ZEKHARIYA 5 - Kemethajüh (N) (Re-editing) Bible (BSI)

Kemanthi wina Kezhüllu Pighe keten Kemu

¹ Hi kheneng ghangchi, nu ha tsüwi hi kezhüllu kesü na atssan wi pighe keten mu.

² Tangnyilowa na hi mangwa mu nu keü. Hi luneng, “Kezhüllu kesü na atssan wi pighe den; tsüna ma kesie meter tugu nu kemeza meter mejü nu gishü pahan.”

³ Tsaseng wi ma hi wi khi, “Tsü miwi ayyi maben wi wa ketenwa kishen-keshiwa tsüpi zhükitheng. Kezhüllu pahanwa miwi tsü ayyiwa wi kaghanfü nyi tsüdila khupia; nu kepawa miwi tsü milikemesa khi nu kishen ketenthu la tsüdi khu pia den kesa khiben.

⁴ Kemisintsa Apvüwa na ma kishen-keshi chi nu tsüna kaghanfü nyi nu milikemesa khi nu kishen ketenthu tsüdi jjen wi du thsüaben le khiben. Tsüna mathu jjen wi ben nu mathu yasa ben.”

kemanthi wi Nzawa na Ashijü wi Keben Kemu

⁵ Tangnyilowa na kheneng ituwi gho nu khi, “Ghangchilo, hewi la pala pahan ghoten le!”

⁶ Hi keü, “Tsüna mangwa nu?” Ma luneng, “Tsüna ashijü kesü, nu tsüna ayyi maben kesami ghena.”

⁷ Ashijü keshan tsüna akhwe-mighe pi satheng. Hi ghang keben wi ashijü keshan tsüna lishü shhugho nu nza kesü na ciwi donkiben!

⁸ Tangnyilowa na khi, “Nzawa ha ma jjügi na gheshighena.” Tsaseng wi ma nzawa tsü deshen pi ashijü non wi donki thsüa nu ma keshan pi shan neng.

⁹ Hi tangwi ghangchi nan nza keni na atssüwa gisha kekhang ti kesa pvü nu hi wiwa pighe gho keten mu, manyi na gho ashijü tsü mcüya nu pighe bvüa.

¹⁰ Hi tangnyilowa wi keü, “Manyi na tsü pie nu khiewa waten nu?”

¹¹ Ma luneng, “Babylonia wi waden, ciwi mathu na tsü ghena kekinyijjen kesü saaden. Kekinyijjenwa tsü sacen lethu, ashijüwa tsüpi ciwi chi nu kinyiden.”