ZEFANIYA 2 - Kemethajüh (N) (Re-editing) Bible (BSI)

Lebenkhapeghelo Kekhie

¹ Nkemejüghe mizzatentiwa;

² ameghü na nthu pi asugwen ti npi mo pi kebvü tuwi, Apvüwa lebenketsu mecang kebenwa tsüna nthu miwi npi kegho wi, ma ghekepvü pi npi keccüca tsathang wina, pala meshen yalo.

³ Nthu ayyiwa wi satemeni ketenthu, ma yenkhukechithu nie ketenthu tsüdi, Apvüwa wiwa khapeghe ghalo. Kemeshonwa tsü saya, nu Apvüwa tuwi nthu ketanla nthu satemeni yalo. Isathu, nthu na Apvüwa ma ghekepvü pi ccücakechi tsathang wi kemeten witsü bvüyala mechü.

Israel Kevü wi Mizzatentithu Kededi

⁴ Gaza nyunuti wi anyi kesüla nmila ben. Ashkelon tsü yishaben. Ghanan pahan jüwi Ashdod nyithu jügüshi pia, nu Ekron nyithu mathu nyunutithu wina jügüshi piaben .

⁵ Nthu Filistinthu na dedi tendha, nthu yyitssükevü wi kahang nyithu. Apvüwa na nthu meshensadha. Ma nthu kesütanla nheila yasa den.

⁶ Nthu yyi tssükedone kete wi tsüna ayela sapi anenikehiethu jjen nu khaghanenithu tsse keyapen saaben.

⁷ Judah nyi hang keyathu na nthu yyi nkayaben. Mathu na mathu sahangthu pi ciwi atsse yathsü nu Ashkelon jjenthu witsü jenben. Apvüwa mathu Nyiza na mathu ssinu mathu sapi mehai kayi yathsüaben.

⁸ Kekhangntsa Apvüwa na khiben, “Hi Moab nu Ammon nyithu na inyithu kimenni nu nankeqhe keben nu mathu na inyithu yyi pigheya ben le khi kapvü keben tsü zadha.

⁹ Hi Apvüwa, ntsakhiwa hangkeben Israel Nyizawa, hi Moab nu Ammon pi Sodom nu Gomorrah ti sala yasa tenle kesa kishenben. Mathu na amcü kechhüpen kesü sa nu anuphanla yasa pi aghang na shigübhon shaben. Inyi hang keyathu na mathu pasha nu mathu yyi khuyaben.”

¹⁰ Hatinu Moab nu Ammon nyithu na mathu wikesa nu kinankeli kesa nu Kekhangntsa Apvüwa nyithu kekimenni ghena mathu meten cüaben.

¹¹ Apvüwa na mathu pateqhe ntsa saaben. Ma ayyi wi acenpvüthu pi mangla nkenye saacü, nu tsüseng wi mizzatenti tsüdila papa yyi wi ma kinyi thsüaben.

¹² Apvüwa na Sudan nyithu la pi shü thsüaben.

¹³ Apvüwa na ma kekhang sennu Assiriya nyithu yasa ben. Ma Nineve nyunutiwa tsü yisha, atssü nkemi yyikeshü kesü sa thsüaben.

¹⁴ Tsüna mesüsithu, anenithu, nu asahang kepapa tsüdila kejenpen kesü saaben. Accüpvüthu na keyasa jawi tsü hang nu jjenkubhithu wina khou ben. Aduwengthu na ajenka lenthu wi bennu khou ben. Ajjen sa ketheng sedar chan na mme wa ben.

¹⁵ Anyunutiwa ma kekhang ghena kapvü ntsa sa nu apvü-nsale meshen ketenwa miwi tsü hati saaben. Ma nyithu na mathu nyunutiwa na ayyi wi keti ntsawa le meshenden. Khatila keyishapen kesü, asahangthu na kejenpen kesü saaben nu! Tsü pvüdhi kewa nyi tsüdila qhethiketen nu waishe saaben.