ZEKHARIYA 3 - Kemethajüh (N) (Re-editing) Bible (BSI)

Atusenjüh-kechüwa na kemanthi wi Keqhaikedi Kemu

¹ Kemanthi kepa wi Apvüwa na keqhaikediwa Joshua na Apvüwa nyilo tuwi ngan keben pi hi ccüca. Nu Joshua kete wi Satan na kekimenni sengho ma shunle nganben.

² Apvüwa nyilowa na Satan wi khi, “Apvüwa na no meshensa kesawa salo, Satan! Apvüwa, Jerusalem kenenwa na no kemeshensawa sa. Anyi hawa ha annibhon wina khushiya kesa chan kesü ti kesa.”

³ Joshua na athsüqae mphi nu ciwi nganben.

⁴ Tangnyilowa na ma tangketsikinathu wi khi, “Anyi hawa gwo wi athsüqae mphi keten tsü khu pilo.” Tsüseng wi ma Joshua wi khi, “Hi no kesami tsü khusen bvüdha nu athsümeni ketheü pi no mphi thsüaden .”

⁵ Ma ketsikinathu ya alikejithsü kemetha pi Joshua li wi chicülo kiza. Tangnyilowa na ciwi ngan keben wi mathu na tsüti sa, nu athsümeni ketheü pi ma mphi thsüa.

⁶ Tsaseng wi tangnyilowa na Joshua wi kizala

⁷ Kemisintsa Apvüwa na khidha: “Keujüla no iyenthu tsü nie nu hi no salo pi dhen kechithu tsü sa lethu, no hi Kekinyijjen nu ma ccühha kaghangwa saki benya ben, nu hi itu wi ben keten tangnyilothu kekhie kina keten ti no kekhie la kina cüben.

⁸ Kinayalo, Joshua, no keqhaikedi ntsawa; nu nthu ma gweghe keqhaikedi sa ketenthu, kinayalo, nthu na ghaketen wi kemehai ghena azensuwa tsü: hi imagha pi ma Cünawa le khi keten tsüpi ccüca chiten le!

⁹ Hi alon kesütan matsi tagü kesa tsüpi Joshua tuwi chiben. Hi tsü miwi kezhü pi hoki, nu ghanan kesü jü ketan na hi ayyi hawa kesami sen bvüaden .

¹⁰ Tsü tsathangwa tsü kegho wi nthu kesüsü tsüdila ma jenphonwa wi ghola kecca nu keyazi, nthu kemeshentsse lli nu khhaghabvü tonthu na vükeben witsü anongheyalo ciben.”