ZEKHARIYA 4 - Kemethajüh (N) (Re-editing) Bible (BSI)

Kemanthi wi Ahulakedonpen Kemu

¹ Tangnyilo hi ccüneng keghowa tsüna kheneng gho nu hi jenkeben ti sala hi pamechü,

² nu keü, “No mangwa muben nu?” Hi lunengchi, “Suna pi kesa ahulakedonpen kesü. Ma shoni wi adeli pi kechi ghena akhuzza kesü ben. Ahula-kedonpenwa miwi ahula tagü na ben, ahula kesüsü miwi ahyikhu kechipen tagü na ben.

³ Ciwi oliv ton keni na ahulakedonpen ghapili wi ben.”

⁴ Tsaseng wi hi tangnyilowa keü, “Kediwa, hathu ha jjügi mangwa ghena nu?”

⁵ Ma hi keü, “No tsü jjügi chüben ma?” Hi luneng, “Kediwa, hi tsü nchüle.”

⁶ Tangnyilowa na Apvüwa wi ketsijüh hapi Zerubbabel cülo hi wi kiza: “No süpahizi kekhang nyelela no kezü wina nye, isala ighamu ghena no khang yaden.

⁷ Ntuwi alen kekhenthu na ayikhathu keti ti sa keben tsüna nmila ben. No Kekinyijjenwa tsü saneng ben, nu no alon sakhenwa pi maben wi chi keben wi anyithu na jisha nu, ‘Mehai ntsawa, mehai ntsawa le! khiben.”

⁸ Apvüwa wina ketsijüh kepa wila kesü hi wi gho,

⁹ Ma khi, “Zerubbabel na Kekinyijjenwa tsü gikidegü chidha, nu ma tsü sacen shaben. Hawa ha sacen lethu, inyithu na hi no kesun pi mathu wi chile kesa chüyaben.

¹⁰ Mathu na keu ketan sacen keya ghena ahathana ben. Isala mathu na Zerubbabel na Kekinyijjenwa tsü sakeben muyathu mathu nonghe yaben.” Tangnyilowa na hi wi khi, “Ahula tagü tsüna Apvüwa nyon tagü, ayyi tsüdi wi mu kebenwa tsüle.”

¹¹ Tsaseng wi hi ma keü, “Ahula kedonpen ghapili wi oliv ton keni keben tsü jjügi mangwa nu?

¹² Nu suna hikhu keni wi oliv deli pi meyisha keben kete wi oliv cüna keni keben tsüna mangwa jjügi nu?”

¹³ Ma hi keü. “No tsü jjügi chüben ma?”. Hi luneng, “Kediwa, hi tsü nchüle.”

¹⁴ Tsaseng wi ma khi, “Ayyi maben miwi Apvüwa Anyiza na anyi ha keni kessiya nu adeli pi nyen pi ma kekuli sa thsüdha.”