ZEFANIYA 3 - Kemethajüh (N) (Re-editing) Bible (BSI)

Jerusalem Kesami nu Hangshanengkeya

¹ Jerusalem, maghangmeghe, kekivvü nyunuti, ma nyithu pasha ketenwa na dedi tendha.

² Tsüna Apvüwa jüh nkina nyelela ma sansikha tsü meyala. Kenondi pi Apvüwa miwi nchi nyelela ma kekiqa nkhiela kesa ghena.

³ Ma kedithu na ghamo keben ssensitemithu ti; ma pendhethu na adenni ghama kebenthu ti, apvümene ntsa sala ghanenwa npi kecu chu asakü kesüla nteshila benden.

⁴ Atusenjüh-kechüthu na hang nmetha nu n-nondi qo; keqhaikedithu na kemetha tsü nakhi, nu Anyiza yen tsü kemili pi mathu ghena kekiyiwa sa.

⁵ Isala Apvüwa na khili kecu anyunutiwa witsü ben; ma khiela nsazzila kemeshonwa tsü saden. Ghanen kaghapengla kemeshonwa sengho ma nyithu nkecü sa nten. Isala nketsatan nyithu na ciwi la kesazziwa tsü saki nu jüghe nten.

⁶ Apvüwa na khiben, “Hi mizzatenti mabenla yasadha; hi mathu nyunutithu yasa pia nu mathu khwetithu nu ducükezhüthu dedi ben thsüdha. Anyunutithu yasadha; alentontithu na ghacang nu anyi kesüla nmiladha.

⁷ Tsaseng wi hi kemeshen na inyithu na hi kinyikü nu hi sansikha tsü yaya, nu hi chüthsü pi mathu kesansi tsü mali nbenle sa. Isala mathu na wan nu kheni ti nkemehai sa wa.

⁸ Apvüwa na khiben, “Nibenla. Hi shagha mizzatentithu kimenni keten tsathangwa tsü hieben lalo. Hi mizzatentithu nu kadiyyithu saghuya nu mathu ya ileben ketsuwa tsü chüya thsü le meshenyadha. Hi aghekepvü nni pi ayyi mabenla yasa den.

⁹ Tsaseng wi hi mizzatenti nyithu sapi kemili, nu mathu na hi wi ketan khe acenpvü kepathu wi kekhie sa nbendha. Mathu tsüdila ijüh kinaben.

¹⁰ Alen kesie Sudan wi lela inyi bvüzighe kebenthu na kekinyi khukechi sengho hi cüben.

¹¹ Tsü tsüwi nthu inyithu, nthu na hi shun ghole kesa tsü ghena njüghedha. Hi kapvü nu kinankeli ketenthu tsüdi khupi nu nthu na khiela iyyishiphon kemetha miwi hi matang nu nshundha.

¹² Hi anyi satemeni nu ccatssü ketenthu pi ciwi chi nu mathu na hi wi kekiqa bha ghoben.

¹³ Israel nyi hang keyathu na tho tu la sazzi, milikemesa khi, nyelela nyu mechu nben. Mathu na mehai kayi, yazishu, nu thola messi nbendha.”

Anonkeghe Khwi Kesü

¹⁴ Israel nyithu, anonkeghe ghena jisha nu akhwi salo! Jerusalem, nleben tsüdi sennu anonkeghe salo!

¹⁵ Apvüwa na no kemetenwa tsü khendha; ma nghinyithu tsüdila khupidha. Apvüwa, Israel kadimiwa na no ssiden; ciwi kemessi jjügi mangla nmidha.

¹⁶ Mathu na Jerusalem wi hati kekhi tsüwa na gho tendha, “Zion nyunutiwa nmessi lalo! Nkwen ya nchala nsa thsüla!

¹⁷ Apvüwa n-Nyiza na no ssiden; ma kekhang na khangkeya pi no cüaden . Apvüwa na no nenben; nu ma kaghali wina kahang ketheü pi no cüaben. Ma nmiwi akhwisa nu anongheben,

¹⁸ anyithu na akho wi anonghe keben ti.” Apvüwa na khiben, “Hi no dedi thsüale pateqhe keben tsüpi asakhen sa thsüa, nu no kekimenni tsü khusen bvüdha.

¹⁹ Matsüwa na gho tendha! Hi no pasha ketenthu meten cüden; hi accü nkemehaithu tsüdi kekashaya, nu kushinyithu ssinu ajjen wi ghoaden. Hi mathu kejüghewa tsü sapi keküwa saacü, nu ayyi nyi tsüdila mathu sengben.

²⁰ Matsüwa na gho tendha! Hi nthu bvüzighe keben nyithu ssinu ajjen wi ghoaden; hi nthu sapi ayyi tsüdi wi anyan kemechan sacü, nu kheneng nthu sapi mehai kayi yathsüaden .” Apvüwa na khidha.