ZAKECI 92 - Kemethajüh (N) (Re-editing) Bible (BSI)

Kesengkhwi

¹ Nkesengcha kesa pi no kecü, O Apvüwa, no kenyuwakü wi akhwi kesa, O Kemisintsawa Anyiza, tsüna khatila mehai,

² ghanen kaghapen no ghaliki keten, nu ghaja kaghapen no atsentsa kesen tsüpi thangchi,

³ achünongli kebenthu nu harpthu khou pi anonkegü tsüna.

⁴ No kekuli kekhangthu tsü ghena, O Apvüwa, hi sapi nong cü; no kulikechithu tsü ghena, hi inonkeghe wina akhwi saden.

⁵ No kulikechithu tsüna khatila di nu, Apvüwa! No kemeshenthu tsüna khatila dhu nu!

⁶ Hawa ha anyi kejimawa na chü meya; nu kejüphon kesü na meshenshi nkeya ji kesü le:

⁷ anyi gheshighenathu na kepagha ti shigü shaghaya mehai, kulizzi ketenthu na mehaiya mehai; isala mathu yasatha sa cüden,

⁸ kepaghenanye no Apvüwa, anuphanla Kemisintsawa.

⁹ Nghinyithu na shüaben, nu gheshighenathu tsüdi chayaben kesa ithu na chüben.

¹⁰ No hi sapi agheja mesü süpon kezü ti sa cü; no anonkeghe sawegü pi hi cü.

¹¹ Ighinyithu na nchala kesa tsü hi mu, nu anyi gheshighenathu kiqai hhai tsü hi zayadha.

¹² Kemeshon nyithu na palm tonthu ti shigü den; mathu na Lebanon wi sedar tonthu ti shigü den.

¹³ Mathu na achanton pi Apvüwa jjen wi yang, nu ithu Nyiza Kekinyijjen wi shigü keben tsüti le,

¹⁴ maton keqhai sengwi lela ma bi bün, nu keshüthangla mejjüdhi, nu zükeqhe ben den.

¹⁵ Hawa ha Apvüwa na tsatan, ciwi hi kekhwewa miwi mangla kepazzi nmi kesa pi ccücaben.