ZAKECI 90 - Kemethajüh (N) (Re-editing) Bible (BSI)

LESÜSHEN MEJÜ ( Zak 90—106 ) Anyiza ji nu Anyi ji

¹ O Apvüwa, no keshüthang ithu jjenwa le.

² No ayyishiphon npi sakechi nyelela ayyi npi sakechi wi, no anuphan Anyiza le, nu anuphanla Anyiza sa den.

³ No anyi wi mathu kheni mangwa khe ciwi kheneng walo kiza; no ma kemili pi ayyinikhu sa.

⁴ Amapi hazar tsüna ntuwi ghanan kesü ti; tsüthu tsüna ghanie ti wadha, aghaja tsü kemilu ti kesa kesü.

⁵ No atssüketi ti ithu pie bvüa; ithu na aman keman tsü miwi sie nben. Ithu na akepagha aghanen shigü keshagha,

⁶ shigü shagha pvü nu minulen wi pvüjü nu shü keten tsüti.

⁷ N-ghekepvü wina ithu yasadha; Nlebenketsu ghena ithu keqhethidha.

⁸ No ithu kesamithu tsüpi ntuwi chi, ithu kekuthi kesami tsüpi no muya kemehai wi chi.

⁹ N-ghekepvü tsüna ithu kahangli sapi milua; tsüna sü-u sachi nu nmila kesa ti.

¹⁰ Amapi achentagü ketan ithu ji— keujüla ithu amapi achentazen, kezü benya lela; tsüthu tsüdila agükeccü, nu ahathakina ketan sengho ithu cü; kahangliwa tsüna wan nu cen, nu ithu na bvüaden .

¹¹ Thowa na n-ghekepvü kekhang tsüdi chüya nu? Thowa na nlebenketsu mangwa sengho ten khe tsü chüben nu?

¹² Ithu kahangli ha khatila milu khe tsüpi ithu sansi cülo, isathu ithu na metsa yaden.

¹³ N-ghekepvü tsüna matsü khathu ben ten nu? O Apvüwa, Nmaghathu nantizen cülo!

¹⁴ Ghanan kaghapen wila no ghaliki keten tsüpi ithu pong cülo, isanu ithu na akhwisa nu ithu kahang wi nongya thsüle kesalina.

¹⁵ Kheni ithu gükeccü tsüwi no ahathakina pi ithu kecü ju tsü khilitsü anonkeghe pi ithu cülo.

¹⁶ Ithu nmaghathu yala no kekuli kekhangthu tsü muya thsülo; ithu shicübvüghathu ya n-nyankethang kekhang tsü muya thsülo.

¹⁷ Apvüwa ithu Nyiza, no kesawegü tsü ya ithu ssiben ketenwa sa. Ithu kekuli tsüdi wi ithu ya mehaiya thsülo!