ZEKHARIYA 11 - Kemethajüh (N) (Re-editing) Bible (BSI)

Anyi Kedaggüthu keqanca

¹ Lebanon, ajenka sha chilo, isanu anni ya nji sedar tonthu tsü mecang thsülo!

² Qai nu kohonlo, sipress tonthu, sedarthu na qancadha; anyankethang chantonthu tsü yasadha! Qai nu kohonlo, Bashan yangtonthu, ayinong kejang tsü shüchi khidha!

³ Kekhang kesenthu na ahathakina wina magha; mathu nyankethang tsüna nmidha! Ssensitemithu kemagha hhai tsü kina chilo; Jordan kechhen wi mathu jjen ayinong tsü yasadha!

Anenikehie Keni

⁴ Apvüwa iNyiza na hi wi khi, “Anenithu pi pathi wa keten tsü khang kehiewa kekuli salo.

⁵ Apvüthu na anenithu pathi lela nyu mathu nmeten. Mathu na asa pi jeü nu khiben, ‘Apvüwa sengle! Ithu na keban sadha!’ Mathu kehiethu lela mathu nanketizen nmila.”

⁶ (Apvüwa na khi, “Hi ayyi wi anyi thola nantizen nten. Hi anyi tsüdi pi mathu kekhang kesenthu kekhu wi chiaben . Kekhang kesen hathu na ayyiwa tsü yasa, nu hi mathu kekhang wina tsü hangshaya nten.”)

⁷ Khaghanenithu pi jeü nu shei ketenthu na hi dengaya, nu hi khaghaneni pi pathi wa ketenthu tsü kehiewa saya. Hi akhhatssü keni khuya: hi tsü kesü pi “Kenen” nu kepawa pi “Jühkesü” ciya. Nu hi akhang tsüwa nonccaya.

⁸ Hi kepa wi anenikehiethu kecheng hi nanmeghü keten tsü n-ghang chala nu hi asha kesü jü na mathu tsüdi yasa pia.

⁹ Tsaseng wi hi aneni khang wi khi, “Hi nthu kehiewa nsadha. Shei ketenthu ya shei thsülo, nu yasa-ketenthu yasa thsülo. Hang keyathu mathu khokho keyasaliaben.”

¹⁰ Tsaseng wi hi akhhatssü “Kenen” le khi ketenwa tsü khuya nu pashüa, tsüna Apvüwa na mizzatentithu tsüdi ssinu cenkethenjühwa tsü pakhiale kesalina.

¹¹ Tsalina tsü ghanan na cenkethenjühwa tsü pakhia, khaghanenithu sheiya nu pi jeü kesathu na hi ghangben. Nu mathu na hi kekuli wina Apvüwa na mangwa khiben khe tsü chüben.

¹² Hi mathu wi khi, “Keujüla nthu kenen lethu ikutimen pi hi cülo, nyelethu tsüthu pi theng yalo.” Tsalina mathu na rükatssü changha pi ikutimen sacüa.

¹³ Apvüwa na hi wi khi, “Tsüthu pi Kekinyijjen keben kethengpen wi chilo.” Tsalina hi rükatssü changha mathu na ikutimen kemehai sa cüdha le kemeshenwa tsü khuya nu pi Kekinyijjen keben kethengpen wi chia.

¹⁴ Tsaseng wi hi akhhatssü keniwa “Jühkesü” tsü pashüya, nu Israel nu Judah jüwi jühkemece tsü yasa.

¹⁵ Tsaseng wi Apvüwa na hi wi khi, “Kheneng kuti anenikehie ma men nkemi kesü ti salo.

¹⁶ Hi anenikehie kesü pi ijithu hie thsü, isala keyasa na khaghanenithu pateqhe keben wi tsü ma mathu nkiqa; nyelela bhakitaghathu tsü nbha, mesa-mena kebenthu n-noncca, nu hang kebenthu ghanja ncü. Tsüti kesawa nye ma khaghaneni kekunon ntsathu pathi dsa nu tsüthu ccümezen la shia.

¹⁷ Anenikehie ma men nkemiwa tsü yasa tendha le! Ma ma khaghanenithu tsü teshia, aghi na gho ma kekhang yasatha saaden. Ma hacü na shü nu ma nyon ajewa na pala nmulaben.”