ZEKHARIYA 13 - Kemethajüh (N) (Re-editing) Bible (BSI)

¹ Kemisintsa Apvüwa na khiben, “Tsü tsüna kegho wi atssükebvüpen kesü pfüsi chi pi David shicübvügha nu Jerusalem wi anyithu mathu kesami nu keqheza wina satemetha den.

² Tsü tsüwi hi ayyiwa wi atsikezhüthu nyan tsü khupi nu anyi thola tsü meshen neng thsü nbendha. Hi anyi kesü le kesü lela ma atusenjüh-kechüwa le khi ketenwa khupia nu atsikezhüthu kinyi mvu keten tsü khusen bvüaden .

³ Tsaseng wi lela anyi pahan na atusenjüh-khi lethu, ma bajja na ma wi ma Apvüwa jüh khi tenle khi isala milikemesa ghena ma pi shü thsü nsathu yishü le kizaben. Khathansha wi ma atusenjüh-khi khe ma bajja na apie pi ma kecunthiaben.

⁴ Tsü tsüwa na kegho wi atusenjüh-kechü kesüla ma kemanthi ghena kapvüya nben, nyelela atusenjüh-kechü kesü ti kuliya nyelela anyithu mechu le kesa na atusenjüh-kechü thsümeni pvüya nben.

⁵ Tsüti kesawa nye ma hati khiben, ‘Hi atusenjüh-kechü kesü nye. Hi alli kecanyi kesü — Hi kahang- chuli allica ghoben.’

⁶ Tsaseng wi keujüla anyi pahan na ma keü, ‘Ndeshi wi ayisüthu tsüna mang saya nu?’ Ma luneng ben, ‘Hi ipvüshang jjen wi ayisü ha pvüya le.’ ”

Anyiza Nenikehiewa Pathilo Ajühkhukechi

⁷ Kemisintsa Apvüwa na khiben, “Njünnu, shaghalo, nu ighena kuliketen anenikehiewa tsü ssisalo! Ma pathilo, nu khaghanenithu na bvüzigheaben. Hi inyithu ssisaden,

⁸ nu ayyi maben wi anyithu gishü kecheng wi keni na shüaben.

⁹ Hi hang keyathu gishü kechengwa tsü ghan nan nu anni pi rükatssü mecang kemetha ti mathu satemetha ben. Hi suna pi mecang nan keten ti mathu ghan nanden. Tsaseng wi mathu na hi wi khie ben, nu hi mathu luneng cüden. Mathu na inyithu le kesa hi mathu kizaben, nu mathu na hi mathu Nyiza le khishiben.”