ZAKECI 9 - Kemethajüh (N) (Re-editing) Bible (BSI)

Anyiza atsentsa Ghena Ma keseng

¹ Hi ileben tsüdi pi no seng tenle, Apvüwa; na amankesa kuli kechithu tsü hi pi khichi tenle!

² Nghena hi anonghe nu kesengkhwi saden. Hi kesengkhwi sapi no saki den, kekhang ntsawa Anyiza.

³ Ighinyithu na ntsi mukeya wi asenkheneng; mathu na khulidu shü den.

⁴ No kemeshon nu atsentsa wina ajühkaghaten, nu no isheikepi jühkaghaten cü.

⁵ No no nkechüthu meshensa, nu nkemehaithu yasadha; nu thola mathu meshen neng nbendha.

⁶ Ithu ghinyithu anuphanla nmi thsüladha; no mathu nyunutiwa la yasa, nu anyi tsüdila mathu malitha sadha.

⁷ Isala Apvüwa tsü anuphan kadimiwa; ma ajühkaghaten le kesalina kadipen pieki yadha.

⁸ Ma ketsatan wina ayyi kekhang senden; nu kemeshon wina mizzatentithu jühkaghakhi den.

⁹ Apvüwa na nyu ma nkhichi ketenthu kemeniepen, ketizenkesa tsüwi kemessi nkemi penwa.

¹⁰ Apvüwa, anyi thowa na no chüya lakhe, no nondiya metsi; no bha kegho nyi kesüla teshi nten.

¹¹ Kesenkhwi sapi Zion wi kekhang kesenwa Apvüwa sakilo! Ma kekuli cüki khipi mizzatenti tsüdila kizalo!

¹² Ketizensa ketenthu Anyiza na mathu meshenki ben den; ma mathu kiqai hhai la mali nten, nu mathu tuwi sazzi ketenthu ma kemeten pi cüden.

¹³ Hi nantizen cülo, O Apvüwa! Ighinyithu na hi ya ketizen sa thsü keben ha ghangchilo! Keshü wi hi hangsha cülo, O Apvüwa,

¹⁴ Isanu hi Jerusalem nyithu tuwi ngan, nu hi no seng keben jjügi tsüdi pi mathu kizaya thsülo. No hi hangsha kecü ghena hi no wi inonghe tenle.

¹⁵ No nkechüthu na mathu ketanla ayyiku chhü ketheng witsü khulidu shandha; mathu ketanla mathu ca wi yayadha.

¹⁶ Ma ketsatan jüh kekaghakhi wi Apvüwa na ma ketanla ma pi ccüca chi, nu nkemehaithu na mathu kekuli ketanla mathu die yadha.

¹⁷ Nketsatan nyi, Anyiza nkeyamvu nyithu tsüdila keshüwa tsüna mathu ji.

¹⁸ Keshüthangla haketuthu malia nben; ketha-uthu kaghangwa tsüna anuphanla dedi thsüa nben.

¹⁹ Gholo, Apvüwa! Anyithu yala no nmatang neng thsüla! No nkekhichithu ssighola ntuwi chi nu mathu jühkaghakhi cülo.

²⁰ Mathu satemessi chilo, O Apvüwa; mathu yala keshü nyile kesa chüya thsülo.