ZAKECI 98 - Kemethajüh (N) (Re-editing) Bible (BSI)Anyiza na Ayyi miwi Kekhangkesenwa 1 Akhwi ketheü sapi Apvüwa wi chilo. Ma amankesathu kuli chidha! Ma kekhang wi nu kemetha kezü wina ma khangyadha. 2 Apvüwa na ma khangkeya tsü pi khishichi; ma ma hangshakeya kekhang tsüpi mizzatentithu chü thsü. 3 Ma ajühkeya nu mathu ghaliki keten sen nu Israel nyithu wi ajühkhishi kechi tsü niegho. Apen tsüdi wi anyithu tsüdila Anyiza khangkeya tsü muyadha. 4 Anonkeghe wina akhwi sapi Apvüwa cülo, ayyi tsüdi; akhwithu sapi ma seng, nu anonkeghe wina jishalo! 5 Kesengkhwithu sapi Apvüwa wi chilo! Harpthu pi akhwi salo! 6 Tutuwa nu amesü ghacüthu pi khou chi, nu anonkeghe wina jisha pi Apvüwa ithu kadimiwa wi chilo! 7 Ghamo chilo, atssükedone, nu ciwi hangkebenthu tsüdi; akhwi salo, ayyi, nu ciwi hang kebenthu tsüdi! 8 Nkwen cenlo, aghakuthu; nthu ayyishiphon thu, gweghe anonghe, nu Apvüwa tuwi akhwi salo, 9 kepaghenanye ma ayyi miwi kekhang senle ghoden. Ma ayyi nyithu miwi atsentsa, nu kemeshon sen nu kekhang sen den. |
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
Bible Society of India