ZAKECI 99 - Kemethajüh (N) (Re-editing) Bible (BSI)

Anyiza na Kemisintsa Kadimiwa

¹ Apvüwa kadimiwa; nu anyithu na kedheggü. Ma cherubim miwi ma kadipen wi donki nu ayyi na kuli.

² Apvüwa na Zion wi khang ben; ma mizzatentithu tsüdi miwi kekhang ntsawa.

³ Anyi tsüdi ma nyan kedi nu ajenkeben nyan kemethawa tsü seng den. Kemethawa tsüna Ma le!

⁴ Kekhang kadimiwa, no mangwa na meshon khe tsü ghaliden; no Israel wi atsentsawa tsü pieki cüdha; no ketsatan nu kemeshon tsü senghodha.

⁵ Apvüwa ithu Nyiza senglo; ma kadipen tuwi ma kinyilo! Kemethawa tsüna Ma le!

⁶ Mosa nu Aaron manyi na ma keqhaikedithu sa, nu Samuel na ma wi khie kesawa tsü; mathu na Apvüwa cichi, nu ma mathu luneng chi cü.

⁷ Ma akulukeshü cü wina mathu ccüneng; mathu na ma ayen nu ajüh khukechithu pi mathu kecü tsü nie.

⁸ O Apvüwa, ithu Nyiza, no n-nyithu luneng chi; no mathu kesami ghena mathu meten cü lela, no kesami teshi cü keten Nyiza le kesa pi mathu ccüca chilo.

⁹ Apvüwa ithu Nyiza senglo, nu ma yyishiphon kemetha wi tsü kinyilo! Apvüwa ithu Nyiza tsüna methale.