobyo, n'ebirungo bingi n'obubare bw'eiguzi. Tibyazokire rundi birungo bingi nk'eby'Omukamakazi wa Sheba yahaire Omukama Solomoni.

¹¹ Kandi emeli za Hiramu ezaihyaga ezahabu Ofiri, zikaihyayo n'emisandari nyingi muno, n'obubare bw'eiguzi.

¹² Omukama omu misandari egyo abaijamu enyomyo za Rwensinga y'Omukama n'ez'ekikaare, eningili n'enanga z'abahoyi. Emisandari egyo tiyalesirwe anga tekabonekaga rundi kuhika kir'eki.

¹³ Omukama Solomoni aha Omukama wa Sheba byona ebyo yayenzire n'ebyo yamushabire, kandi ebyo yabaire yamutungire amanaganage bitabulimu. Aho Omukama agaruka owabo n'abaramatabe.

Eitunga lya Solomoni

¹⁴ Ezahabu eyo baleteraga Solomoni omu mwaka gumoi yagobyaga obusikizi bw'ekilo nka 23,000.

¹⁵ Yagileterwaga abachuruza n'abatunzi. Eyarugaga omu bakama ba Buarabu n'omu bagavana b'ensi egyo etabulimu.

¹⁶ Omukama Solomoni ahesha engabo zihango 200 ezisiigirwe ezahabu. Buli ngabo ekaba esiigirwe ezahabu y'obusikizi bw'ekilo mushanju.

¹⁷ Kandi ahesha engabo 300 nazo zisiigirwe ezahabu, buli ngabo ekaba esiigirwe ezahabu y'obusikizi bw'ekilo nka ibili. Omukama aziteka omu Nju y'Ekibira kya Lebanoni.

¹⁸ Ashuba ahanga enketo mpango ey'omwino gw'enjoju agisiiga ezahabu enchenkure.

¹⁹ Enketo ekaba eina amatembero mukaga, enyuma einayo omutwe gw'enyana, buli rubaju eina ah'okuta emikono, n'entare ibili zikoleirweho.

²⁰ Kandi entare 12 zikaba zikoleirwe aha matembero mukaga, buli itembero ntare ibili, oku emoi n'oku emoi. Taliho nketo nk'egi eyabaire erakozirwe mu ngoma yona yona.

²¹ Ebikwato byona eby'okunyoisa eby'Omukama Solomoni bikaba bili by'ezahabu, na byona eby'Enju y'Ekibira kya Lebanoni bikaba bili by'ezahabu nshai. Taliho na kimoi ekyabaire kili ky'efeza, aha rw'okuba efeza omu biro bya Solomoni yagaywaga.

²² Akaba aina emeli zingi omu Nyanja ya Tarishishi, zasabaraga n'eza Hiramu. Omurundi gumoi omu myaka eshatu emeli zingi za Tarishishi zaletaga ezahabu, efeza, emino, enkobe n'enkoko za mugasha.

²³ Kityo Omukama Solomoni ashaga abakama bona b'ensi omw'itunga n'obumanyi.

²⁴ Ensi yona yagonzaga muno kwija kumubona n'okuhulira obumanyi bwo Ruhanga yabaire amutungire.

²⁵ Buli omoi omuli abo yaletaga ebigemurobye, ebintu by'efeza n'eby'ezahabu, ebijwaro, mira, ebirungo, efarasi n'enyumbu, bingi bityo buli mwaka.

²⁶ Solomoni akatunga amagali g'endashana n'ab'efarasi. Akaba aina amagali 1,400, n'ab'efarasi 12,000. Akabata omu bigo by'amagali, abandi yaikaraga nabo Yerusalemu.

²⁷ Omu makiroge efeza omuli Yerusalemu ekaba eli nyingi nk'amabare, n'emielezi ekakanya nk'emiti y'emisikamoli eya Shefela.

²⁸ Efarasi za Solomoni zarugaga Misiri na Kue, niyo abachuruzabe baziguraga.

²⁹ Egali yakuguzirwe Misiri eshekeli 600 z'efeza, kandi n'efarasi egura 150. Abachuruza abo kababaga nibaruga kuzitunda baija nibaziguza abakama bona b'Abahiti n'abakama ba Siria.