ZEFANIYA 1 - Kemethajüh (N) (Re-editing) Bible (BSI)

¹ Hawa ha Apvüwa na Amon tsawa Josiya Judah Kadimiwa tsü wi ketsijüh pi Zefaniya kecü. (Zefaniya na Kushi, Gedaliya, Amariya, nu Kadimiwa Hezekiya shicübvügha wina kegho nyi kesü.)

Apvüwa na Jühkekaghaten Tsathangwa

² Apvüwa na khi, “Hi ayyi miwi pala tsüdila yasa tendha,

³ anyi nu asahangthu, awa nu anga tsüdi. Hi gheshighenawa zansha cüden. Hi anyi kahang tsüdi yasaden, nu ciwi kahangthu nmila thsüaden . Hi Apvüwa, hi khidha.”

⁴ Hi Jerusalem nu Judah nyithu tsüdi meten cüden. Hi ciwi Baal kekinyipen asakhenwa tsü yasa pia, nu thola Anyiza nkechünyi ma kekuli sa keten keqhaikedithu tsü lela meshenya nben.

⁵ Hi anyi kesü le kesü lela ajjenmili wi kila aghani, asha, nu ghotsithu kinyi ketenwa yasa den. Hi anyi hi kinyi nu ijühya le kishen, isala acenpvü Molek nyan wina kishen ketenthu la yasa cüden.

⁶ Hi hi wina khapeghe bvü nu hi n-niela kesathu, hi wi ngho nyelela hi wi mathu lenketsütson nkekhiethu yasa cüden.’

⁷ Apvüwa na ajühkekaghaten pen wi donki keten tsathang na tetsaki bendha; tsalina ma tuwi ceen benyalo. Apvüwa na ma nyithu pi ahhansha sale kiden ben, nu aghinyithu ya Judah yasalo cichidha.

⁸ Apvüwa na khiben, “Kepathi tsathang witsü, hi kedithu, kaditsathu, nu asang kahangyen sa ketenthu tsüdi meten cüaden .

⁹ Anyiza nkechüthu ti kinyi ketenthu nu atsanqaithu shupi mathu pvüwa jjen pongya le kesalina ghanfü nu pathi ketenthu hi tsüthu tsüdi meten cüaden .”

¹⁰ Apvüwa na khiben, “Tsü ghanan wi nthu na Jerusalem wi Anga Kaghapeng-jenkawa witsü anyi kemagha hhai za yaben. Nthu na anyunuti ketheüwa wi anyi kekohon hhai nu yyishiphon thu wi pala kenyeggücha hhai keti kesü za yaben.

¹¹ Khathansha wi nthu na anyunuti ssanwa wi hang ketenthu na ha zaya khe kohon nu qaiben, kepaghenanye asenliketi kesathu tsüdila shü ben le!

¹² “Tsü tsüwi hi ahula nni kesü khuya nu Jerusalem tsü bhaben. Hi anyithu na mathu ketanla hati ‘Apvüwa na khiela pala kemehai nyelela nkemehai lela sa nten le’ khipi mathu nonkwen nu meshen pi mehaiben ketenthu meten cüaden .

¹³ Mathu keben-keyeng shuya nu mathu yenthu yasa cüden. Mathu na khiela mathu na sa keben ajjenthu witsü hang nu mathu na kemeshentsse lli ca keben wi mukeya kisengtssü tsü jjüya nben.”

¹⁴ Apvüwa tsathang ketiwa tsüna tetsaki bendha — tetsaki ntsa sadha nu wan gho tendha. Atsathangwa tsüna kekha saaben, kepaghenanye süpahizi aghi kekhang ntsathu lela hhaketu sala qaiben le!

¹⁵ Tsüna aghekepvü tsathang kesü, agükeccü nu ahathakina tsathang kesü, keyasa nu kededi tsathang kesü, kejang nu mmikejang tsathang kesü, kenimegho nu akulukeshü tsathang kesü,

¹⁶ Aghi tutuwa kekhou hhai nu süpahithu na khweti vüketheng nyunutithu nu aducü kemisi zhükethengthu ssikesali kemagha hhai na kepong tsathang kesü saaden.

¹⁷ Apvüwa na khiben, “Hi ketizenkesa hati kesa sengho anyi miwi chi nu tsüdila anyon nkemu nyi kesü ti keqoe thsüben. Mathu na sami pi hi shundha, nu khili mathu jjü na atssü ti keji thsü nu mathu kamangthu na ayyi miwi bighe benden.”

¹⁸ Apvüwa na aghekepvü pi ccüca kechi tsathang wi mathu rükatssü nu suna tsüdi lela pi mathu hangshaya nben. Ma lebenketsu nni na ayyi mabenla yasaben. Ma zuli nu asakhen kesa pi ayyi miwi hang keben tsüdi miwi chiaben.