ZEKHARIYA 12 - Kemethajüh (N) (Re-editing) Bible (BSI)

Ghaketen wi Jerusalem Khushiya Keten

¹ Hawa ha Apvüwa wina Israel cüki ketsijüh kesü, atssan zanshigü chi, ayyi sachi, nu kahangli pi anyi kecüwa tsüna Apvüwa. Ma khiben,

² “Hi Jerusalem pi kisengtssü hyi kesü ti saaden; ma kevü wi mizzatentithu na tsü jjü nu adikinathu ti kulukhukhu saaben. Nu mathu na khathansha wi Jerusalem vüya khe, Judah nyunuti kepathu la vü yaden.

³ Isala tsü tsathang kegho wi hi Jerusalem sapi alon kekiyan kesü ti sa nu mizzatenti kesüle kesü lela tsü pieki le wa ma mesa-mena yaben. Ayyi wi mizzatenti tsüdi saghuya nu ma ssisa le saaben.

⁴ Tsü tsathang wi mathu goruthu tsüdi qhethi thsüa nu tsüthu kessithu sapi deja wa thsüaden . Hi Judah nyithu hieya, isala mathu ghinyi goruthu tsü sapi anyon nmu thsü laben.

⁵ Tsaseng wi Judah wi ageithu na mathu ketanla mathu wi khiben, ‘Kekhang ntsawa Apvüwa na kezü pi ma nyi Jerusalem wi kahangthu cü.’

⁶ “Tsü tsathang wi hi Judah wi ageithu sapi ayinong kesü wi nyelela kemeshentsse lli kesü nyün kebenwa ghena anni kesü ti sa cüden, nu mathu na jujü mizzatentithu tsüdi yasa cüben. Isala Jerusalem wi anyithu na yazishu anyunuti wi benben.

⁷ “Hi, Apvüwa atuwa sa khangkeya pi Judah süpahizithu cü, isanu David shicübvüghathu nu Jerusalem nyithu muya keten kekinyiküwa tsüna Judah nyi kepathu miwi diki nben.

⁸ Tsü tsüwi Apvüwa na Jerusalem wi hang kebenthu khweya, nu mathu jawi nkezü ntsawa lela David kezü ti saaben. David shicübvüghathu na Apvüwa nyilo ti, Anyiza ti mathu lentsütson ben.

⁹ Tsü tsüwi mizzatenti kesü le kesü lela Jerusalem ssisale kesawa hi tsü yasa cüden.

¹⁰ “Hi nanketizen ghamu nu kekhie ghamu pi David shicübvüghathu nu Jerusalem wi anyi kepathu la pong cüden. Mathu na apie pi kecunthi kesawa tsü ghang den, nu mathu na atsa kesütanwa ghena anonkegü ti ma ghena anongü den. Mathu na mathu tsa tssütsewa shü kesathu ti qai ntsa saaden.

¹¹ Tsü tsüwi Jerusalem wi anonkegü na di ntsa sapi Megiddo deshentijü wi Hadad Rimmon ghena anonkegü cu saaden.

^12-14 Ayyiwa wi atheghi kesüsü tsüdila mathu ketanla mathu ghena anongü den; David shicübvügha theghi, Nathan shicübvügha theghi, Levi shicübvügha theghi, Shimei shicübvügha theghi, nu atheghi kepathu tsüdila. Atheghi kesü mathu ketanla mathu ghena anongü, nu atheghi kesüsü wi npvüzathu na nzathu wina mathu kepa sa anongü ben.”