ZEKHARIYA 9 - Kemethajüh (N) (Re-editing) Bible (BSI)

Jujü Mizzatentithu miwi Jühkekaghaten

¹ Hawa hana Apvüwa ketsijüh: Ma Hadrak yyiwa nu Damaska nyunutiwa ghena kemeten jüh khichidha. Israel mizzathu ghena ketan nyela Siriya ghazen nyunutiwa la Apvüwa ji.

² Hadrak kemeggü Hamath tsü la ma ji, nu tsüti Tur nu Sidon nyunutithu pi mathu sapichüthu tsüdila.

³ Tur na ma ketanla ma ghena khwetivüya nu rükatssü nu suna kejon saghuyadha, tsüna kenenkaghathu ti kesa le!

⁴ Isala Apvüwa na ma keben tsüdi sen bvüaden . Ma Tur keben-keyeng pi atssükedone wi khala chia, nu anyunutiwa tsü mecang pi ayyi wi chiaben .

⁵ Ashkelon nyunutiwa na ha muya nu messi yaben. Nu Gaza nyunutiwa na ha muya nu ketizensa ntsa saaben. Tsü makesü Ekron na ma kaghangwa tsü nmila bhatagha ben. Gaza na ma kadimiwa bhatagha nu Ashkelon tsü yisha ben.

⁶ Anyi amizza kesaghuthu na gho Ashthod wi hangben. Apvüwa na khiben, “Hi Filistinthu kekapvü ha tsüdi satemeni thsüaden .

⁷ Mathu na ajjü asa wi keben, nyelela kekhen tsse kepathu tsü ndsadha. Hang kebenthu tsüdila inyithu sa nu Judah wi amizza kesü ti saaben. Ekron na Jebus nyithu ti inyithu sayaben.

⁸ Hi iyyiwa tsü hieya nu süpahizithu ya tsü pvüdhi wa thsü nben. Hi kekhangkesen kedaggüthu ya inyithu npasha neng thsüdha. Hi inyithu na khatila ketizensadha khe mudha.”

Kadimiwa Shaghaketen

⁹ Zion nyithu! Anongheyalo, anongheyalo! Jerusalem nyithu, anonkeghe ghena jishalo! Ghangchilo, nthu kadimiwa na nthu wi gho tendha! Ma khang ntsa nu nyankethang sala ghoden, isala ma satemeni nu gada kesü miwi donki ben—— gada zza kesü miwi ben.

¹⁰ Apvüwa na khiben, “Hi Israel wi aghi gorugarithu tsü khupia, nu Jerusalem wi goruthu sen bvüaden; aghi wi kesen alakusüthu tsü yasa den. Nthu kadimiwa na mizzatentithu jawi keccawa sa cüden; ma atssükedone kesü na wa kesü kecu, Eufrat Ghaku na wa ayyi kenten kecu kekhang senden.”

Anyiza Nyithu tsü Ssineng yakesa

¹¹ Apvüwa na khiben, “Hi nthu ssinu cenkethenjüh sa, tsüna ahhanshakesa jjü pi sa ketheng ghena hi kushiyyi atssü nkemi ku wina n-nyithu lisha chicüaden .”

¹² Kheneng gholo, no kushi nyithu khili nthu kaghang bendha; nthu ben yazishu kesa witsü kheneng gholo. Hi khili nthu kizaben, nthu na ketizenkesa tsüdi miwi hi tsüju keni tughu sawegü pi nthu cüaden .

¹³ Hi Judah pi süpahi lamugho kesü ti sen, nu Israel pi alakusüthu ti senden. Hi Zion nyithu pi njünnu kesü ti sen, nu Gris nyithu ssisaden.’

¹⁴ Apvüwa na ma nyithu miwi ghoaben; ma ma lakusü pi atsancwe ti ga chiden. Kemisintsa Apvüwa na tutuwa khou chiben; ma acülawa caghamo wina alentsen shhugho ben.

¹⁵ Kemisintsa Apvüwa na ma nyithu khweya; nu mathu na mathu ghinyithu yasa ben. Mathu na aghi wi anyi dikinathu ti magha, nu mathu ghinyithu jjü keji thsüaben; tsüna ahhansha jjü pi akhuzza kesü wina kekinyipen miwi keshusha kechi ti lle waben.

¹⁶ Tsü tsathang kegho wi Apvüwa na ma nyithu hangsha yaben, anenikehie kesü na kemessi wi ma nenithu hangshakeya ti. Mathu na ma yyi wi kadiliwen kesü miwi alon menkedhu ti wegü benden.

¹⁷ Ayyiwa tsüna khatila mehai, nu atsimehai ben nu! Anyi cahlithu na asu nu kisengtssü ghena züben yaden.