ZAKECI 89 - Kemethajüh (N) (Re-editing) Bible (BSI)

Mizzatentiwa agüccükeben tsüwi Khwi

¹ O Apvüwa, no ghalikiketen tsü ghena hi keshüthangla akhwi sa den; hi anuphanla no atsentsa senketen tsüpi thangchiden.

² No kaghali tsüna matsü tsüdi wi benden kesa hi chüben, no wi atsentsawa tsüna atssan na anuphan ben keten ti.

³ No khichi, “Hi kessi keyawa anyi tsü ssinu ajüh cendha; Hi imaghawa David wi ijüh khishichi.

⁴ ‘Nshicü ya keshüthangla kadimiwa sa thsü den; Hi no kadishi tsüpi anuphanla noncca cüben.’ ”

⁵ No amankesa kekulithu tsü ghena tang nyithu na akhwisa; kemethathu na no atsentsa kesen tsü ghena akhwisa, Apvüwa .

⁶ Tangwi thola no ti kesa nmi, Apvüwa; tangwi kahangthu kesüla no kemece nmi.

⁷ Kemethathu kemehu wi no messi; nu mathu tsüdi no messila ngan.

⁸ Apvüwa Kekhang ntsawa Anyiza, thola no ti kekhang nmi; pala tsüdi wi no atsentsa senden, O Apvüwa .

⁹ No atssükedone kekhang miwi kekhang senden; no atssükellu kekhang tsü ya ceen ben thsüa.

¹⁰ No ghassübvü Rahab tsü pacha nu pathia; no kekhangkezü wina nghinyithu miwi khangya.

¹¹ Tangwi tsüna nji, ayyi la nji; no ayyi nu ciwi keben pala tsüdila sachi.

¹² No acülawa nu aghawa la sachi; Tabor nu Hermon Yikhathu na anonghe, nu akhwi sapi no wi chi.

¹³ No khatila khang nu! No kezü tsüna khatila di nu!

¹⁴ No kadipen tsüna kemeshon nu atsentsa miwi na piekiya; no kekuli tsüdi wi kaghali, nu atsentsa pi ccücaden.

¹⁵ No keccaketssü kewegü wi hang ketenthu, akhwi sapi no kekinyi tsüna khatila anonghe nu!

¹⁶ No ghena ghanan thangthang nonkeghe sa, nu no kemehai ghena mathu na no seng.

¹⁷ No khangkeya kedi pi ithu cü; no kaghali wina ithu ya khangya thsü.

¹⁸ O Apvüwa, no ithu kekhwewa kessi chi; No Israel Nyiza kemethawa, ithu kadimiwa pi ithu cü.

Anyiza na David wi ajühkhishi kechi

¹⁹ No kheneng kemanthi wina atsentsa maghawa wi khichi, “Hi kekiqa pi anyankemechan süpahi kesü cüdha; hi kadipenwa tsüpi anyi jawi kessi keyawa tsü cüdha.

²⁰ Hi adile kemetha pi ma nyen pi imaghawa David ya kadimi sa thsüa.

²¹ Hi kezü na keshüthangla ma ssiben, hi kekhang na ma sapi zü cüden.

²² Ma ghinyithu na khiela ma miwi mehai meyacha; anyi gheshighenawa na ma miwi khangya nben.

²³ Hi ma nankemeghüthu pacha, nu ma n-ghangmvu ketenthu tsüdi pathi cüden.

²⁴ Hi ma ghali nu ma ijüh yaden; hi keshüthangla ma sapi khangya thsü den.

²⁵ Hi ma kadiyyi tsü sapi Mediterranean na wala Eufrat Ghaku kecu wa thsüaden .

²⁶ Ma hi wi hati khiden, ‘No iba nu iNyiza; no hi kekhwewa nu hangshawa.’

²⁷ Hi ma pila atsa tssütsewa sa thsü den, kadimithu miwi kedi ntsawa.

²⁸ Hi keshüthangla ma wi ijüh khishikechi tsü nieden, nu hi ma ssinu cenkethenjühwa tsüna anuphan ben den.

²⁹ Ma kadishiwa tsüna atssan ti anuphan ben den; ma shicü yala keshüthang kadimiwa sa thsü den.

³⁰ ‘Isala keujüla ma shicüthu na iyenwa n-nie, nu ijühkhukechi wi nhangla,

³¹ keujüla mathu na hi kicükegwethu tsü nkhichi, nu iyenkhukechi tsü n-nie lethu,

³² hi mathu kesami ghena mathu meten-mesha den; mathu kesazzithu ghena hi mathu ya ketizensa thsü den.

³³ Isala hi David nghalila nyelela ma wi ijüh khishikechi n-niela sa nben.

³⁴ Hi ma ssinu cenkethenjüh pakhhi nyelela ma wi ijüh khishikechi kesütanla khunengya nben.

³⁵ “Hi inyan kemetha tsü ghena kuti nu anuphan ghena ijüh khishichi. Hi khiela David mali nben.

³⁶ Ma keshüthangla ma shicü na ben ben, nu aghani na wegükeben chu hi ma kadiyyi tsü hieden.

³⁷ Tsüna atssan wi atsentsa sheikepi ghena asha ti anuphan ben den.”

Kadimiwa miwi Khangyakesa ghena ahathakina

³⁸ Isala no kessikeya kadimiwa miwi aghepvü; no ma teshi nu ma meya mvula.

³⁹ No nmaghawa ssinu cenkethenjüh tsü pakhhi, nu ma kadiliwen tsü pi anisha wi cüchia.

⁴⁰ No ma nyunuti keshonthu tsü zansha, nu ma khwetithu tsüpi keyasa wi teshia.

⁴¹ Tsü pvüdhi sen nu kewa nyi tsüdila ma tsanqai ghanfü; ma jenshüjenphonthu tsüdi ma nankeqhe.

⁴² No khangkeya tsüpi ma ghinyithu cüa; no mathu tsüdi sapi anonghe thsü.

⁴³ No ma ghitsanqaithu tsü ya ma men nmi thsüla, nu aghi wi ncha thsüla.

⁴⁴ No ma kadimi khhatssü tsü sen bvüa, nu ma kadipen tsü pasha pi ayyi wi chia.

⁴⁵ Matsü npi kecu wina no ma sapi qhai wa thsü, nu anyankekinyen pi ma pvü thsüa.

Hangshakecü ghena Kekhie

⁴⁶ Apvüwa, no anuphan kuthi benten kwe? N-ghekepvü tsüna matsü khathu anni ti mecang ben ten nu?

⁴⁷ Hi kahang ha khatila milu khe meshen chilo; no ithu tsüdila shüa keten nyi sachile kesa meshen chilo!

⁴⁸ Thowa na hang nu nshüla benya mehai nu? Thowa na ashüjjen ghüya mehai nu?

⁴⁹ Apvüwa, hatu wi no kaghali chüshiya kemehaiwa tsüna khie nu? No David wi njüh khishikechi tsü khie nu?

⁵⁰ Hi, nmaghawa na khati kimenni ben khe, no nkechüthu kishen-keshi tsüdi wi hi khati kethankehi ben ten khe tsü nmali lalo.

⁵¹ Nghinyithu na no kessikeya kadimiwa kimenni, O Apvüwa! Ma khiewa wa khe mathu na ma kimenni.

⁵² Anuphanla Apvüwa senglo! Amen! Amen!